Lucas 5

यीसु अपन पहिले चेला के बुलाथै

1 अक रोज यीसु गन्नेसरत झील*5:1 नान हस नदिया के टाठा लग ठाड रथै, ता मनसे भगवान कर बचन सुनै के निता, ओखर चउगिरदा पल्ला घेरे रथै। 2 ऊ टेम उन झील के पाखा छो लगे हर दुइठे नाह जिहाज के देखथै, ढिमरा उतर के जाला के धोउत रथै। 3 यीसु उनखर मसे अक्ठी नाह जिहाज लग जउन समोन के रथै, चढ गइस अउ उन ओखर लग कथै, नाह जिहाज के टाठा लग कुछ दुरिहां लइ चला, एखर बाद ऊ बइठ गइस अउ नाह जिहाज लग मनसेन के सिक्छा देय लगथै।

4 बात करै के बाद उन समोन लग कथै, नाह जिहाज गहीर पानी हे लइ चला अउ मछडी पकरै के निता अपन जाला उछो डाला।

5 समोन जबाब देथै, स्वामी रात भर मेहनत करै भरमा हम कुछु नेहको पकड सकन, पय तोर कहे लग मै जाल डारे देथो। 6 असना करे लग बोहत मछडी जाल हे फस गइस, कि उनखर जाल फटै लगिस। 7 उन दूसर नाह जिहाज के अपन संगिन के इसारा करिस, कि उन आयके उनखर मदत करै, उन आइन अउ उन दुनो नाह जिहाज के मछडिन लग एतका भर लइन कि नाह जिहाज पानी हे बुडै लगथै। 8 हइ देखके समोन पतरस यीसु के गोड हे गिरके कथै, "परभु मोर लिघ्घो लग कढ जा, मै तो पापी मनसे हव।"

9 काखे जाल हे बोहत मछडिन के फसै के कारन समोन अउ ओखर संगी चकित रथै। 10 इहै हाल याकूब अउ यूहन्ना के होइस, हइ जबदी के टोरवा समोन सहपारटी रथै, यीसु समोन लग कथै, "झइ डर काखे अब तुम जिन्दा मनसेन के पकरे करिहा।"

11 जब उन अपन नाह जिहाज के पाखा लग लानथै, तब उन सगलू कुछ छांडके यीसु के पाछू हुइ लेथै।