1 ईसु बेसका माणसेन टुळा काजे आवतेला देखीन बयड़ा पर चहड़ी गुयु, ने जत्‌यार ईसु चां बठी गुयु ती तेरा चेला बी तेरे धड़े आय गुया। 2 तत्‌यार ईसु तीनु माणसे काजे सीकाड़तु जाय्‌न कह्‌यु।

3 "जे आपसा जीव-आत्‌मा मां गरीब छे चे बरकतवाळा छे।"

काहाकी सरगेन राज तींद्‌रोत छे!

4 "जे दुखी हय्‌न कलपे, चे बरकतवाळा छे;

काहाकी तीनुक सांती जड़से।"

5 "जे भुळा-भाळा छे; चे बरकतवाळा छे;

काहाकी चे धरतीन* हकदार बणसे।"

6 "वारला काम वाटे जे भुकला ने तीसला छे चे बरकतवाळा छे;

काहाकी भगवान तीनुक खावड़ाय्‌न नीरसा कर देसे।"

7 "जे दयाळा छे, चे बरकतवाळा छे;

काहाकी भगवान तींद्‌रे पर दया करसे।"

8 "जे मन मां चुखला छे, चे बरकतवाळा छे;

काहाकी चे भगवान काजे देखसे।"

9 "जे मेळ कराड़ने वाळा छे, चे बरकतवाळा छे!

काहाकी चे भगवानेन पुर्‌या-पारी कह्‌वाय्‌से।"

10 जे वारलु काम करने सी दुख झेले, चे बरकतवाळा छे;

काहाकी चे सरग वाळा भगवान पुठ्‌ये राज करसे!

11 तुहुंं बरकतवाळा छे, जत्‌यार माणसे मार पछळ चालने सी तुंद्‌री नाव-बद्‌दी करे, ने अळी एला पाड़े ने लुच्‌चाय मेली-मेलीन तुंद्‌रा बारामां गलत वात करे। 12 तत्‌यार तुहुंं खुस रवजु, काहाकी तुंद्‌रे वाटे सरगे मां बेसको मटो ईनाम जड़से। जी वात तसीत छे जसी की तुंद्‌रे सी पेहलेन भगवानेन अघली वात बताड़न्‌या काजे बी चे माणसे लग एला पाड़तेला।

13 तुहुंं धरतीन माणसेन नण छे; बाकुन कदी नणुत मुळो हय जाय, ती पछेन तीनाक काय सी खारो करसु? ने चो काहना बी काम मां नी रहे, बाकुन तेरो अतरोत काम मां आवे की बाहर उराट देसे। ने माणसेन पाय तळे रंदळाये।

14 तुहुंं कळीन माणसे वाटे वीजाळान तसा छे, ने चो साताय नी सके। जसों काहनोक सहर उचा बयड़ा पर वसलो रहे, तसात तुहुंं बी रवजु। 15 माणसे दिवु धपाड़ीन चवकी तळे नी मेके, बाकुन दीवाळ्‌या पर मेके, चां सी चु दिवु, तीना आखा घरन्‌याक वीजाळो आपे। 16 तेरेन तसोत तुंद्‌रो वीजाळो माणसे पर चमके, काहाकी चे तुंद्‌रा वारलु कामेक देखे, ने जु तुंद्‌रु भगवान बास सरगे मां छे, चे बी तीना बासेन बड़ाय करसे।

17 तुहुंं असा मां समजु की, हयु ईसु भगवानेन नेम कायदाक ने भगवानेन अघली वात बताड़न्‌यान किताप काजे रद करने आयु, मे रद करने नी आयु, बाकुन पुरो करने आवलु छे। 18 मे तुहुंंक छाचलीन कह्‌वो की सरग ने धरती टळी जासे, बाकुन मुसान लिखलु कायदान एक नानुस आकड़ु ने एकेक टीपको बी पुरो हवे पाखुर नी टळे। 19 तेरेमां जे काय ईनी नानली सी नानली हुकुम मां सी कह्‌ली एक काजे बी तुड़से, ने तसुत माणसे काजे बी सीकाड़े, ने आखा सी नानलु कह्‌वाय्‌से; बाकुन जे काहनाक ईनी वातेक मानीन चालसे ने दीसराक बी तीनु वात पर चालने करीन सीकाड़से, ती हयु सरगेन राज मां मट्‌लु कह्‌वाय्‌से। 20 मे तुंद्‌रे सी छाचलीन कह्‌वो की कदी तुंद्‌रो वारलु काम यहुदी नीयम सीकाड़न्‌या मास्‌तर्‌या ने फरीसी माणसेन धरमेन काम सी बड़ीन नी रवे, ती तुहुंं सरगेन राज मां कदी नी भराय सकु।

21 तुहुंं ते सामळी रया, की पेहला माणसे सी कह्‌ली वात हतली की, खुन घुण करु ने जु काहनुक खुन करसे चु जेल मां डंड भुकत्‌से। 22 बाकुन मे तुहुंंक असु कहं की, जे काहनाक आपसा भायस पर रीस करसे, चे जेल मां डंड भुकत्‌से, ने जे काहनाक आपसा भायस काजे नाव-बद्‌दी करे, चु मटला पंचु अगळ डंड भुकत्‌से, ने जे काहनाक आपसा भायस काजे असा कहें की ए डेड़-अकल्‌या ती चु नरकेन आकठा मां डंड भुकत्‌से। 23 हेरेसी कदी तु वेदी पर आपसी बादा चड़ावणे लाय रयु हय, ने चां सी तुसेक जी हेर आवे, की, मारु भायस, मार पर नराज हय रयु, 24 ती तु आपसी बादा काजे वेदी अगळुत रहणीदीन, पेहेल तारा भायस सी मेळ कर ले, ने अळतेन आय्‌न तारी बादा चड़ावजी।

