1 जत्‌यार ईसु ज्‌य आखी वात कय देदु ती आपणा चेला सी कह्‌वणे बाजी गुयु। 2 "तुहुंं जाणु की दुय दाहड़ान पछे फसहन तीहवार छे, ने माणसेन पुर्‌या काजे कुरुस पर चड़ावणे वाटे धराय जासे।"

3 तत्‌यार मुख्‌या पुजारा ने भगवानेन माणसेन डाहा-बुड़ा काइफा नावेन मटला पुजारान आंगणा मां भेळा हया। 4 ने चे एक दीसरा सी वीच्‌यार कर्‌या, की ईसु काजे धुका सी धरीन मार नाखजे। 5 बाकुन चे कवतेला की "तीहवारेन टेम नी हय, काय असो नी हवे की माणसे मां लड़ाय झगड़ा हय जाय।"

6 जत्‌यार ईसु बेतन्‌या गांव मां सीमोन कुड़ायलान घर मां हतलु। 7 ती एक बायरी दगड़ा काजे वार सीस्‌यान तसों बणायन तेरे मां बेसको महंगलो ईत्‌तर लीन ईसु धड़े आवी, ने जत्‌यार ईसु रुटा खाणे बठ रवलु ती ईसुन मुणका पर लावीन नाख देदी। 8 ज्‌य देखीन तेरा चेला रीसाय गुया ने कह्‌वणे लाग्‌या, "हीना ईत्‌तर काजे काहा फालतु मां रद कर देदी? 9 हीना ईत्‌तर काजे ते जादा पयस्‌या मां वेचीन गरीब काजे वाट देदी।"

10 जी वात जाणीन ईसु हींद्‌रे सी कह्‌यु, "बायरी काजे काहा एला पाड़ु? जी बायरी मार साते वारु करली छे। 11 गरीब ते तुंद्‌रे साते जलम रवसे, बाकुन मे तुंद्‌रे साते जलम नी रवु। 12 जी बायरी मारे डील पर ज्‌य ईत्‌तर रेचवली छे, चो मारा डील काजे गाड़ने वाटे तीयार करली छे। 13 मे तुंद्‌रे सी छाचलीन कह्‌वो, की आखी कळी मां जां काहा बी ज्‌य खुस-खबरेन परचार करसे हीनी बायरीन कामेन वात वीच्‌यार ने हेर करसे।"

14 तत्‌यार यहुदा ईस्‌करीयोती, ज्‌य बारे चेला मां सी एक हतलु, मुख्‌या पुजारा धड़े जाय्‌न कह्‌यु, 15 "कदी मे ईसुक तुंद्‌रे हात मां धराड़ दम ती मेसे काजे काय आपसु?" चे तीना काजे तीस चांदीन सीक्‌का गीणीन आप देदा। 16 ने चु यहुदा तीनी टेमे सी ईसुक धराड़ने करीन मुखु हेरतु रयु।

17 अखमीरी रुटान तीहवारेन पेहले दाहड़े, चेला ईसु धड़े आवीन पुछणे लाग्‌या, "तु काहा चाहे की हामु तारे वाटे फसह तीहवारेन तीयारी करजे?"

18 ईसु कह्‌यु, "सहर मां हीना माणुस धड़े जाय्‌न तीना काजे कह्‌वु, मास्‌तर कह्‌वे की मारी टेम साते आय गुयली छे। मे आपणा चेला साते तारेन चां फसहन तीहवार मनावीस।"

19 ने ईसुन चेला जसु ईसु कह्‌यु तसात कर्‌या ने फसहन तीहवारेन खाणेन तीयारी कर लेदा।

20 जत्‌यार सांती वेळाय हय गुय ती चु बारे चेला साते रुटा खाणे करीन बठ ज्‌य। 21 जत्‌यार चे खाय रवला ती ईसु कह्‌यु, "मे तुंद्‌रे सी छाचलीन कह्‌वो की तुंद्‌रे मां सी एक जणु मेसेक धरावसे।"

