Lucas 1

परभु यीसु के पइदा कर संदेस

26 छठमा महिना स्वरगदूत जिब्राईल भगवान के पल्ला लग, गलील परदेस नासरत नामक सहर हे अक्ठी कुमारी के लिघ्घो पठोय गइस। 27 अक्ठी कुमारी के लिघ्घो पठोइस, जेखर ओली राजा दाऊद के घराना यूसुफ नाम के डउका लग होथै, ऊ कुमारी के नाम मरियम रथै। 28 जिब्राईल स्वरगदूत ओखर लिघ्घो आइस अउ बोलिस, "तोर हे किरपा होय हबै, तोर जय होय परभु तोर संग हबै।"

29 मरियम हइ बात के सुनके बोहत चकित हुइ गइस, अउ मन हे सोचै लग जथै, नमस्ते के मतलब काहिन हुइ सकथै? 30 स्वरगदूत ओखर लग कथै, मरियम झइ डर, भगवान के अनुगरह किरपा तोर हे होय हबै। 31 सुन तै लादा हे होबे अउ अक्ठी टोरवा के पइदा करिहे, अउ तै ओखर नाम यीसु रखबे✝1:31 यसा 7:14। 32 ऊ बडा होही अउ परम परधान भगवान कर टोरवा कहाही, अउ परभु ओखर बाफ दाऊद के राजगद्दी उके दइ✝1:32 भजन 132:11; 2 समु 7:12-16; इब्रानिन 1:8; दानि 2:44। 33 ऊ सबरोज तक याकूब के घराना हे राज करी, अउ ओखर राज के अंत कबहुन खतम नेहको होही।

34 मरियम स्वरगदूत लग कथै, "हइ कसके सम्भव होही? काखे मै तो कुमारी हव।"

35 स्वरगदूत जबाब देथै, "तोर लिघ्घो पवितर आतमा आही, अउ परम परधान के सक्ति तोके अपन छाया हे लइ लेही, हइमेर ऊ पइदा लय बाले पवितर लरका भगवान कर टोरवा कहाही। 36 अउ देखबे तोर बेहन इलीसिबा के डोकरी हे टोरवा होय बाले हबै, अउ ओखर लादा हे छय माह के हबै, मनसे कथै, कि ऊ बांझ हबै। 37 काखे जउन बचन भगवान के निता कुछु कठिन नेहको हबै।"

38 मरियम कथै, देख मै परभु के हरवाहिन हव, तोर बचन के जसना होय तब ऊ स्वरगदूत ओखर लिघ्घो लग कढ गइस।