1 फसह तीहवारेन दाहड़ु आय लाग्‌यु, ने खाणो तीयार हय रह्‌लो। ईसु काजे मालुम हतलो, की जी कळ छुड़ीन भगवान बासेन्‌चां जाणेन मारी घड़ी आय गुयली छे। ईसु आपसा चेला काजे, जे ईनी कळी मां हतला, तीनुक पेहेल सीत परम करतु आय रवलु ने आकरी* टेम लग तीनु काजे तसुत परम करतु रयु।

2 सांतो हय रह्‌लो तत्‌यार ईसु ने तेरा चेला तीहवारेन खाणो खाणे करीन बठी गुया, तीने टेमे लग भुतड़ु सीमोन ईस्‌करीयोतीन पुर्‌या यहुदीयान मन मां ईसु काजे धुकु दीन धरावणेन वीच्‌यार नाख देदलु। 3 ईसु जाणतेलु की मे भगवान बासेन्‌चां सी आवलु छे ने भगवान बास मारा हाते मां आखो काय आप देदलु छे ने मे तेरेन्‌चां पछु जाणे वाळु छे। 4 ने चु खाणो खाणे रहणीदीन उबु हय गुयु ने आपसो उपरनो झगल्‌यो नीकाळ लेदु ने कमर मां टुवाल बांद लेदु। 5 ती चु टगार्‌याम पाणी हेड़ लेदु, ने आपसा एक-एक चेलान पाय धुवतु गुयु, ने कमर मां बांदी रवलु, तीना टुवाल सी तींद्‌रा पाय नुछतु गुयु। 6 जत्‌यार ईसु सीमोन पतरसेन्‌चां पाय धुवणे करीन आयु, ती पतरस ईसु काजे कह्‌यु, "ए मालीक! तु मारा पाय धुवणे हय र्‌यु काय?"

7 ईसु पतरस काजे जपाप आप्‌यु, "मे ज करने बाजी र्‌यु, च तु हींताळ नी समजतु बाकुन तु अळतेन समजी जासी।"

8 पतरस ईसुक कह्‌यु, "मे तुसेक मारा पाय कदी नी धुवणी दम।" ईसु पतरस काजे कह्‌यु,

"कदी मे तुसेक नी धुवों, ती मार साते रवणे मां हक नी जड़े।"

9 ज सामळीन सीमोन पतरस ईसुक कह्‌यु, "ए मालीक! असो हय ती तु मारा पाय अतरा नी बाकुन मारा हात ने मुणको लग धुय दे।"

10 ती ईसु पतरस काजे अळी कह्‌यु, "जु उंघळी लेदलु छे, तीनाक आपसा पाय अतरा धुवणु छे, तेरो आखो डील ते चुखलो छे। तुहुंं ते चुखला छे, बाकुन आखा ने आखा चुखला नी हय।" 11 ईसु काजे मालम हतलो की मेसेक कुण धरावसे, चु कह्‌यु, "तुहुंं आखा ने आखा चुखला* नी हय।"

12 जत्‌यार ईसु तींद्‌रा पाय धुय देदु, ती आपसो झगल्‌यो पछु पेहरीन अळी पछु बठ गुयु, ने तीनुक कह्‌यु, "मे तुंद्‌रे साते ज वेहवार कर्‌यु, तीना वेहवारेन मतलब तुहुंं समजी गुया काय? 13 तुहुंं मेसेक मास्‌तर ने मालीकेन नाते बुलाड़ी र्‌या ने तुहुंं सय कय र्‌या, काहाकी मे छाचलीन चु ने चु छे। 14 कदी मे तुंद्‌रु मालीक ने मास्‌तर हय्‌न बी तुंद्‌रा पाय धुयु ती तुहुंं बी एक दीसरान पाय धुवणु चाहजे। 15 मे ते तुंद्‌रा पाय धुवीन तुंद्‌रे वाटे दाखलु देखाड़लु छे, ने जसु मे ने तुंद्‌रे साते वेहवार करलु छे, तसु तुंद्‌रे वेहवार तुहुंं बी दीसरा साते वेहवार करु। 16 मे तुहुंं काजे छाची छाचीन ज कहं, काय हक मां रहणे वाळु पावर्‌यु आपसान मालीक सी मटु नी हय ने मकलन्‌या सी मटु नी हय। 17 कदी तुहुंं जी वात समजीन एरे अनसारे जीवु ती तुहुंं बरकतवाळा रवसु।"

18 "मे तुहुंं आखा काजे बरकतवाळा नी कह्‌तु काहाकी मे तीनु आखाक जाणो जीनुक मे नेवाड़लु छे बाकुन तींद्‌रे मायन एक जम छे, तेरे बारामां असो लिखलो छे जु मारु रुटु खादु, चु मेसेक लातावणे बाजी गुयु, ची वात पुरी हवसे करीन मे तीनाक बी नेवाड़लु छे। 19 हय मे तुहुंंक पेहलुत ज कयदम, तेरेसी मारो कहंलो पुरो हय जाय, ती तुहुंं भुरसु करसु, की मे चु ने चु छे। 20 मे तुहुंंक छाची छाचीन ज कहं, जु काहनु मारे सी मकेल्‌ला माणसे काजे मानीन तेरो आव-भाव करे, चु मेसेक मानीन मारुत आव-भाव करे, चु मेसेक मकेलन्‌याक मानीन तेरुत आव-भाव करे।"

