1 Nakǝnya pathlǝ kǝsaanda fichilesǝ nak chiɗchiɗ, sam nda i ndaɗi mbǝt ngǝlhwanichi a Galatiyayu. 2 A farǝ ladi, tǝrka chika yen mundǝ muɗ, chikawuni kǝla ɗǝfǝn hanndǝɓǝltǝhi kǝlar hur i la mbǝlaatǝn mbǝsta kǝ kǝsǝnhar, kǝthlǝm ma ɓeɗi mǝni hum’icha natsǝwa. 3 Ma she’i ni thlǝn fichile hartunihar, ngǝmtuni tǝkanda, tǝ yarat ɗelwer kǝ ɗǝndǝ tǝ fǝrpofǝn engnuni kǝ Urshelima. 4 Ma sokkǝnwa keekesi njang paɗ kǝ ɗi, natnda ɗǝfkǝɗǝnji.

5 Ni ɓata mbǝɗengnuni ma ɗiɗi tǝ Makidoniya, kǝthlǝm yahkisi kǝ ɗi tǝ Makidoniya. 6 Mbah kǝ si tolla mbǝɗengnuni, mbahya ma kǝ mbǝrayi fektǝhi mbǝnniyu, kǝthlǝm kǝ kǝsikunisi nat mbǝɗi nati ɗǝta. 7 Nga yahtengna kǝnikuni nakǝnya kǝ mbǝrihi ndakwa, ɗǝfi hanndǝkiketǝsi kǝ muni tolla mbǝɗengnuni, ma ngǝma Lǝmwandǝ. 8 Paɗ ni thlarǝhi a Afisa kǝ farǝ Pentekos, 9 Kǝthlǝm i’ni fichǝ mikǝnndǝsǝ hauyang i tor nat tǝ mbǝs’ǝnsi chika sokkǝn atikrechisǝ kaǝn.

10 Ma ɓeɗ Timoti, kǝ ngǝmangnguni kǝ kalǝn fathi hurnuni, kǝthlǝm mǝlan ma na sǝt tora Lǝmwandǝ nda i nati sǝtta. 11 Mǝ cherinduni thlǝtndǝwa, kǝ kǝsangngunisa hur witǝ’en yuyur, kǝthlǝm kǝ ngǝraǝn i’na mbǝɗengna, nja kǝlata mba ɓat’en tǝ hwanmancha.

12 Nakǝnya pathlǝ hwanmanǝm Afolos paɗ, hwanaɗi tǝ alchitafa kǝ ɗǝka mbǝɗengnuni tǝ tahhǝt hwanmancha, nakǝn nga yahtǝ’en kǝ ɗǝn nakǝnyawa. Nan ɗǝta ma mbish tǝ mbanda.

13 Sokam tǝ tahhasǝfa, kǝ thlaruni kit tǝ alchita a hur fǝrkitengnuni, kǝnuni nda hishcha, kǝnuni tǝ alchitafa. 14 I natuni sǝtnat kǝ suni hur mbǝnfata. 15 Hwanmancha, shinuni nofchi hura’a Istifanus kanda tǝrkakǝ tǝrtǝhi a hur hachahai Akaya, paɗ firndǝ fechengnanda kǝ sangndǝ tora fichile nak chiɗchiɗ. 16 Nja hwanandǝ kuni kǝ fǝranguni mwanda witǝ nofchiniyu, tǝ fichile naka shikechǝ torchengnani tǝ ɓahtengnani. 17 Shiki mbǝndǝfǝ tǝ ɓata Istifanus, tǝ Fartunatus, tǝ Akaikus, le sokkǝ nda kunang ɓaka. 18 Tǝrandǝ hurengnǝhi nat tǝ innuni. Witǝ nofchiniyu kǝla fǝranguni mwanda kanda.

19 Fa tǝrmbayi Asiyayu kanda nda’icha kuni. Akila tǝ Biriskila tǝ fa tǝrmbayi la humkǝhi hure’engnandǝyu, kanda nda’icha kuni kaǝn hur thlǝm Lǝmwanda. 20 Hwanmanchi natta mbǝnniyu kanda nda’ǝna kuni. Kǝ ndangnguni icha ndani tǝ chiɗchiɗ tǝ kǝsndanihar. 21 Njang Bulus yarak ndat’ǝnaɗiya tǝ harengna. 22 Ma yunǝsǝ nguchit mbǝnfat’ensi kǝ mbǝɗa Lǝmwanda, kǝnaka sǝɓkǝn. Lǝ Lǝmwada a ɓu. 23 Kafata Lǝmwandǝ Yǝso kǝnan tǝ kuni. 24 Malan mbǝnfaɗengna kǝnan tǝ kuni natuni hur Yǝso Kǝrǝsti. Kǝsokǝn kichu.