दीसरा वाटे बी सुचु
1 हेरेसी आपणु ताकतवाळा15:1 ताकतवाळा बलवानों छे करीन तेरेसी आपणु काजे जे लुला माणसेन लुलाय मां मदत करनु चाहजे, ने आपसात काजे खुस नी करनु चाहजे। 2 आपणे मां सी जतरा बी जणा छे आपणे धड़े वाळा काजे हेरी भलाय वाटे खुसी करे की चु अगु बड़े। 3 काहाकी मसी बी आपसा काजे खुस नी कर्यु, बाकुन जसों लिखलो छे, "चे जसात तारी वाक नीकाळे तसात मारी वाक बी नीकाळी र्या।" 4 जतरी वाते पेहेलुत सी खरला सास्तुर मां लिखलो हतलो, च आपणु काजे सीकाड़ने वाटे लिखली हतली की आपणु दम धरीन ने चुखला सास्तुरेन सांतीन साहरे आस राखजे। 5 दम धरीन ने सांती आपण्यु भगवान तुहुंं काजे जु वाटु आपे की मसी ईसुन अनसारे आपसा-आपसा मां एक वीच्यार मां हय्न रवु। 6 काहाकी तुहुंं एक मन ने एक रेंग मां आपणा मालीक ईसु मसीन बास भगवानेन बड़ाय करु।
आखा वाटे खुस-खबर
7 हेरेसी, जसु मसी भगवानेन सेक-सींगार वाटे तुहुंं काजे हुकारलु छे, असात तुहुंं बी एक दीसरा काजे हुकारी लेवु। 8 हेरेसी मे कहं की जु वायदु डाहा बुड़ा काजे आपलु हतलु तीनु काजे काठा करने वाटे मसी, भगवानेन छाचाय देखाड़ने वाटे, फतरी काटाण्या यहुदी माणसेन चाकरी करन्यु बण्यु, 9 ने नी-यहुदी बी दयान वजे सी भगवानेन बड़ाय करे; जसों लिखलो छे,
"हेरेसी मे जाती-जाती मां तु बेसकु वारु छे करीन कहंवीस,
ने तारे नावेन गीत गावीस।"
10 अळतेन कहलो छे,
"ए जाती नी-यहुदी आखा माणसे, भगवानेन भेळा खुस रवु।"
11 ने पछेन,
"ए जाती नी-यहुदी आखा माणसे, मालीकेन बड़ाय करु;
ने राज राजेन आखा माणसे तीना काजे तु बेसकु वारु छे करीन कहुं।"
12 ने पछेन यसायु कहें,
"यीसेन एक मुळ उजेंतु हवसे,
ने नी-यहुदी जातीन माणसे मां राज करने वाटे उजेंतु हवसे,
हेरे पर नी-यहुदी आस राख्से।"
13 भगवान जु आस काजे आपण्यु छे तुहुंं काजे भुरसु करने मां आखी खुसी ने सांती मां भर देय की चुखली-आत्मान ताकत सी तुंद्री आस मटी हवती जाय।
हिम्मत सी लिखणेन वजे
14 ए मारा भायसे, मे खुद तुंद्रे बारामां जाणो की तुहुंं बी आपसा भगवानेन भलाय ने भगवानेन अक्कल सी पुरा ने पुरा भरायला छे, ने एक दीसरा काजे सीकाड़ सकु। 15 तेबी मे कांखुर-कांखुर हेर कराड़ने वाटे तुहुंं ज बेसका हिम्मत करीन लिख्या। ज ईनी गीण-दयान वजे सी हयो ज भगवान मेसे काजे आप्यु। 16 की नी-यहुदी वाटे मसी ईसुन चाकरी करन्यु हय्न भगवानेन खुस-खबरेन चाकरी पुजारान तसु करो, तेरसी नी-यहुदी भगवान अगळ गमे असी भेट बण जाय, ने चुखली-आत्मान सी भगवान वाटे पुरा ने पुरा चुखला बण जाय। 17 हेरेसी हीनी वातेन बारामां ज भगवान सी नातो राख्से, ने ईसु मसी मां बड़ाय कर सको। 18 काहाकी हीनी वात काजे छुड़ीन मेसेक अळी काहनीक वात कहंणेन बारामां हिम्मत नी हय, जु मसी नी-यहुदीन हकेन वाटे बुल, ने काम, 19 ने सहलाणी, ने छेल-भात्या कामेन ताकत, सी ने चुखली-आत्मान ताकत सी मारे साहरे कर्यु; जां लग की मे यरुसलेम सी लीन चारे मेर इल्लुरकुम लग मसीन खुस-खबर पुरो-पुरो परचार कर्यु। 20 बाकुन मारी हर जी छे की जां-जां मसीन नाव नी लेदा, चां-चां खुस-खबर सामळावो असो नी हवे की दीसरान नेहा15:20 नेहा नींव पर घर बणावो। 21 बाकुन जसों लिखलो छे तसोत हवे,
"जीनु काजे तेरो खुस-खबर नी पुग्यो,
चेत देखसे ने जे नी सामळ्या चेत सामळसे।"
रोम मां पोलुस जाणेन तीयारी कर्यु
22 हेरेसी मे तुंद्रेन्चां अळी-अळीन आवणे नी हींड रवलु। 23 बाकुन हय ईनु देस मां मारे काम वाटे कुय जागा नी रवी, ने बेसका साल मां तुंद्रे धड़े आवणेन हर कर र्यु। 24 हेरेसी जत्यार ईस्पेन जायस ती तुंद्रेन्चां मांयन जायस, काहाकी मे जी आस कर र्यु की तीने टेमे मे तुहुंं काजे मेळीस, ने मे तुहुंं काजे मेळीन खुस हय जायस ने अळतेन तुहुंं ईतराक अगास मेसे मेली आवजु। 25 बाकुन मे हय ते चुखला माणसेन चाकरी करने करीन यरुसलेम सहर मां जाणे बाजी र्यु। 26 काहाकी मकीदुनीया ने अखायान माणसे काजे ज वारु लाग्यो की यरुसलेम चुखला माणसे मां गरीब वाटे चंदु भेळु करीन आपे। 27 वारु ते लाग्यो बाकुन चे हींद्रा करजा वाळा बी छे, काहाकी नी-यहुदी ईसुन माणसे आत्मान काम मां यहुदी माणसे साते साजल्या बणी गुयलु छे, हेरेसी नी-यहुदी काजे बी यहुदी माणसे वाटे डीलेन वात मां हींद्री सेवा करनु चाहजे। 28 हेरेसी ज काम खत्तम करीन ने तीनु काजे भेळु करलु चंदु आपीन तुंद्रेन्चां मांयन ईस्पेन जायस। 29 ने मेसे काजे मालम छे जत्यार मे तुंद्रे भीणी आवीस, ती मसीन पुरी संयबरकत लीन आवीस।
30 ए भायसे, आपणा मालीक ईसु मसी काजे ने चुखला आत्मान परम काजे अटकळ कराड़ीन लीलघायो, की मारे वाटे भगवान धड़े दुवा करने मां मारे साते भेसकायन झींग पड़ीन दुवा करता रवु। 31 की मे यहुदी माणसे जे भुरसु नी करे तींद्रे सी बचीन रव, ने मारी चाकरी जी यरुसलेम वाळा माणसे वाटे छे, ची चुखला माणसे काजे गमणु चाहजे; 32 ने मे भगवानेन मरजी सी तुंद्रे ईचमां खुस हय आवीन तुंद्रे साते ईतरीक वार आराम करीस। 33 सांती आपण्यु भगवान तुंद्रे आखा साते रवे, असोत हवे।