Lucas 17

ईसु दस कुड़ायलाक वारु करे

11 ने एक कावा जत्‌यार ईसु यरुसलेम जाणे बाजी रवलु ती चु गलील सामर्‌या जीलान काकड़ पर मायन गुयु। 12 काहनाक एक गांव मां भरायु ती तीनाक दस कुड़ायला माणसे भेळा हया।✝17:12 लेवयवेवस्‌था 13:46 13 ने चे कुड़ायला छेटेस उबा रय्‌न जुर सी आयड़ीन कह्‌या, "ए मालीक! ईसु! हामरे पर दया कर।"

14 ने ईसु तीनुक देखीन कह्‌यु, "जावु ने आपसा काजे भगवानेन पुजारा धड़े वारु देखाड़ लेवु, ने चे कुड़ायला माणसे पुजारा धड़े जाणे बाजी रवला।"

ने जातेत-जाते वाटे वारु हय्‌न चुखा हय गुया।✝17:14 लेवयवेवस्‌था 14:2,3 15 तत्‌यार तींद्‌रेम सी एक अदमी देख्‌यु की मे वारु हय गुयु, ती चु तत्‌यार भगवानेन बेसकु वारु बड़ाय करतु जाय्‌न ईसु भीणी पछु आयु। 16 ने चु मांड्‌या वळीन ईसुन पायेम हीट पड़्‌यु ने भगवान काजे बेसकु वारु कवणे बाजी गुयु। चु माणुस यहुदी जातीन नी हतलु, बाकुन सामरी जीलान एक नी-यहुदी माणुस हतलु। बाकुन दीसरा नव जणा ईसु भीणी नी आया। 17 ती ईसु तीना माणसेक कह्‌यु, "दस माणसे वारु हवला छे! ती दीसरा नव कां छे? 18 ईना दीसरे देस वाळा काजे छुड़ीन दीसरा भगवानेन बड़ाय करने ने भगवान काजे ‘बेसकु वारु’ कवणे दीसरा काहा नी आया?" 19 अळतेन ईसु तीना अदमीक कह्‌यु, "उठ ने तारे घर जाती रव। तु मार पर भुरसु कर्‌यु करीन भगवान तुसेक वारु करलु छे।"