22 जी वात सामळ्‌या चे बेसका फीकुर मां पड़ गुया ने हींद्‌रे मां सी आखा जणा पुछणे लाग्‌या, "ए मास्‌तर, काय चु मे छे?" 23 ईसु जपाप आप्‌यु, "जु मारे साते तळी* मां हात नाखलु छे, हयुत मेसे धराड़से। 24 माणसेन पुर्‌या काजे ते मरनु छे, जसों तेरा बारामां लिखलो छे; बाकुन तीनु माणुस वाटे बेसकी दुखेन वात छे, तेरे साहरे माणसेन पुर्‌या काजे धराड़से! कदी चु माणुस पयदा नी हवतु ती तेरे वाटे वारु रवतो।"

25 तत्‌यार तीना धराड़ने वाळु यहुदा कह्‌यु, "ए मास्‌तर, काय चु मे छे?" ईसु कह्‌यु, "तु आपसुत कय देदु।"

26 जत्‌यार चे खाय रवला ती ईसु रुटु लेदु, ने बरकत मांगीन तुड़्‌यु, ने चेला काजे आपीन कह्‌यु, "लेवु जु रुटु खावु; ज्‌य मारो डील छे।"

27 अळतेन ईसु कटवरु लीन तु बेसकु वारु छे करीन कह्‌यु, ने तीनुक आपीन कह्‌यु, "तुहुंं आखा तेरे मां सी पीयु, 28 काहाकी ज्‌य पीयालु वायदान चो मारो लुही छे, ज्‌य बेसका माणसे वाटे पापेन माफी वाटे उहणे वाळो छे। 29 मे तुंद्‌रे सी कह्‌वो की अंगुरेन रस काजे हीना दाहड़ा लग घुण पीयो जत्‌यार लग तुंद्‌रे साते आपणा बासेन राज मां नवलु नी पीयो।"

30 अळतेन चे गीत गायन जेतुनेन बयड़ा पर जाणे बाजी गुया।

31 तत्‌यार ईसु तींद्‌रे सी कह्‌यु, "तुहुंं आखा आजुत राते मार बारामां वीख्‌राय जासु, काहाकी चुखली-सास्‌तुर मां गुयो लिखलो छे, ‘मे गुवाळ्‌या काजे मारीस, ने गाडरान टुळा रावण्‌या-तीवण्‌या* हय जासे।’ 32 बाकुन मे मरलाम सी जीवतु हवणेन पछे तुंद्‌रे सी पेहेल गलील जीला मां जायस।"

33 तेरेसी पतरस तीना काजे कह्‌यु, "कदी आखा तारा बारामां ठुकर खाय्‌न छुड़ देसे बाकुन मे कदी बी नी तुसेक छुड़ो!"

34 ईसु पतरस सी कह्‌यु, "मे तुसेक छाचलीन कह्‌वो की आजुत राते कुकड़ा वासणीक पेहेल, तु तीन कावा तु मेसेक नी जाणो करीन कवसी।"

35 पतरस ईसु काजे कह्‌यु, "कदी मेसेक तारे साते मरनु बी पड़े, तेबी मे तुसेक नी जाणो करीन कदी नी कह्‌वो!"

ने असात करीन आखा चेला बी कह्‌या।

36 तत्‌यार ईसु आपणा चेला साते गतसमनी नावेन एक जागा मां आयु ने आपणा चेला सी कह्‌वणे लाग्‌यु, "जान बठ रवजु, जत्‌यार लग मे वां जाय्‌न दुवा करो जां लग तुहुंं जान रवजु।" 37 ईसु पतरस ने जब्‌दीन दुयु पुर्‌या काजे साते लीन गुयु ने ईसु फीकुर मां पड़ीन कांदरायणे बाजी गुयु। 38 तत्‌यार ईसु तीनुक कह्‌यु, "मारु जीव बेसकु दुखी छे, जां लग की मारु जीव नीकळनेत हींडे। तुहुंं जां हुबा रवु ने मारे साते जागला रवु।"

39 अळतेन चु थुड़ुक अळी अगुस जाय्‌न मुंहडान भुरसे पड़्‌यु, ने असी दुवा कर्‌यु, "ए मारा बास, कदी हय सके ती ज्‌य दुखेन पीयालु मारे पर सी टळ जाय, ती बी जसु मे चाहो असु नी बाकुन जसु तु चाहे तसोत हवणे दे।"

