1 Nakǝnya kǝ ichi yaratuni ɗarkǝn, ndiichinsi hishnifǝ mǝ kahindǝ kanwa. 2 Kǝthlǝm rahhanda fǝlawichit har, chikawun hishnifǝ kǝnan tǝ nuhkǝnsi, paɗ chikawun nuhnifǝ kǝnan tǝ sǝmahsi. 3 Hishnifǝ kǝ fǝraǝn i kamkǝsa nuhkǝn i reta, nuhnifǝ paɗ kǝ fǝraǝn i kamkǝsa sǝmahha i reta. 4 Kǝthlǝm nuhnifǝ alchit’ensǝ kǝ fa fat’en ichitkǝnwa, sǝmah ndak. Kichu paɗ sǝmah alchit’ensǝ kǝ fa fat’en ichitkǝnwa, nuhkǝn ndak. 5 Mǝ njaɗuni ndaniwa, kǝnan tǝ ngǝmtengnuni hwaa, kǝ fari ɗǝftuni kǝthlǝm kǝna hur’inchengnuni hur hwanda kanuni ngǝr kǝmta, kǝthlǝm mǝ limi sheɗan kuni a ɗar ɓah kǝrǝstǝwa. 6 Mbuki iya i kamkǝsi yarandǝhi, nga waatwa. 7 Mamuwa nansǝta kǝna nofchǝ nat nda njang. Nakǝn chikawun hishnifa tǝ i fǝrandǝ Fara, leya tǝ witǝ i fǝrandǝn leyu paɗ tǝ witǝ ikǝn.

8 Kǝ mbǝɗa fichile kahuchikkan tǝ ndǝllat nishcha fichile mǝrtǝ hishchengnandǝyu, a kǝllaɗengna keekesi kǝ soknda kahundǝ kanwa nda i nati. 9 Ma ngunda mbǝla kǝs fechengnandǝ harwa, kǝ kahndǝ kan. Kweshkǝn kǝ kah nifǝ kan mǝni ita ɗi tǝ yahta.

10 Kǝ mbǝɗa fichile kahkǝ kan nja ndandakuniwa, nga njangwa Lǝmwanda, ndatwa: "Nuhnifǝ mǝ sakindǝhi tǝ sǝmahwa." 11 Ma ɓeɗa saktǝhi tǝndi, kǝ sokǝn kichuyu kǝnretsǝwa, manga kichuuwa kǝ tahsangndǝ thlerǝnandaɗi tǝ sǝmahha. Hishnifǝ paɗ mǝ sakiɗǝhi tǝ nuhkǝnwa.

12 Kǝ mbǝɗa tahchikǝn paɗ ndakiwa: "Nga Lǝmwandǝ mbukǝwa." Ma yunǝ hwanmandǝsi nat nuhkǝn kǝla ɓahfǝrkit, ngim nuhnifǝkǝn kǝ sokǝn tǝndi, mǝ cheriɗǝndǝwa. 13 Ma nuhnifǝsǝ nat sǝmah kǝ lǝ ɓahfǝrkit, ngim hisnifǝkǝn kǝ sokǝn tǝndi, mǝ cheriɗǝndǝwa. 14 Kǝthlǝm hishnifǝ lǝ ɓahfǝrkit, tahsafichǝ chiɗchiɗ tǝ mbǝɗa nuhkǝn, paɗ nuhnifǝ lǝ ɓahfǝrkit, tahsafichaɗi chiɗchiɗ tǝ mbǝɗa sǝmahha. Manga kichuwa, hwechengnuni naknda nat tǝ putafa, nda i natǝn nakǝnya, nakndǝ chiɗchiɗ.

15 Ma lǝ ɓahfǝrkittiyu yahkǝsa saktǝhi tǝ shetkǝn kǝnan kichu. A witǝ mbǝnniyu, hwanmandǝ kǝ nuhnifǝ ndu kǝ hishnifǝ nga waatsa sokkǝnwa. Kǝthlǝm Farǝ akǝn kǝm kǝ sok yuyurchit tǝ ndani. 16 Sokǝn nuhnifa, shinnǝ ndu mbahya sokǝn na hǝrkandǝ sǝmatuuwa? Sokǝn hishnifa, shinnǝ ndu mbahya sokǝn na hǝrkandǝ nuhwuwa?

17 Chika witǝmǝ natma hurkǝn, chikawun kǝ sokka mbǝɗi ɗǝftǝ Lǝmwandǝndǝsi a nat’enhi, kǝ i at Farǝ ndi. Ndǝkǝn naka mbutengna kǝ mbǝɗa fafǝrkit nat. 18 Wun taɓkǝ kǝ heshang ficha kǝ fari at fichǝndi? Mǝ sokiɗǝ kǝ lǝ ɓah heshiwa. Le heshuchika kǝ fari at fichǝndi, mǝ kiɗǝ heshiwa. 19 Hesha tǝ ɓah hesha nga ǝn nakndǝwa, kuwur kussa Farǝ ndak naka ka’ǝna. 20 Chikawun kǝ nan nda i natǝn kǝ fari at Fara ɗi. 21 Naku kǝ mafat kana ficha atsǝwa? Mǝ kǝmu ǝnwa. Manu ɓǝs alchit iɗeku, sǝku tor tǝ mbayiniyu. 22 Chikawun naka mafata kana Lǝmwanda atndi nakǝn kǝ nifi ɓǝske alchit iɗi’en a Lǝmwanda. Kichu paɗ le nguchika mafata kana ficha atndi nakǝn kǝ mafata Kǝrǝsti. 23 Hikkǝ fichǝ kuni 'yang’yang mǝ niɗuni mafecha nofchǝwa. 24 Kǝthlǝm ndǝkǝn hwanmancha, chika hur witǝ sokmǝ atfichǝ chikawuni, kǝ sokǝn kichu nda i at Farǝndi, kǝnan tǝ Farǝ’en.

