1 Kufumung kang ne ni imi, akɔk-ashon bafi ikuus, sak na afidang in aGayus fi in kushim na atsak.

2 Afidang in, in tsin ra awon fok nkyɔrɔk ni in tseng gyat ni ngɔn, ni i sɛ kukyang irɔm, kyɔn tɛ kabik ngɔn di tseng gyat. 3 Nek ikyɛng e di tɛrɛk iyɛ makiyi fɛ́ baruneng bakak bɛ́, ba nɔɔk kanu icɛɛt naton iya kashon ngɔn ayɛt atsak, ni kusot ngɔn ayɛt atsak. 4 Vit ikyɛng fi i di nesek itɛrɛk iyɛ fi iwat ki in fok nnon in tsin tseng ayɛt atsak.

5 Afidang in, ngɔn nye yɛɛt nek ite iyɛ fi i bɛ̀ na baruneng, ngma ne fɛ́ ba yet batsen ni ngɔn. 6 Ba mi tak itusung bafi ikuus azeng, kuri ishim fi ngɔn bɛ̀. Ngɔn da nye yɛɛt, ki i ya kashon ni i ka ba tes ni irèn, ni kuri nggɔn fi in se gyat ashon Adakunom. 7 Nek iwuru fɛ́ ba nyes, yet nek ishara ifɛ̀ naton iyerek aYeso, vit ikyɛng fɛ́ ba shashang ni mbɔk Ícɛn-iduk. 8 Nek anɔng, i se gyat ni in gbinding yit kuri banet yɔng ni mbɔk nfifaa, nɔng in da bin moon yit mbɔk ni iba na atsak.

9 Imi kin man jɛk kaban fumung sak ni itusung bafi ikuus, awɛt aDiyotrifis fɛ́ a tsɛsɛk ikɔs ashon, a rawu dang fok ifɛ̀ yit. 10 Nek anɔng kin in bɛ́, in bi tas nkyɔrɔk yɔng fɛ́ a ras, ni mbɔɔs fɛ́ a ras naton yit. Ikyɛng fi imak imaan e yet, a rawu dang shashang baruneng, na ro na bayɔng fɛ́ ba shim ba ka ba gbinding inye anɔng, na ka ba ro na narɔ itusung bafi ikuus.

11 Afidang in, i bi kuus yin aduk nggɔn awo, tit nggɔn ntek. Ngma anet fɛ́ a ras nggɔn ntek, a yet afɛ́ Adakunom, awɛt anet fɛ́ a ras aduk nggɔn, a mang di Adakunom awo. 12 Kaangan nye kucɛɛt kutek naton aDimitiriyus, atsak e ice wu, a mi tonong anɔng. Iyit ice yit in nyes yit kucɛɛt kutek naton wu, iyin irēn yin fok kanu icɛɛt yit yet atsak.

13 Imi bi nkyɔrɔk dot fi in shim in da jɛk e, awɛt in shim in te ina ni fumung nɛ ashi ijɛk awo. 14 Tit in bi ite iyɛ fok in bɛ́ bakat ku di ngɔn, ni in cɛɛt yit ayisi ne ayisi.

15 Won Adakunom na da nɔɔk kameneng iyɛ. Bafidang ngɔn fɛ́ ba se azeng, da te show. Ngɔn ki te show yit bafidang yit fɛ́ ba se azɔng bazizining ni iyerek bá.