25 तारु वेरी तुसे कुरुट-कचेवरी मां ली जाणे बाजी रवे, ने चु तत्‌यार वाटेत मां रवे, ती तु छाटुस जाय्‌न तेरे सी वात सार लेजी, नीते असो नी हय जाय की चु तुसे नीयाव करन्‌या सीपायड़ान हातेम सुप देय, ने सीपायड़ा तुसेक जेल मां कुंड देय। 26 मे तुसेक छाचलीन कह्‌वो, की जत्‌यार लग एकेक टकु भरी नी देय, तत्‌यार लग तुसेक जेल मां सी नी नीकळाये।

27 "तुहुंं ज बी सामळी रया, की छीनाळो घुण करु।" 28 बाकुन मे तुंद्‌रे सी असु कहं की, जु काहनुक काहनीक बायरी पर छीनाळो करनेन गलत नींगा नाखे, चु आपसा मन मां छीनाळो कर लेदुलु छे। 29 कदी तारु जेवड़्‌यु डुळु उत्‌तर बणीन तुसेक पाप कराड़े, ती तीनाक नीकाळीन नाख दे; काहाकी तारे वाटे ज वारु छे की, तारा डील मां सी एक अंग नास हय जाय ने तारु आखु डील नरक आकठाम सी बचणु तार वाटे वारु छे। 30 ने कदी तारु जेवड़्‌यु हात तुसेक पाप कराड़े, ती तीनाक काटीन उराट दे; काहाकी तारे वाटे ज्‌य वारु छे की तारा डील मां सी एक अंग नास हय जाय ने तारु आखु डील नरक आकठाम सी बचणु तार वाटे वारु छे।

31 "असो बी कह्‌लो हतलो, जु काहनुक आपसी लाडी काजे छुड़ने हींडे, ती तीनीक छुड़नेन चिट्‌ठी लिखीन आप देणु चाहजे।" 32 बाकुन मे तुहुंंक असु कहं की, जु काहनुक आपसी लाडीक छीनाळान वात छुड़ीन दीसरी वजे सी छुड़ देय, ती चु तीनीक छीनाळो कराड़े ने जु कुय तीनी छांडायली बायर काजे बणावे, चु बी छीनाळो करे।

33 "अळी तुहुंं पेहला माणसेक कहली वातेक सामेळला हतला, की झुटी सगुन घुण खाजु, बाकुन भगवान मालीक अगळ खादली सगुन काजे पुरी करजु।" 34 बाकुन मे तुहुंंक कह्‌वो की, तुहुंं कदी सगुन खावु घुण; काहाकी सरग, भगवानेन राजगादी छे; 35 ने नी धरतीन, काहाकी ची तेरा पायेन चवकी छे; नीते यरुसलेम, तीना भगवानेन सहर छे, चु राजान राजु छे। 36 ने आपणा मुणकान एक बी सगुन घुण खावु; काहाकी तु एक कान्‌याक बी नी धवळा ने नी काळ्‌ळा कर सके। 37 ने तुंद्‌री वात "हव" हय ती "हव" कवजु ने "नी" हय ती "नी" कवजु, काहाकी ज काय एरे सी अदुस कहें, चो कुहर्‌या भुतड़ाम सी उब्‌जे।

38 "तुहुंं पेहला माणसेक कहली वातेक सामळ्‌ळा हतला की, ‘डुळान बदले डुळु, ने दातेन बदले दात।’" 39 बाकुन मे तुहुंंक असु कहं की कुहराय करन्‌या माणसे सी बदलु घुण लेवु; बाकुन जु काहनाक तारे जेवड़े गाल पर थापड़ देय, तेरे भीणी दीसरु गाल बी फेरवी देजु। 40 कदी काहनुक तारे पर कुरुट मां तारीक लड़ीन तारो कुरतो मांगणे हींडे, ती तीनाक तु चादरु बी आप देजी। 41 जु काहनाक तुसेक एक कुस असलुत चालाड़ीन ली जाय, ती तींद्‌रे साते दुय कुस चालीन जात रव। 42 जु काहनुक तुंद्‌रे धड़े मांगे, ती तीनाक तुहुंं आप देजु; ने जु काहनुक तार सी उधार मांगे, ती तीनाक नी आपतु करीन मां कहुं।

43 "तुहुंं पेहला माणसेन कहली वातेक सामळ्‌ळा हतला, की ‘आपणे धड़े वाळा सी परम करजु, ने आपणा वेरी सी कुहराय राख्‌जु।’" 44 बाकुन मे तुहुंंक असु कहं की आपणा वेरी सी परम करु। ने जु काहनुक एला पाड़े तींद्‌रे वाटे दुवा करु, 45 ती तुहुंं सरग मां रहणे वाळा बासेन पुर्‌या-पारी बणसु, काहाकी चु कुहराय ने भलाय करन्‌या दुयु भातीन माणसे पर दाहड़ु उंगाड़े, ने पापी ने धरमी दुयु भातीन माणसे पर पाणी पाड़े। 46 कदी तुहुंं आपणा परम राखणेवाळा सी परम करु, ती तुहुंंक काय फळ नी जड़े, काहाकी असा ते फाळु लेणे वाळा सरकारी आफसर बी करतेला। 47 "कदी तुहुंं आपणा भायस काजे अतरात वारलु छे की करीन पुछ रया, ती तुहुंं काहनो असो मटो काम कर रया? असा ते नी-यहुदी माणसे बी करे जे भगवान काजे नी माने।" 48 तेरेमां तुहुंं पुरा-पुरा पाक्‌का बणु, जसु तुंद्‌रु सरग वाळु भगवान बास पुरु-पुरु पाक्‌कु छे।