27 ईसु जसु ढंड्याम सी उतर्यु, तत्यार तीना सहर वाळु एक माणुस ईसु धड़े आयु। तेरे बेसका भुतड़ा लागी रवला। ने चु बेसका दाहड़ा सी पुथल्या नी पेहरतेलु, ने घर मां नी रवतेलु, बाकुन मसाण्या मां रया करतेलु। 28 भुतड़ान आत्मा लागली माणुस ईसु काजे देखीन आयड़ी पड़्यु, ने पाये पड़ीन जुर सी असु कह्यु, "ए आखान डाहला जुर भर्या भगवानेन पुर्या ईसु! मार साते तारो काय काम छे? मे तारे धड़े लीलघायो की, मेसेक वेला मां पाड़े।" 29 भुतड़ान आत्मा तेरे अळी-अळीन चस्टी जातला, ने तीना माणसे काजे आपसा कब्जा मां कर लेदला; अतरोत नी बाकुन, माणसे तीना माणसे काजे साकळ्या ने कड़ा, सी बांदीन कब्जाम करतेला, तेबी चु, चे साकळ्या ने कड़ा तुड़ देदलु, ने ची आत्मा तीना माणसे काजे उजाड़्या बयड़ा मां, जां-चां लीन फीरतेला। ईसु भुतड़ान आत्मा काजे तीना माणुस मां सी नीकळनेन हुकुम आप्यु।
30 ईसु तीना माणसे काजे पुछ्यु, "तारो नाव काय छे, चु कह्यु ‘सेना’ काहाकी तीना माणुस मां बेसका भुतड़ा भराय रवला।" 31 ने तीना माणसेम भरायला भुतड़ान आत्मा, ईसु काजे अळी-अळीन असी वीन्ती कर्या: हामुक मापाये नी तसला उंडला डहराम जाणेन हुकुम मां आपे।
32 चां बयड़ा पर सुहर्यान एक बेसकु मटु टुळु चरने बाजी रवलु। अतरे तीना माणसेम भरायली आत्मा ईसु धड़े असी वीन्ती कर्या, "हामुक सुहर्या मां भरायणेन हुकुम आप दे। अतरे ईसु तीनु भुतड़ान आत्मा काजे हुकुम आप देदु।" 33 तत्यार भुतड़ान आत्मा तीना माणुस मां सी नीकळीन सुहर्या मां भराय गुया, ने चु सुहर्यान टुळु जुर सी ढासीन कड़खाम सी दरीया मां कुद पड़्यु ने पाणी मां डुबीन मर गुयु।
34 ज देखीन सुहर्या काजे चारने वाळा ढास गुया, ने चे सहरेम ने गांव मां जाय्न ज बी हयो तेरे बारामां कय देदा। 35 ने ज हयो च देखणे करीन सहर वाळा माणसे सहरेम सी नीकळीन आया, ने चे ईसु साते आवीन तीना माणसे काजे देख्या, तीनाम सी ईसु भुतड़ान आत्मा नीकाळु हतलु, चु माणुस पुथल्या पेहरीन हुगु हय्न, ईसुन पाय धड़े बस रवलु। ने चे तीनाक देखीन बीही गुया।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)