1 Rēn fok, ni nnom igang e ba bi sɔ izot makiyi. 2 Banet bi sot bafi ishim ice, bafi ishim itsɔm, bafi itsot kugwɔm, bafi iceshek ice, bafi itok, bafi kugbarak ice na batek bá, bafɛ́ vit ifeng, bafɛ́ vit inyim Adakunom 3 na bafɛ́ vit ishim. Bafɛ́ vit ifuut anɛn bafidang, bafi ibeseng iyerek bafidang, bafɛ́ vit iyit ice, bafi anyas, na bafi ifup ni ikyɛng fi i yet itek, 4 bafi ya kushi, bafɛ́ vit ira ikyɛng hwyɛ, bayɔng fi ikok ice mi ka ba shining. Bafi ishim ifoos ice bá nta aza ishim Adakunom, 5 ba tonong ice bá fok ba yet bafi kuus Adakunom, awɛt ni kusonong bá ba toon ni kukyem de. I bi won ikikak i da moon ni kuri banet bang awo.

6 Bakak ayɛt bá nɔɔs na nasa banet, na ba sɔ ice banyining yɔng fɛ́ da ba bɛ̀ agap ni kusot bá awo, fɛ́ anɛn mi ka ba sɔ ice, ayɛ bá mi shining ni nkyɔrɔk nmaane zizɛɛt. 7 Iba banyining e bang, kaaki izen ba se ayɛt imɛɛs akabɛs, awɛt da ba ne ba rēn atsak e awo. 8 Kyɔn tɛ aJanes, nɛ aJambiris fɛ́ ba nɔɔk aMusa kama, anɔng fɛ́ banet ban nɔɔk kama na atsak e. Iyiring ba yet nmaane, inɔɔk atsak bá sot ifɛ́ abap. 9 Awɛt ba da kyɛm ba ta yik-yik awo, nek ayɛt kizen hyiit kaangan da wat a di ishɔp bá dɛt-dɛt, kpaf ti fi ite na ba aJanes nɛ aJamberes.

10 Awɛt ngɔn aTimoti, yɔkɔnɔng i mi rēn itees hom, ni nse hom, ni ra ikyɛng fi in di bi ite iyɛ, ni inɔɔk atsak hom, nɛ kabɔk hom, ni ishim hom, ni ite gbinding hom. 11 Ngɔn rēn kuri izot ni mgbang yɔng fi in sɔ na Antakiya, ni aIkoniyum, nɛ aListira, ngma ne anɔng in te gbinding, aTisa di sheshek ayɛt na ngma. 12 Atsak e yet, ngma anet fe a shim a nye ikyɛng fɛ́ Adakunom shim ayɛt aYeso Kristi, i se gbing-gbing na a sɔ izot. 13 Awɛt bafi anyas, na bafi iwɔrɔsɔ banet bang risik ayɛt anyas bá, na ba wɔrɔsɔ bakak, na bakak ka ba wɔrɔsɔ bà.

14 Awɛt ngɔn, ya kashon ni ikyɛng fi imɛɛs, ni bereng inɔɔk atsak ngɔn gak, nek ngɔn rēn bayɔng fi i mi di mɛɛs ide ni bá. 15 Yiring neme fi ngɔn yet nggon, i mi tsang rēn Ifɛ̀ Kufumung Adakunom kufɛ́ ajɛrɛ. Kufumung e sak i di sot tsɛngtsɛng, i da tonong irèn isheshek fi ines ni irèn inɔɔk atsak na aYeso Kristi. 16 Ngma ijɛk Ifɛ̀ Kufumung Adakunom yet nsong Adakunom, i se yɛɛt nek itees atsak, ni igyɔng, ni nye nse, ni itees kusot kutabat, 17 nɔng ngma anet Adakunom bin sɛ ishining, na ma kana nye gyat nek kaakyɛ kuri kutomong kutek.