ईसुन सीकु बदली जाय ने चु मुसा ने एलीया साते वात करे
1 छव दाहड़ा हय गुया ने अळतेन ईसु पतरस ने याकुब ने तेरा भायस युहन्ना काजे पुठ्ये ली लेदु, ने तीनुक अगु एक मटला बयड़ा पर ली गुयु। 2 तींद्रे अगळ ईसुन सीकु बदली गुयु, ने तेरो मुंहडो दाहड़ान तसों चमकणे बाजी गुयो, ने तेरा पुथल्या वीजाळान तसा चमकणे बाजी गुया। 3 ने तीनु चेला काजे मुसु ने एलीयु ईसु साते वात करतेला देखाव पड़्या।
4 तेरेसी पतरस ईसु काजे कह्यु, "ए मालीक, आपणो जां रहणु वारु छे! कदी तारी मरजी हय ती मे जां तीन खपड़ी बणाय दम; एक तारे वाटे, ने एक मुसा वाटे, ने एक एलीया वाटे।"
5 चु ज कवणेत बाजी रवलु ने एक वीजाळो आदळो तीनुक ढाक लेदो, ने तीना आदळा मां सी ज सामळ्या, "जु मारु लाटेक्लु पुर्यु छे, हेरेसी मे बेसकु खुस छे: हेरीत वात सामळीन मानु!"