João 21

सातठे चेलन के यीसु दिखाई देथै

1 एखर बाद यीसु खुद के तिबिरियास समुन्दर के लिघ्घो चेलन के आगू परगट होथै अउ हइ मेर होथै। 2 समोन पतरस अउ थोमा जउन दिदमुस कहाथै अउ गलील परदेस के काना सहर नतनएल के रहै बाले रथै अउ जबदी के दुइठे टोरवा अउ यीसु के दुइठे चेला मसे अक जिघा रथै। 3 समोन पतरस उनखर लग कथै, "मै मछडी पकडै जथो।" उनो ओखर लग कथै, "हमु तोर संग चलबो।"

उन निकड के नाह जिहाज हे चढथै, पय ऊ रात उनही कुछु नेहको मिलथै। 4 सकरहा यीसु समुन्दर के लिघ्घो आयके ठाढ रथै, तउभरमा चेला नेहको चीनथै कि ऊ यीसु हबै। 5 यीसु उनखर लग कथै, "हे लरिका, का तुम्हर लिघ्घो कुछु खाय के निता मछडी हबै?" उन जबाब देथै, "कुछु नेहको हबै।"

6 यीसु उनखर लग कथै, "नाह जिहाज के दहिना पल्ला जाला डाला, ता तुमही मिलही।" जब उन जाला डालिन अउ एतका मछडी फस गइन कि उन जाला नेहको तीन पाउत रहिन।

7 तब ऊ चेला जेखर लग यीसु माया करथै, पतरस लग कथै, "हइ परभु हबै।" जब समोन पतरस हइ सुनथै कि ऊ परभु हबै, ता ऊ अपन कनिहा हे साफी लपेट लेथै, काखे ऊ कपडा नेहको पहिने रथै अउ दहार हे कूद जथै। 8 दूसर चेला नान हस नाह जिहाज हे मछडी लग भररे हर जाला के तीनत आथै, काखे ऊ समुन्दर के टाठा लग बोहत दुरिहां नेहको रथै, केबल दुइ सव मीटर के दुरिहां हे रथै। 9 जब उन समुन्दर के टाठा हे उतरथै, ता उन कोइला के आगी हे धररे हर मछडी अउ रोटी के देखथै। 10 यीसु उनखर लग कथै, "जउन मछडी तुम अबे पकडे हबा, उन मसे कुछ मछडी लइ आबा।"

11 जब समोन पतरस नाह जिहाज हे चढके जाला के समुन्दर के टाठा हे लइ आनथै, ऊ जाला हे अक सव तिरपन बडका-बडका मछडी रथै अउ एतका मछडी होय लग जाला नेहको फटथै।