1 Sakamnji nda i nati sak Kǝrǝsti.

2 Nja hamkuni kǝthlǝm la kuɗukkuni nji chika hurmi, kishshuni ichi sakandǝ kuni har ɗichin nda i fǝrandi kuni.

3 Yah kisi kǝ sǝnuniwa le naka inn chikawun hishnifa Kǝrǝsti, le naka inn chikawun nuhnifa, hishnifa, le naka inn Kǝrǝsti Fara. 4 Chikawun hishnifǝ hwanka ndu tǝ mbu’ǝn icha Fara indǝ’ena supta, njirtǝ Kǝrǝsti le nak mwanchinna mbanitǝkǝn. 5 Chikawun nuhnifǝ hwanka, ndu tǝ mbu’ǝn icha Fara supwawutǝ i’ndǝwa, njirtǝ sǝmahha le nak mwanchinna mbanitǝkǝn, nakǝn keeke tǝ hǝsandǝ i’ndǝ’enaɗi. 6 Ma cher nuhnifǝ supwandǝ i’ndǝ’en, kǝ hǝsaǝn hwasǝ’enaɗi. Manakǝn harǝfatsi ma hǝsa nuhnifǝ hwasǝ’enaɗi ndu kǝ hǝsangkaɗǝ tukulmur, kǝ supwaǝn. 7 Kamusi hishnifǝ kǝ supwa’ǝn i’ndǝ’enwa, nakǝn kǝ mirshingta paɗ mwanda Fara. Nuhnifa paɗ mwanda hishnifa. 8 Kǝthlǝm a tǝrkakǝn hishnifa nga chekna fata nuhnifǝwa, nuhnifǝ cheka fata hishnifa. 9 Su fichǝ hishnifǝ kǝthlǝm nuhnifǝwa, nuhnifǝ sǝt fichǝ kǝthlǝm hishnifa. 10 Kǝthlǝm ndǝkǝn sokkǝn waat nuhnifǝ kǝ kǝnǝn ɗankwali i’ndǝ’en, che sakǝtkǝna sǝmah nak mwanchin, paɗ kǝthlǝm mala’ikacha. 11 Chika tǝkichu, a hur Lǝmwanda nuhnifǝ nga somǝnhi tǝ hishnifǝwa, hishnifǝ paɗ nga somǝnhi tǝ nuhnifǝwa.

12 Nda i nat nuhnifǝ chekna fata hishnifa, kichu paɗ nuhnifǝ ngǝtkǝ hishnifa. Ichi nat paɗ ɓaknda mbǝɗa Fara. 13 Yaramǝnhi tǝ inchengnuni, keekesi nuhnifǝ kǝ hwanaǝn Farǝ tǝ indǝ’en chaawa? 14 Sakkawu nathi kǝmharwa ma mel hishnifǝ hwasǝ’en njang, nga ǝnat harǝfata mbǝɗ’enwowa? 15 Ma hwasa nuhnifǝ njang nga mwandǝ’enwa? Fǝrang fichǝ hwasǝ njang kichuyu kǝthlǝm kǝ ngǝlaǝn i’ndǝ’ensi. 16 Ma yunǝsǝ nat halǝ’indǝ’ensi kǝ ɗar iniyu, kanang sǝnwani ɗǝsǝchǝ somǝnwa, nakǝn kichu mbǝɗa tahhǝt nofcha Fara.

17 Kǝ ichiya hamwi kuniwa, kǝthlǝm ma hwimunihi nga i katkǝnwa i sǝɓkǝn. 18 A tǝrkakǝn, sǝkkiwa ma hwimunihi humta fa tǝrmbanda, a lanak saktǝhisa hurnuni. Ɓeɗi fǝrkita ɗar shuwunkǝn nguɗeh kicha. 19 Sokkǝn waat kǝ mbǝs fichǝ saktǝhi hurnuni, kǝthlǝm kǝ sǝnfichǝ fa kachita hurnuni. 20 Ma hwimunihi nga jibi Lǝmwandǝ la sǝm tuniwa. 21 Kǝthlǝm a chikǝn, chikawun la ɗǝkna mban tǝ sǝm ɗǝsǝmtǝ’en pu’utǝ nifǝwa. Yunǝ tǝ mita fa, yunǝ ngeli har tǝraɗa. 22 Nga hurechengnunisǝ kǝ sǝmuni kǝ suni hurkǝnwowa? Tǝ njiruni fa tǝrmbanda Fara, paɗ kǝnuni ɓahhandǝ fichile nguchit ichengnandǝsi? Mǝnati mbwa’anda kuni? Kǝ hamikuni kǝ iniyuwa? Auwa ngi hamkuniwa.

23 I fǝrandi kuniya thlǝki mbǝɗa Lǝmwanda ndatwa: Lǝmwandǝ Yǝso, a fiɗiki fǝrtǝ fichǝndi, tǝrkǝn njohma, 24 ɗifitǝ sǝt usoko’en, chichaanhi ndakǝnwa: "Faɗengnǝniya, fǝrtǝ fichǝ kǝthlǝm kunang. La sam kichu kǝthlǝm kuɗuktǝ tǝnji." 25 Mbandǝ ǝrtǝ paɗ, ɗifitǝ jibi tǝkǝn tǝrkǝn kop, ndakǝnwa: "Koptiya i yuwa ɗǝf shundǝhi a hur fwarengna. Sam kichu nat kǝ farǝ natuni sata kǝthlǝm kuɗuktǝ tǝnji." 26 Chika kwat natuni chi njohmiya, paɗ natuni sata a koptiya, nuni mbu mǝrtaɗa Lǝmwanda kǝ fari natna ɓata.

27 Kǝthlǝm ndǝkǝn, nat le chiikǝ njohmiya, sheɗɗa hur kop ti Lǝmwandǝya nga hur chiɗchiɗchitwa, shiɗtǝ ɓǝɓichitfat kǝ fata tǝ fwara Lǝmwanda. 28 Chikawun kǝ kikeɗaǝn fat’en, kana chi njohhǝmkǝn paɗ kana sata koptǝkǝn. 29 Kǝthlǝm chikawun chiika a sheɗ paɗ ngatǝ mwanandǝ fatkǝna Lǝmwandǝwa, paɗ saɗǝ sakmiya fat’ensi, tǝ mbǝɗa chi’ini tǝ saɗini’enyu. 30 Ndǝkǝn sǝka nofchǝ oi a hurnuni alchiɗengnandǝsǝwa, funǝ haachinnda, paɗ terchina hurnuni a mirnda. 31 Ma yaraɗǝm inchengnǝmhi poo, ngu ficha sakamiya kǝmwa. 32 Ma Lǝmwandǝ sakang miyakǝm, na ficha eltandǝkǝm kǝthlǝm mǝ thlandǝ kita kǝmsǝ tǝ kisshitǝwa.

33 Kǝthlǝm ndǝkǝn hwanmanchina, ma hwimunihi kǝthlǝm sǝm’ǝna, kǝ pu’uni ndani. 34 Ma yunǝsǝ tǝ mitafa, kǝ sǝmǝn’ǝna huri, kǝthlǝm humtengnuni mǝ ɓandǝ thlet shunda kuniwa.

Kǝ ɗar tahhǝt icha, ni mbwa’a mbachǝkǝna kuni ma ɓeɗi.