1 आपणु काय कहजे? आपणु पाप करतात रवजे काय? की भगवानेन गीण-दया आपणे पर हवतीत जासे। 2 कदी नी हामु जे पाप वाटे मर गुयला छे ती पाप मां कसा जीवसुन? 3 काय तुहुंं नी जाणु काय की ईसु मसीन ज बपतीस्‌मा* आपणु आखा काजे जड़लो छे चो बपतीस्‌मा तेरे जाण देनेन बपतीस्‌मा छे। 4 अतरामा आपणु ईसुन मुतेन बपतीस्‌मा लीन ईसु साते तेरेमां गाड़ाय गुया की जसों ईसु मसी बासेन सेक-सींगारेन ताकत साते मरलाम सी जीवतु हय्‌न बठु हय गुयला छे। तसात आपणु बी एक नवली जीवन जीवजे।

5 काहाकी कदी आपणु हेरे मरनेन तसात हेरे साते एक हय गुयला छे, ती छाचलीन हीनाक मरलाम सी जीवतु हवणेन तसात एक हय जासुन। 6 आपणुक मालम छे की आपणी जुन्‌डलो जीवन ईसु साते कुरुस पर चड़ाय गुयलो हतलो काहाकी पाप सी भरायलो आपणो डील खत्‌तम हय जाय ने आपणु अगा वाटे पापेन गुलाम नी बणजे। 7 काहाकी जु मर गुयलु छे, चु पापेन गुलामी सी छुटीन धरमी बण गुयलु छे। 8 तेरेमां कदी आपणु ईसु मसी साते मर गुयला छे, ती आपणुक भुरसु छे तेरे साते नवली जीवन बी जीवसुन। 9 काहाकी आपणु जाणजे की ईसु मसी मरलाम सी जीवतु हवीन पछु कदी नी मरे। ने तेरे पर मुतेन हक नी चाले। 10 काहाकी चु मर गुयु ती पापेन करता एकुत कावा मर गुयु; बाकुन हय चु भगवान साते जीवणे करीन जीवतेलु छे। 11 असात तुहुंं बी आपणा जीव काजे पाप वाटे मरला समजु बाकुन भगवान वाटे ईसु मसी मां जीवतेला समजु।

12 तेरेमां तुंद्‌रे मरला डीलेन उपर पापेन, राज नी चाले काहाकी तुहुंं पापेन मरजी पर कदी नी चाल सकु। 13 ने तुहुंं तुंद्‌रा डील काजे धरमेन काम नी करन्‌यान हत्‌यार बणावीन पाप काजे मां आपु, बाकुन आपणु काजे मर्‌या-सर्‌याम सी जीवता हय्‌न बठा हय गुया समजीन भगवानेन हातेम सुप देवु, ने आपणा डील काजे धरमेन काम करनेन हत्‌यार* समजीन भगवान काजे सुप देवु। 14 तत्‌यार तुंद्‌रे पर पाप राज नी करे काहाकी तुहुंं मुसान कायदान हक मां नी हय, बाकुन गीण-दया हक मां छे।

15 ती काय हय गुयो? आपणु अतरामा पाप करता रहणु चाहजे, की आपणु मुसान लिखला कायदान हक मां नी हय, बाकुन गीण-दया हक मां छे? नी कदी बी पाप नी करनु चाहजे। 16 तुहुंंक जी वात मालम नी हय काय, की तेरी तुहुंं हुकुम मान्‌ने करीन तेरा हातेम खुद काजे सुप देवु तुहुंं तेरात गुलाम पावर्‌या बण जाय, भले पापेन हातेम आपीन पापेन गुलाम बणु, तेरो फळ मुत छे भले भगवानेन हुकुम मानीन तेरा हातेम सुप देवु, तेरो फळ अमरकाय धरम छे। 17 बाकुन भगवान काजे तु बेसकु वारु छे* कहं की तुहुंं पेहेल पापेन गुलाम हतला तुहुंं आपणा मन सी हीनु सीकाड़नेन रीती काजे मान्‌या जी तुहुंं काजे आपली हतली। 18 ने हय तुहुंं पापेन गुलामी मां सी छुटीन धरमेन गुलाम बण गुयला छे। 19 तुंद्‌री डीलेन लुलायन वजे सी माणसेन रीत पर कहं। जसा तुहुंं आपणे भाग काजे वीटळो धरने पापेन गुलाम करीन सुपलु हतलु, असात हय आपणे भाग काजे चुखला वाटे धरमेन गुलाम करीन सुप देवु।

20 जत्‌यार तुहुंं पापेन गुलाम हतला, ती भगवानेन धरम भीणी सी तुहुंं छुटला* हतला। 21 तीनी वात सी तुहुंं लाजवाय रया, ती पेहेल तुहुंंक तीनी वात सी काय फायदु हवतेलु? काहाकी तेरो आकरी फळ ते मरनु छे। 22 बाकुन हय पाप सी छुटीन भगवानेन गुलाम पावर्‌या बणीन तुहुंंक ज फळ जड़लो छे की तुहुंं चुखला बणु, ने आकरी मां जलमेन जीवन हात करनु छे। 23 काहाकी पापेन दाहड़की ते मरनु छे, बाकुन भगवानेन दानेन वाटु आपणा मालीक ईसु मसी मां जलमेन जीवन छे।