ईसु पाप काजे छुड़ने बारामां सीकाड़े
31 जे यहुदी माणसे ईसु पर भुरसु कर्या, तीनुक कह्यु, "कदी तुहुंं मारा बुल मांनीन रवसु, ती छाचलीन मारा चेला बण जासु। 32 तुहुंं छाचाय काजे जाण लेसु, ने छाचाय तुहुंंक गुलामी मां सी छुड़ाय देसे।"
33 चे ईसु काजे कह्या, "हामु ते अब्राहमेन अवल्यात छे, ने हामु कदी काहनान बी गुमाली नी कर्या। ती तु असु कसु कह्वे की छाचाय तुहुंंक गुलामी मां सी छुड़ाय देसे।"
34 ईसु तीनु काजे कह्यु, "मे तुहुंंक छाचलीन कहं, जु पाप करे चु पापेन गुलाम छे। 35 एक घरेन पावर्यान बारामां वीच्यार करु। मालीकेन पावर्यु नी बाकुन मालीकेन खरलु बेटुस घरेन हकदार्यु छे, ने चु अतरुत घर मां जलम रय सके, 36 हेरेसी कदी पुर्यु तुहुंं काजे पापेम सी छुड़ावसे ती तुहुंं छाचलीन पापेन गुलामी मां सी छुट जासु।