Mateus 26

ईसुक मारनेन जाळसांदी

1 जत्‌यार ईसु ज्‌य आखी वात कय देदु ती आपणा चेला सी कह्‌वणे बाजी गुयु। 2 "तुहुंं जाणु की दुय दाहड़ान पछे फसहन तीहवार छे, ने माणसेन पुर्‌या काजे कुरुस पर चड़ावणे वाटे धराय जासे।"

3 तत्‌यार मुख्‌या पुजारा ने भगवानेन माणसेन डाहा-बुड़ा काइफा नावेन मटला पुजारान आंगणा मां भेळा हया। 4 ने चे एक दीसरा सी वीच्‌यार कर्‌या, की ईसु काजे धुका सी धरीन मार नाखजे। 5 बाकुन चे कवतेला की "तीहवारेन टेम नी हय, काय असो नी हवे की माणसे मां लड़ाय झगड़ा हय जाय।"

बेतन्‌या मां ईसु पर ईत्‌तर तेल नाखे

6 जत्‌यार ईसु बेतन्‌या गांव मां सीमोन कुड़ायलान घर मां हतलु। 7 ती एक बायरी दगड़ा काजे वार सीस्‌यान तसों बणायन तेरे मां बेसको महंगलो ईत्‌तर लीन ईसु धड़े आवी, ने जत्‌यार ईसु रुटा खाणे बठ रवलु ती ईसुन मुणका पर लावीन नाख देदी। 8 ज्‌य देखीन तेरा चेला रीसाय गुया ने कह्‌वणे लाग्‌या, "हीना ईत्‌तर काजे काहा फालतु मां रद कर देदी? 9 हीना ईत्‌तर काजे ते जादा पयस्‌या मां वेचीन गरीब काजे वाट देदी।"

10 जी वात जाणीन ईसु हींद्‌रे सी कह्‌यु, "बायरी काजे काहा एला पाड़ु? जी बायरी मार साते वारु करली छे। 11 गरीब ते तुंद्‌रे साते जलम रवसे, बाकुन मे तुंद्‌रे साते जलम नी रवु। 12 जी बायरी मारे डील पर ज्‌य ईत्‌तर रेचवली छे, चो मारा डील काजे गाड़ने वाटे तीयार करली छे। 13 मे तुंद्‌रे सी छाचलीन कह्‌वो, की आखी कळी मां जां काहा बी ज्‌य खुस-खबरेन परचार करसे हीनी बायरीन कामेन वात वीच्‌यार ने हेर करसे।"

यहुदा ईस्‌करीती, ईसु काजे धुकुदीन धरावे

14 तत्‌यार यहुदा ईस्‌करीयोती, ज्‌य बारे चेला मां सी एक हतलु, मुख्‌या पुजारा धड़े जाय्‌न कह्‌यु, 15 "कदी मे ईसुक तुंद्‌रे हात मां धराड़ दम ती मेसे काजे काय आपसु?" चे तीना काजे तीस चांदीन सीक्‌का गीणीन आप देदा। 16 ने चु यहुदा तीनी टेमे सी ईसुक धराड़ने करीन मुखु हेरतु रयु।

ईसु चेला साते खाणो खाय

17 अखमीरी रुटान तीहवारेन पेहले दाहड़े, चेला ईसु धड़े आवीन पुछणे लाग्‌या, "तु काहा चाहे की हामु तारे वाटे फसह तीहवारेन तीयारी करजे?"

18 ईसु कह्‌यु, "सहर मां हीना माणुस धड़े जाय्‌न तीना काजे कह्‌वु, मास्‌तर कह्‌वे की मारी टेम साते आय गुयली छे। मे आपणा चेला साते तारेन चां फसहन तीहवार मनावीस।"

19 ने ईसुन चेला जसु ईसु कह्‌यु तसात कर्‌या ने फसहन तीहवारेन खाणेन तीयारी कर लेदा।

20 जत्‌यार सांती वेळाय हय गुय ती चु बारे चेला साते रुटा खाणे करीन बठ ज्‌य। 21 जत्‌यार चे खाय रवला ती ईसु कह्‌यु, "मे तुंद्‌रे सी छाचलीन कह्‌वो की तुंद्‌रे मां सी एक जणु मेसेक धरावसे।"

22 जी वात सामळ्‌या चे बेसका फीकुर मां पड़ गुया ने हींद्‌रे मां सी आखा जणा पुछणे लाग्‌या, "ए मास्‌तर, काय चु मे छे?" 23 ईसु जपाप आप्‌यु, "जु मारे साते तळी*26:23 थाली मां हात नाखलु छे, हयुत मेसे धराड़से। 24 माणसेन पुर्‌या काजे ते मरनु छे, जसों तेरा बारामां लिखलो छे; बाकुन तीनु माणुस वाटे बेसकी दुखेन वात छे, तेरे साहरे माणसेन पुर्‌या काजे धराड़से! कदी चु माणुस पयदा नी हवतु ती तेरे वाटे वारु रवतो।"

25 तत्‌यार तीना धराड़ने वाळु यहुदा कह्‌यु, "ए मास्‌तर, काय चु मे छे?" ईसु कह्‌यु, "तु आपसुत कय देदु।"

मालीकेन पंगतेन रीत सुरु करनु

26 जत्‌यार चे खाय रवला ती ईसु रुटु लेदु, ने बरकत मांगीन तुड़्‌यु, ने चेला काजे आपीन कह्‌यु, "लेवु जु रुटु खावु; ज्‌य मारो डील छे।"

27 अळतेन ईसु कटवरु लीन तु बेसकु वारु छे करीन कह्‌यु, ने तीनुक आपीन कह्‌यु, "तुहुंं आखा तेरे मां सी पीयु, 28 काहाकी ज्‌य पीयालु वायदान चो मारो लुही छे, ज्‌य बेसका माणसे वाटे पापेन माफी वाटे उहणे वाळो छे।