40 अळतेन ईसु चेला धड़े आवीन तीनुक सुवतेला देख्‌यु ने पतरस सी कह्‌यु, "काय तुहुंं मारे साते एक घंटु बी नी जागी सकु काय? 41 जागता रवु, ने दुवा करता रवु की तुहुंं पारख मां नी पाड़े, आत्‌मा ते तीयार छे, बाकुन डील लुलो छे।"

42 अळतेन चु दीसरी कावा* जाय्‌न जीत दुवा कर्‌यु, "ए मारा बास, कदी ज्‌य मारे पीये बीगुर नी टळ सके ती तारीत मरजी पुरी हवे।" 43 तत्‌यार ईसु आवीन तीनुक अळी सुवतेला देख्‌यु, काहाकी हींद्‌रा डुळा नीद सी भरला हतला। 44 तीनुक छुड़ीन चु जाती रयु, ने तीनुत बुले सी अळी तीसरी कावा दुवा कर्‌यु। 45 तत्‌यार ईसु चेला धड़े आवीन तीनुक कह्‌यु, हय सुवता रवु, "ने आराम करु? देखु ची टेम आय गुयली छे, ने माणसेन पुर्‌यु पापीन हात मां धराय जासे। 46 उठु, चालु; देखु, धुकु दीन धराड़ने वाळु साते आय रयु।"

47 ईसु असु कयत रवलु की यहुदा जु बारामां सी एक हतलु आयु, ने तेरे साते मुख्‌या पुजारा ने माणसेन डाहा बुड़ा भीणी सी माणसेन मट्‌लु टुळु तलवार्‌या ने डेंगा लीन आया। 48 ईसुक धराड़ने वाळु यहुदा तीनुक असु ईसारु कर्‌यु: "तीनाक मे जाय्‌न गुळु दीस हयुत छे; तीना काजे जाय्‌न धर लेजु!"

49 ने तत्‌यार ईसु धड़े आवीन कह्‌यु, "ए मास्‌तर, वारलु छे की!" ने चु ईसु काजे बेसकु गुळु देदु।

50 ईसु यहुदा काजे कह्‌यु, "ए दुस्‌तीदार, तीना काम वाटे तु आवलु छे, तीना काम काजे कर ले।"

तत्‌यार चे धड़े आवीन ईसुक धर लेदा। 51 ईसुन साती मां सी एक जणु हात अगु करीन आपणा मीयान मां सी तलवार काजे नीकाळ लेदु ने मुख्‌या पुजारान पावर्‌यान दीन तीना पावर्‌यान कान्‌टा काजे काट नाख्‌यु। 52 तत्‌यार ईसु तीना काजे कह्‌यु, आपणी तलवार काजे मीयान मां मेकले "काहाकी जे तलवार सी मारसे चे आखा तलवार सी माराय जासे। 53 काय* तु नी जाणे की आपणा बास सी मे लीलघाय्‌न कह्‌व, ने चु सरग वाळा काहवाळ्‌यान बारे टुळा सी बी जादा टुळु मारे धड़े हींताळ मकली देसे? 54 बाकुन चुखला सास्‌तुर मां जी वाते असोत हवणेन जरुरी छे, कसी पुरी हवसे?"

55 तीनी टेमे ईसु माणसेन टुळा सी कह्‌यु, "काय तुहुंं तलवार्‌या ने डेंगा लीन मेसेक डाकु समजीन धरने आय रया काय? मे दाहड़ीन मंदीर मां भरायन सीकाड़्‌या करतेलु ने तुहुंं मेसे नी धर्‌या। 56 बाकुन जे आखा तेरेमां हयो की भगवानेन अघी सी आवणे वाळी वात देखान्‌यान बुल पुरो हवे।" तत्‌यार आखा चेला ईसुक छुड़ीन ढास गुया।

