लुका 1

मरीयम भगवानेन गुण गावे

46 तत्‌यार मरीयम कह्‌यी,

"मारु जीव, मालीक-भगवानेन गुण गावे,

47 ने मारी चुखली-आत्‌मा, मेसेक बचाड़न्‌या भगवान मां खुस हवे;✝1:47 1 समुवेल 2:1

48 काहाकी चु आपसी नीचळी गुलाम पावरनी पर दया कर्‌यु;

हेरेसी सामळु! हय सी आखी पीड़ीन माणसे मेसेक बरकतवाळी कह्‌से;✝1:48 1 समुवेल 1:11; मलाकी 3:12

49 काहाकी आखाम ताकतवाळु भगवान मार वाटे बेसको मटो-मटो काम कर्‌यु,

ने तेरो नाव ‘चुखलो’ छे;

50 जे भगवानेन बीहाणो मानीन जीवे, तींद्‌रे पर तेरी दया बन्‌ली रवे;

हय तेरी दया, तींद्‌री पीड़ीडीट, तींद्‌रे पर बणी रवे।✝1:50 भजन सहीता 103:17

51 चु आपसा हातेन जुर देखाड़लु छे;

चु मटाय करन्‌या काजे रावण्‌या-तीवण्‌या कर देदलु।✝1:51 2 समुवेल 22:28; भजन सहीता 89:10

52 चु ताकतवाळा राजा काजे तींद्‌री राजगादी पर सी हीट पाड़्‌यु;

बाकुन नीचळा माणसेक उचा बणावलु छे।✝1:52 1 समुवेल 2:7; अय्‌युब 5:11; भजन सहीता 113:7,8

53 चु भुकला माणसेक खाणु आपीन आफराड़ देदु,

ने लकपती काजे ठारलात वळाय देदु।✝1:53 1 समुवेल 2:5; भजन सहीता 107:9

54 चु तेरा पावर्‌या ईस्‌रायेली जातीन माणसेक मदत कर्‌यु,

तीनुक हेर करीन दया कर्‌यु।✝1:54 भजन सहीता 98:3; यसाया 41:8,9

55 चु हामरा आड़ा-बुड़ा साते वायदु करलु, तेरेत अनसारे तेरी दया,

अब्‌राहम ने तेरी अवल्‌यात पर जलम बन्‌ली रवसे।"