22 चु हेरा चेला काजे कह्यु, हेरेसी मे तुहुंं काजे कहो, काय खाय्न जीवसु, ने डील पर काय पेहरसुन करीन फीकुर घुण करु। 23 काहाकी जीव खाणा सी वदु मंहगलो छे ने डील पुथल्या सी महंगो छे।12:23 भजन सहीता 147:9 24 कागळान बारामां वीच्यार करु; चु नी ते वेरे, नीते काटे, ने नी ते तींद्रे धड़े दाणा मेकणे कणग्या हय; तेबी भगवान तीनुक पेट भरीन खावाड़े। तुहुंं चिरला सी बेसका महंगा छे। 25 तुंद्रे मायन असु कुण छे, जु फीकुर करीन आपसी जीवाय्न ईतरीक बी उमर बड़ाय सके? 26 कदी तुहुंंक अतरो नानो काम बी करता नी आवड़े, ती अळी दीसरी वातेन फीकुर काहा करु? 27 बयड़ा मायन फुलेक देखीन वीच्यार करु; हये कसाक अदे! ने हये नी मेहनत करे, ने नी दुरा काटे, तेबी मे तुहुंंक कह्वो की सुलेमान राजाक बी आपसा पुरा ठट मां ईनु फुलेन तसा पुथल्या पेहरीन वारु नी। 28 तेरेमां कदी भगवान खळदाण मायन चारा काजे, जो आज छे ने वाहणे सुकीन चुल्हा मां धपणे वाटे हय जासे। तेबी असा पुथल्या पेहरावे ती ए कम भुरसा करने वाळा, ती चु तुहुंंक काहा नी वारलु पुथल्या पेहरावसे? 29 अळी काय खासुन ने काय पीसुन करीन खाणे-पीणेन हेर मां करु ने काहनी बी वातेन फीकुर मां करु। 30 ईनी कळीन माणसे ईनी आखी चीजेन फीकुर मां पड़ता रवे। बाकुन तुंद्रु सरगे मां रहण्यु बास जाणे की तुहुंंक काय-काय चाहजे। 31 बाकुन तुहुंं भगवानेन राजेन हेर करु, ती तुहुंंक जी चीज बी जड़ जासे।
धन काजे कां भेळो करनु चाहजे?
(मत्ती 6:19-21)
32 ए नानला टुळा! बीहु मां, काहाकी तुंद्रु बास तुहुंंक राज आपणे करीन खुस छे। 33 आपणो धन वेच देवु, ने दीसरा गरीब माणसे काजे दान कर देवु। आपणे वाटे असा बटवा तीयार करु, जे कदी जुना हय्न फाटे नी। सरगे मां आखो धन भेळो करु, जो कमी नी हवे, ने तेरे धड़े चुरी करने चुट्टु नी जाय सके। ने तीना धनेक थयलि काटण्यु कीड़ु नी खाय। 34 काहाकी चां तुंद्रो धन छे, चां तुंद्रो मन बी रवसे।