1 Chikama la mbǝrki shundǝ tǝ hanshuwuncha nofcha tǝ i Mala’ikacha, nakǝn mbǝnfatsa faɗengniwa, sokki nda pupwandǝra lǝ la tik kaǝn, manga kichuwa nda thlǝmra. 2 Chikama fǝrtengnǝsi i mbu’icha Fara paɗ la mbǝsayi ichi ɓuɓweeta tǝ sǝndǝ nat, ma fǝrkitchiɗengnǝsǝ kaǝn ni mbǝla mbasandǝ shohlachaɗi nga mbǝnfatsa faɗengniwa nga ǝn nakiwa. 3 Chikama ni fǝra ichi naksengnǝ nata fa ɓahcha kǝ fǝri faɗengna kǝ 'yangfichaɗi manga mbǝnfatsa faɗengniwa, ǝnsǝ nati mbǝstisǝwa.

4 Mbǝnfata kǝrǝstǝ’ensi, tǝ kafata, sǝrǝhtǝsa hur mbǝnfatwa, thla’andǝ’ensǝwa, mwa’indǝsǝwa. 5 Mbǝnfata thla’indǝsǝwa, yah’indǝsa hur mbǝnfatwa, sǝɓhursǝ paapawa, kǝs’ǝnsahurwa. 6 Mbǝnfata yahutǝ sǝɓfatwa, la mbǝnkǝnfat kǝ i sǝtficha ɗar kit. 7 Mbǝnfat la nakǝn tǝ kǝrǝstafa kǝɗing chika hur witǝmi, la nakǝn tǝ fǝrkit hur chikamǝ nat, la ɗǝfkǝn hanndǝkiketa ichinat, la kǝrǝskǝn tǝ ichinat.

8 Tamu mbǝnfata tuɓwatwa kǝparee. Mbu’ichi Farǝ na sǝt kǝmban nan thlǝrǝttaɗi, shundǝ tǝ hanshuwunchi somsomǝn nan shekata, sǝn’ǝna nan thlǝrǝttaɗi. 9 Sǝn’ǝnengnǝm nǝhɗuhiwa. Mbu’ichi chandǝ Fara kish ngǝ mbǝɗengnǝm nǝhɗuhiwa. 10 Ma ɓeɗ le nǝhhǝɗkǝhi, le nǝhɗuchikhi nan thlǝrǝttaɗi. 11 Thlahmbǝɗi nati kǝ hweya, la shuwunkǝ nda hweya, la yarki nda hweya, la mbuki ichi kamkǝsi nda hweya. Kǝ sǝkti nifa, malayi hwanchita. 12 Nakǝnya la nakǝm nda a hur shishing’ama, shummǝ shumma, farǝkǝn nakma nat hwanitǝ tǝ hwanita. Sǝn’ǝnengna nakǝnya nǝhɗuhiwa, a farǝkǝn na sǝɗengna nǝhhatǝhi nda i sǝntǝfichinji ndiichin.

13 Nakǝnya, ichi mǝkkanya shokndǝ kichu, fǝrkit, ɗǝf hanndǝkiketǝsi, tǝ mbǝnfata. Le nak mwanchina hurnanda mbǝnfata.