भुरसु ने भलायन काम
14 ए भायस ने बहणस्या! कदी काहनुक, कह्वे की मे ईसु पर भुरसु करो। बाकुन चु भुरसान अनसारे भलायन काम नी करे, ती असु भुरसु करने सी काय बी फायदु नी हवे असु भुरसु करन्या माणसेक, भगवान छुटकारु नी आपे। 15 मान लेवु की काहना भायस नीते बहणीस धड़े पेहरने वाटे पुथल्या नी हय, ने दाहड़ीन खाणे वाटे खाणो बी नी हय; 16 ने कदी तुंद्रे मायन काहनुक तीनीक नीते तीनाक कह्वे, खुस हय्न जात रव, "ने वारु हुपवाळा पुथल्या पेहरजी ने पेट भरीन खाणो खाजी।" बाकुन चु कहण्यु तीनुक डीलो वाटे ज चाहजे च नी आपे, ती तेरा कवला बुले, तेरा ने सामळन्यान काय बी फायदु नी करे। 17 असु भुरसु बी भलायन कामे बीगुर मरलु छे।
18 कदी काहनुक मेसेक असु पुछे की "भगवान पर तारु भुरसु छे काय?" ती मे तीनाक असु कयस "हव, मे ते भलायन कामेन साहरे भुरसान पुरावु दी रयु। मे ते तुसेक, मारु भुरसु मारी उठ-बस मां भगवानेन नावे करला भलायन कामेन साहरे देखाड़ीस।" बाकुन मे तीनाक ज बी पुछीस, "भगवानेन नावे भलायन काम करे बीगुर, तु कसु काय कय सके की, मे भगवान पर भुरसु करो।" 19 ए माणसे एकुत भगवान छे, असु तारु भुरसु छे काय? हसे रे! बाकुन भुतड़ान आत्मा बी एकुत भगवान छे। करीन भुरसु करे, ने थर-थर कापे। असलु भुरसु काय कामकु? 20 ए डेड़-अकल्या माणसे कदी तु ईसु पर भुरसु अतरुत करे, ने भुरसु करनेन साहरे देखाव पड़न्या भलायन काम नी करे ती तारु भुरसु फालतु छे, ईनी वातेन हुकारु भरने करीन तुसेक पुरावु चाहजे काय? 21 जत्यार आपणु बास अब्राहम आपसा पुर्याक इसाक काजे वेदी पर चड़ायु, ती काय चु काम सी धरमी नी बण्यु काय?2:21 उबजाणनी किताप 22:9 22 अब्राहमेन ते भगवान पर अतरु जबर भुरसु हतलु, की चु भगवान ज काय बी कह्यु, तीनाक करने करीन तीयार हतलु। हेरेसी जे भलायन काम अबराहाम्यु कर्यु, तेरेसी आपणे अगळ जी वात उजेंती हय जाय की अब्राहमेन भुरसान काय बी कसर नी रय। 23 चुखला सास्तुर मां असो लिखलो छे, अब्राहम ते भगवान पर भुरसु कर्यु, हेरेसी भगवान तीना भुरसान साहरे तीनाक धरमी बणायु। सास्तुरेन ज बुल अब्राहमेन जीवन मां पुरो हय गुयो। अतरोत नी बाकुन, चु भगवानेन दुस्तीदार कवायणे बाजी गुयु। 2:23 उबजाणनी किताप 15:6 24 हेरेसी अब्राहमेन जीवनेन साहरे आपणे अगळ जी वात उजेंती हय जाय की भगवान पर माणसेन पाक्कु भुरसु फालतु नी रवे; चु भुरसु तींद्रे जीवन मां भलायन कामेन साहरे देखाव पड़से ने असला माणसेत काजे भगवान धरमी समजु।
25 तसोत राहाब बायरीन जात रंडी, जत्यार हयी आपसा खबर देण्या काजे आपसा घर राखी ने दीसरे वाट्ये सी मकली, ती काय ची काम सी धरमी नी बणी? 2:25 ईब्रानीयो 11:31
26 मे असु काहा कय रयु? मेसेक पाक्को मालुम छे की, जु भगवान पर भुरसु करे, बाकुन भुरसान अनसारे तेरी जीवाय मां भलायन काम देखाव नी पड़े, ती तेरु भुरसु मरलु छे। असलु भुरसु एक मरला माणसेन तसु छे, जु दम नी लेय। तेरो डील ते छे; बाकुन जीव नी हय।