21 जी वात कयदीन ईसु जीवेम बेसकु कलपी गुयु, ने जी गवाय देदु काय वात नी सात्‌यु ने कह्‌यु, "मे तुहुंंक छाची-छाची कहं तुंद्‌रे मायन एक जणु मेसेक धराय देसे।"

22 चेलाक ज नी समज पड़्‌यो की ईसु कुणीन बारामां कहंणे बाजी र्‌यु, ने चेला चकरायन एक दीसरा भीणी भाळने बाजी गुया। 23 तीनु बारे चेला मायन एक जणु, "ईसुन लाटेक्‌लु चेलु।" कहंवायतेलु। चु ईसुन छाती भीणी एक कड़्‌यु वळीन बठी रवलु। 24 सीमोन पतरस तीनाक ईसारु करीन जां कह्‌यु, "ईसुक पुछ, चु चेलु कुण छे।"

25 तत्‌यार चु असु की असु ईसुन छाती भीणी अळीन बठी रवलुत ईसुक कळेन पुछ्‌यु, "ए मालीक! जु कुण छे?" 26 ईसु तीनाक कळेन जपाप आप्‌यु, "मे तीनाक रुटान कवळ उलन मां चुपड़ीन आपीस, चु की चु मेसेक धरावण्‌यु छे।" ने चु रुटान कवळ चुपड़ीन* सीमोन ईस्‌करीयोतीन पुर्‌या यहुदा काजे आप्‌यु। 27 ने रुटान कवळ धरीन मुंहडाम नाख्‌तुत यहुदान डीलेम भुतड़ु भरायन तीनाक कब्‌जाम कर लेदु। तत्‌यार ईसु तीना यहुदाक कह्‌यु, "ज काम तु करने हींड र्‌यु च छाटुस कर।" 28 बाकुन चां खाणो खाणे बठी रवला चेला मायन कुयक बी जी वात समज नी पड़ी की ईसु तीनाक जी वात काहा कह्‌यु। 29 यहुदा धड़े थयलि हतली, ने काहनाक-काहनाक ज समज्‌या की ईसु तीनाक ज कह्‌यु हसे की, आपणु तीहवार वाटे ज काय चाहजे च मुल ली लेजे, नी ते गरीबेक आप दे।

30 अळतेन रुटान कवळ खायलीन यहुदा तत्‌यारुत खयड़े जाती र्‌यु। तीने टेमे रात हय वागली।

31 यहुदाक खयड़े जाणी दीन ईसु कह्‌यु, "हय माणसेन पुर्‌या काजे भगवान पेहलुत सी ईज्‌जत जड़ली छे, ने माणसे अगळ भगवान काजे बी माणसेन पुर्‌यान कामे सी ईज्‌जत जड़ने वाळी छे। 32 ने माणसे अगळ माणसेन पुर्‌यान कामे सी भगवान काजे ईज्‌जत जड़से ती भगवान बी माणसेन पुर्‌या काजे सरग वाळु सेक-सींगार पछु आपीन ईज्‌जत करसे ने छाटुस ईज्‌जत करसे। 33 ए मारा लाटेक्‌ला पुर्‌या-पारी! मे अळी ईतरीक वार लग तुंद्‌रे पुठ्‌ये छे, अळतेन तुहुंं मेसेक हेरसु ने जसु मे यहुदी मुख्‌याक कहलु, तसु हय मे बी तुहुंंक कहो, जां मे जाणे हींड र्‌यु चां तुहुंंक नी आवाये। 34 मे तुहुंंक एक नवलु हुकुम आपो, तुहुंं एक दीसरा पर परम राखु जसु मे तुंद्‌रे पर परम राख्‌यु तसा तुहुंं बी एक दीसरा पर परम राखु। 35 कदी तुहुंं एक दीसरा पर परम राखसु ती च देखीन आखा माणसे जाण लेसे की तुहुंं मारा चेला छे।"

36 सीमोन पतरस ईसु सी पुछ्‌यु, "ए मालीक।"

"तु कां जाणे हींड र्‌यु?" ईसु पतरस काजे कह्‌यु, "मे जां जाणे हींड र्‌यु चां तुसेक हींताळ नी आवाये बाकुन अळतेन तु चां आवसी।"

37 पतरस तीनाक कह्‌यु, ए मालीक! मेसेक हींताळ तु जाय चां काहा नी आवाये? "मे तार वाटे मारु जीव बी आप दीस।"

38 ईसु पतरस काजे जपाप आप्‌यु, "तु मारे वाटे आपसु जीव आप देसी काय? मे तुसेक छाची छाचीन ज कहं कुकड़ा वासणेन पेहलुत तु तीन कावा दीसरा अगळ असुत कह्‌सी की मे ईसुक जाणो लग नी।"