भगवान ईनी कळीन अमीर माणसेन नीयाव करसे
1 ए अमीर माणसे! मारेन्चां आवीन मारी वात सामळु। जत्यार भगवान तुंद्रु नीयाव करसे, तत्यार तुहुंंक बेसका वेला करनु पड़से। तुंद्रे वाटे ज वारु रवसे, की तुहुंं हय तीनी गरान बारामां वीच्यार करीन रड़ु ने कलपु। 2 तुहुंं आपसा वाटे घणो माल धन जापताये मेल रया। बाकुन हय देखु, तुंद्रा पयस्या टका जीर गुयला छे; ने तुंद्रा वारलु-महंगला पुथल्या पर वेधु लाग गुयली छे। 3 देखु ते खरा, तुंद्रा सनो चांदी पर बी कीटी लाग गुयली छे। जत्यार भगवान तुंद्रु नीयाव करसे, ती हयी कीटी तुंद्रा गुनान जी गवा देसे की तुहुंं बेसका हायाळ्ळा छे। जसी आकठी माणसेक खाय जाय, तसुत भगवान तुहुंंक डंड आपसे। तुहुंं ते खत्तम हवणी ईनी कळीन आकरी दाहड़ा मां बी धन भेळो करीन धीग लागाड़ रया। 4 दाहड़क्या तुंद्रा खेतेन मेर काट्या, ने तुहुंं तीनुक दाहड़की नी आप्या। ची दाहड़की तुंद्रा गुनान बारामां जुर सी आयड़ी रय, सामळु ते खरा चे दाहड़क्या बी रड़ने कलपणे बाजी रया। ने ताकत वाळु मालीक भगवान तींद्रो रड़नु सामळी लेदलु छे।5:4 लेवयवेवस्था 19:15 5 तुहुंं धरती पर वारु सुक सी जीवीन बेसका मुजा कर लेदला छे; ने तुहुंं खस्सी कराड़ला बुकड़ान तसा मातालीस हय रया। 6 जे धरमी तुंद्री मानीन सांबु बुल लग नी कह्या, तुहुंं तीनु धरमी काजे गुनाळा छे, कय्न मार नाख्या।
गम खाणु ने दुवा करनु
7 हेरेसी ए भायस्यो ने बहणस्या! मालीक ईसुक पछा आवणे लग दम धरीन रवजु। किरसाण काजे देखीन सीकु, चु ते खेतेम वारु पाकाड़ने करीन दम धरीन रवे, हव चु पेहलु ने आकरी पाणी आवणेन वाट देखता रवे।5:7 वेवस्थावीवरन 11:14 8 मालीक ईसुन पछु आवणेन दाहड़ा धड़ेस आय रया। हेरेसी तुहुंं बी दम धरीन रवजु ने हदस मां छुड़ु।
9 ए भायस्यो ने बहणस्या, आखान नीयाव करन्यु भगवान ते धड़ेस आय रयु। हेरेसी एक दीसरान चुरी-चुगली मां करु। तुहुंं चुरी-चुगली नी करु ती तुंद्रे पर बी भगवान गुनु नी लागाड़े। 10 ए भायस्यो ने बहणस्या! तुहुंं जाणु की भगवानेन अघली वात बताड़ने वाळा माणसे भगवानेन खबर पुगाड़्या, करीन दीसरा माणसे तीनुक बेसका वेला पाड़्या, तेबी चे दुख झेल्या ने गम खादा तुहुंं बी तीनुक हेर राखीन, दुख ने वेला मां बी गम खाय्न दम धरीन रवजु। 11 आपणु कह्जे की जे दुखेम बी गम खाता रहणु, चे बरकतवाळा छे, तुहुंं आयुबेन बारामां सामळ्या नी काय? तीनाक ते बेसको दुख झेलनु पड़्यो, तेबी चु कतरु वारु गम खाय्न दम धरीन रयु। आपणु जाणजे की भगवान मालीक आकरी टेमे तीनाक संयबरकत आप्यु, ने तीनाक एक अंजाण्यु माणुस बणाय देदु। चु आपणु भगवान मालीक ते बेसकु दयाळु छे।
12 ए भायस्यो ने बहणस्या, हय मे एक खास वात बताड़ो, सगुन घुण खाजु, नीते सरगेन, नीते धरतीन, नीते काहनीक चीजेन। ज काम तुहुंंक नी बणे, तीना कामेक मे कर लीस करीन घुण कह्जु। ज काम तुहुंंक बण जाय, तीना कामेक मे कर लीस कह्जु। ज काम तुहुंंक नी बणे, तीना कामेक मेसेक ज नी कराये करीन कह्जु। असा कह्ता रवसु, ती भगवान तुंद्रे पर गुनु नी लागाड़े।
दुवान ताकत
13 कदी तुंद्रे मां कुय वेला कर रयु हय, ती चु भगवान धड़े दुवा करनु चाहजे; ने कदी काहनुक सुकनु हय, ती गीत गावीन भगवानेन गुण गावु। 14 कदी काहनुक मांदु पड़ रयु हय, ती तीनाक असो कह्वणु चाहजे, की मार वाटे दुवा करने करीन मंडळीन मुख्या काजे बुलाय लावु, ने चे आवीन मालीक ईसुन नावे तीना मांदलान तेल चुपड़ीन दुवा करसे, 15 ने भुरसा भेळी करली दुवान साहरे मांदलु वारु हय जासे, ने मालीक ईसु तीना मांदला काजे वारु कर देसे, ने चु खाट्ली मां सी उठी आवसे। ने चु कदी पाप कर्यु हय, ती तीनाक माफी बी जड़ जासे। 16 हेरेसी तुहुंं एक दीसरा अगळ आपणा-आपणा पापेक मान लेवु, ने एक दीसरा वाटे दुवा करु, तेरेसी तुहुंं डील ने जीव-आत्मा मां वारका हय जावु। छाचलीन धरमी माणसेन दुवा ताकतवाळी ने कामकी रवे। 17 एलीयान बी ते आपणेन तसु सुक-दुख झेलन्यु माणुस हतलु। तेबी चु भगवान धड़े मन लागाड़ीन दुवा कर्यु, की पाणी नी आवणु चाहजे। ने साड़े तीन साल लग धरती पर पाणी नी पड़्यु। 18 अळतेन चु एलीया भगवान धड़े दुवा कर्यु, की पाणी आवणु चाहजे ने सरगे सी पाणी पड़्यु, ती धरती पर मेर पाकी।
19 ए मारा भायस्यो ने बहणस्या, कदी काहनुक भगवानेन छाचले वाट्ये सी छेटु हय जाय, तत्यार तीनाक छाचले वाट्ये अळी पछु लावणे करीन तेरी मदत करु। 20 ती चु असु जान लेणु चाहजे की जु काहनुक काहनाक भटकला पापी काजे पछु ली आवसे, चु जीव-आत्मा काजे जलम लग मुत मां सी बचाड़ लेसे। हेरेसी जी वात पाक्का जाणीन पापेम खुवायलाक पछु लावणेन काम हासी-खुसी सी करु।