9 ईसु चां सी अगु गुयु ने चु, मत्ती नावेन एक माणुस काजे फाळु उकाळनेन नाका पर बठलु देख्यु, ने तीना काजे कह्यु, "मारे पुठ्ये चाल।"
चु उठीन ईसु पुठ्ये चाल पड़्यु।
10 एक दाहड़ु ईसु हेरा चेला पुठ्ये मत्तीन घर खाणो खाणे करीन बठ्यु, ती बेसका फाळु लेणे वाळा पापी माणसे आवीन, ईसु ने हेरा चेला साते खाणो खाणे बाजी रवला। 11 असो देखीन फरीसी माणसे ईसुन चेला काजे असा कह्या, "तुंद्रु मास्तर फाळु लेणे वाळा ने पापी साते काहा खाय रयु?" 12 ज सामळीन ईसु तींद्रे सी कह्यु, "दवा वारलु काजे नी चाहजे, बाकुन मांदला काजे चाहजे। 13 तेरेमां तुहुंं जाय्न चुखला सास्तुर मां लिखली वात सीक लेवु: ‘मे जनवार्यान बादा नी चाहो बाकुन दया चाहो।’ काहाकी मे धरमी माणसे काजे नी, बाकुन पापी काजे बुलावणे आवलु छे।"
उपासेन सवाल
(मरकुस 2:18-22; लुका 5:33-39)