57 तत्‌यार ईसुक धरने वाळा तीना काजे काइफा नावेन मुख्‌या पुजारा धड़े लीन गुया, चां यहुदी नीयम सीकाड़न्‌या मास्‌तर्‌या ने आड़ा-बुड़ा भेळा हय रवला। 58 पतरस छेटे-छेटे ईसु पछळ-पछळ मुख्‌या पुजारान आंगणाम लग गुयु, ने घर मां जाय्‌न ईसु साते काय करे ने काय हवे चो देखणे करीन राखवाळ्‌या पावर्‌या भेळु जाय्‌न बठ गुयु। 59 मुख्‌या पुजारु ने आखा माणसे भेळा हयन ईसु काजे मार नाखणे वाटे ईसुन वीरुद मां झुटी गवा हेर रवला। 60 बाकुन बेसका झुटी गवाय देण्‌या आवणे पर बी वाक नी नीकाळ्‌या। आकरी मां दुय जणा आया, 61 असा कह्‌या, "गुयु अदमी असु कवलु, की भगवानेन मंदीर काजे उदार सको ने हीनाक तीन दाहड़ाम अळी बणाय सको।"

62 तत्‌यार मुखी पुजारु हुबु हयन ईसु सी कह्‌यु, "काय तु काय बी जपाप नी देतु? जे माणसे तारा वीरुद मां काय गवाय देय?" 63 बाकुन ईसु हुगुत हय रयु। तत्‌यार मुखी पुजारु ईसुक कह्‌यु, "मे तुसे जीवतेला भगवानेन सगुन आपो की कदी तु भगवानेन पुर्‌यु मसी छे, ती हामरे सी कय दे।"

64 ईसु तीना काजे कह्‌यु, "तु आपसुत कय देदु; नीते मे तुंद्‌रे सी ज्‌य बी कवतु की हय सी तुहुंं माणसेन पुर्‌या काजे आखा सी ताकत वाळा भगवानेन जेवड़े आंगे बठलु, ने सरगेन आदळा पर आवतेलु देखसु।"

65 हेरसी मुखी पुजारु हेरा पुथल्‌या फाड़्‌यु ने कह्‌यु, जु भगवानेन वाक नीकाळ्‌ळु छे हय हामुक गवान जरुवत नी हय? देखु तुहुंं बी ज्‌य वाक सामळावला छे। 66 तुंद्‌रा आखान काय वीच्‌यार छे? चे जपाप आप्‌या जु गुना वाळु छे, हीनाक मुतेन डंड जड़नु चाहजे।

67 तत्‌यार चे ईसुन मुंहडा पर थुप्‌या ने तीना काजे धुमाट्‌या ने दीसरा थापड़ाया ने असा कह्‌या। 68 ए मसी हामरे सी भगवानेन अघी सी आवणे वाळी वात देखाड़ने वाळु करीन कह्‌वी की तुसे कुण ठुक्‌यो?

69 पतरस बाहर आंगणा मां बठलु हतलु, की एक पावरनी पतरस धड़े आय ने कय, "तु बी ते ईसु गलील जीला वाळा साते हतलु।"

70 पतरस आखा माणसे अगळ असो कवीन ईसु काजे नीकारु देदु, "मे नी जाणतु तु काय कय रय।" 71 जत्‌यार पतरस बाहर बारना धड़े गुयु ती दीसरी पावरनी पतरस काजे देखी ने जे वां हुबा हय रवला माणसे काजे कय, "जु बी ते ईसु नासरी साते हतलु।"

72 पतरस सगुन खाय्‌न अळी ईसु काजे नीकारु देदु, "मे तीना माणुस काजे नी जाणो!"

73 थुड़ीक वार मां माणसे चां हुबा हय रवला, चे पतरस धड़े आवीन तीना काजे कह्‌या, "छाचलीन तु बी हींद्‌रे मां सी एक छे, काहाकी तारी बुली तुसे उजेंती कर देदी की तु चांहान वालु छे।"

74 तत्‌यार पतरस झीचकारने ने सगुन खाणे लाग्‌यु! "मे तीना माणुस काजे नी जाणतु।"

ने तत्‌काल कुकड़ु आस देदु। 75 तत्‌यार पतरस काजे ईसु कवलु ची वात हेर आय गुय, "ईसु कवलु कुकड़ा आसणेन पेहल तु तीन कावा मारो नीकारु कर देसी।" ने पतरस बाहार जाय्‌न उसकी-उसकीन रड़्‌यु।