मरकुस 3

ईसु सुकला हात वाळा माणुस काजे वारु करे

1 ईसु पछु तींद्‌रा यहुदीन भक्‌तीन घर मां गुयु; चां एक माणुस हतलु, तेरु हात सुकी गुयलु, 2 थुड़ाक फरीसी माणसे ईसु पर झुटु ईल्‌जाम लागाड़नेन तकाय रवला, ने चु आरामेन दाहड़ान नीयम तुड़ीन, जु मांदला काजे वारु करे, की नी करे असा करीन चे भाळी रवला। 3 ईसु सुकला हात वाळा माणुस सी कह्‌यु, "माणसेन ईचमां उबु हय जां।" 4 ने ईसु माणसे काजे पुछ्‌यु, "काय आरामेन दाहड़े नीयमेन अनसारे वारु करनु की बुरो करनु वारु छे, जीवेक बचाड़नु की मारनु वारु छे?" बाकुन चे माणसे हुगात हय रवला। 5 चे मन मां बेसका उदास हतला, करीन ईसु बेसकु दुखी हय गुयु, ने चे रीसवायन चारेमेर तीनु काजे देख्‌यु। ने ईसु तीना काजे कह्‌यु "तारु हात लांबु कर।" ने चु हात लांबु कर्‌यु, ने तेरु हात वारु हय गुयु।