लूका 9

पांच हजार मनसेन के रोटी खबाथै

10 चेला लउट के आइन अउ यीसु के गुठेइन कि उन मनसेन काहिन-काहिन करे हबै, यीसु उनके अपन संग लइके बैतसदा सहर के पल्ला सुनसान जिघा हे लइ गइस। 11 पय मनसेन के एखर बारे हे पता हुइ गइस, अउ उनो ओखर पाछू हुइ लेथै, यीसु उनखर सोगत करिस, भगवान कर राज के बारे हे गुठेइस अउ जिनही निक्खा होय के जरूरत रथै उनही निक्खा करिस।

12 सांझ होंय बाले रथै, इहैनिता बारहठे चेला यीसु के लिघ्घो आयके कथै, "मनसेन के भीड के पठोय दे, ता उन अगल-बगल के गांव हे जाय के रहै के निता, अउ खाय के निता जुगाड कर सकै, काखे इहां हम सुनसान जिघा हे हवन।"

13 यीसु अपन चेलन के जबाब दइस, "तुमिन उनही खाय के देया"

ता चेला कथै, "हमर लिघ्घो पांचठे रोटी अउ दुइठे मछडी हबै अउ एखर सिबाय हमार लिघ्घो कुछु नेहको हबै, तै काहिन चाहथस कि हमिन खुद जायके इन सगलू मनसेन के निता खाना खरीदी?" 14 उछो करीबन पांच हजार डउका रथै, यीसु अपन चेलन लग कथै, "उन मनसेन के पचास-पचास के झुन्ड हे उनके बइठा देया।"

15 अउ चेला ओसनेन करिन अउ सब के बइठा दइन। 16 तब यीसु पांचठे रोटी अउ दुइठे मछडी हाथ हे लइके स्वरग पल्ला देखके भगवान के धन्यबाद देथै, अउ फेर रोटी के टोरिस, अउ अपन चेलन के दइस, ता उन मनसेन के पोरसै। 17 सगलू मनसे मछडी अउ रोटी खायके अघाय गइन, अउ बचे हर रोटी के खन्डा लग बारा छन्नी भर गइस✝9:17 2 राजा 4:44।