25 Kǝ ɗar nishchi tamuchika kan, fǝriwu Lǝmwandǝ alchit shuɗe kǝ ɗarkǝnwa, paɗ naki fǝr i naka yarengna kǝ ɗar ndatwa njangti ngǝmitǝ fichǝsi a ɗar shisshetfata Lǝmwanda. 26 Ma yarengna, kǝthlǝm ɓahhi natma hurkǝn nakǝnya, keekesi kǝ soknifǝ ichitkǝn nda i natǝn. 27 A kehnikanwa? Mǝ kǝnǝ saktǝhiwa. Ma kahunikanwa, mǝ kǝnǝ nuhnifǝwa. 28 Ma kehnikan sunǝ ɓǝɓichitfatwa, ma keh nuhhwekan sutǝ ɓǝɓichitfatwa. Fichile kahkǝkan nanda yimta ɓahtǝ somsomǝn a naɗihiya, njang tǝ yahhisǝ kǝnan paapa’a mbǝɗengnuni.

29 I yarti hwanmancha, ndatwa hanmunchikǝn nguɗeh. Thlata nakǝnya kǝ mban fichile nat nishchengnandǝsi kǝ sokndǝ nda ngusengnandǝwa, 30 Fa tita nda nga tǝnnda titwa, fichile naka mbǝnfata nda nga kanda mbǝnfatwa, fichile hikkǝ’ǝna kǝ nandǝ nda nga ichengnandǝ kǝ kǝsndǝharwa. 31 Fichile naka sǝt tor tǝ ǝnat kisshita mǝ ɗǝfindǝ fatsǝwa. Kǝthlǝm kisshikǝn a naɗi nakǝnya, tǝ naka mbǝrtǝhi.

32 Yahkisi kǝnuni cha’a hur thlahur i’nda. Nifi kahhuchikkan nak yarǝ’ena ɗar torcha Lǝmwanda, i natna sǝta kǝ tǝraǝn hura Lǝmwandǝhi. 33 Le kahkǝkan nak yarǝ’ena nata ɗar ǝnat kisshita, mbayi natna sǝt kǝ tǝraǝn hura nuhkǝnhi. 34 Paɗ shek hur’indǝ’enhi. Nuhnifǝ kahhuchikkan ndu nuhhweya nak yarǝ’ena ɗar torcha Lǝmwanda, la ɗǝfkǝn indǝ’en kaǝn kǝ mbǝɗa Lǝmwanda a hur fat tǝ shemeɗa. Nuhnifi kahkǝkan yarǝ’ena ɗar ǝnat kisshita, mbayi natna sǝt kǝ tǝraǝn hura sǝmahhi. 35 Naki mbu ichiya kǝthlǝm kǝ kǝsangka kunisi, ngauwa kǝ ɓweshikuniwa, kǝthlǝm soktengnuni kǝnaka mbandǝ ndiichin mǝ saki yarengnunihi hur mwanandǝ Lǝmwandǝwa.

36 Ma yaraa yunǝhiwa i natna sǝt kǝ ɗar nuhhwani ngwantǝn nga keekewa, a nakǝn hurrecha nuhhwankǝna mbǝrtǝhi paɗ a fat’en kemsǝ kǝ kahhǝnkan, kǝ sǝn kichu nda i yahtǝn. Nga tǝna sǝt ɓǝɓichitfatwa, kǝ kǝnangndǝ reta. 37 Nifi thlarkǝ kit kǝ ɗar yara hanndǝkiketǝ’en ndatwa ǝnatkǝn nga waatwa paɗ nan mbǝlla kǝs indǝ’enhar, paɗ tira hanndǝkiketǝ’enwa ngu kahhandǝ nuhhwaniyuwa, mǝlan ma shiɗtǝ i nak keeke. 38 Nifi kahhang nuhhwani ngwantǝn shiɗ keeke, paɗ nifi kahhauchik nuhhwani ngwantǝn shiɗtǝ i kamkǝsǝ kaǝn.

39 Nuhnifǝ nakna kǝnda kǝ mbǝɗa sǝmahha ma tana mweehi tǝ shishingta. Ma mir sǝmahha, cheɗa kissha sahta kǝ kahhǝn chikawun yahtǝn, sokkǝn waat kǝ na hishnifǝkǝna i Lǝmwanda. 40 A thlandǝ shuɗengnǝhi, nan nat tǝ mbǝnfat kaǝn manan soktǝ ichitkǝn nda i natǝn. Paɗ la sikǝnfǝ Shemeɗa Farengnǝsi.