Honhu ha kulavila nhambiko
1 "Kogongomanya honhu ha kulavila nhambiko kwa mbawo za msonobali. Honhu ha kulavila nhambiko aho howa ha mlaba, ulefu mita mbili na lobo na ugazi mita mbili na lobo na fudi yowa mita imwe na lobo. 2 Nagwe udite mbalati imwe kuli chila nzingo, azo mbalati zowa chinhu chimwe na honhu ha kulavila nhambiko, nagwe kohagubika honhu heng’ha kwa shaba. 3 Kogongomanya visaye vyake vya kusila mivu na mihuka na visaye vyake na mibano jake na visaye vya kuholela makala, na vinhu vyeng’ha kovidita kwa shaba. 4 Hamba kogongomanya utandawala wa shaba uwele na pete zine za shaba kuli nzingo zake. 5 Utandawala awo kouwika hafungo halinguzunguluta honhu ha kulavila nhambiko ubanzi wa hasi leka awo utandawala ufiche hagati ha honhu ha kulavila nhambiko. 6 Nagwe udite mipichilo ja msonobali kwa chiwalo cha honhu ha kulavila nhambiko, najo kojibakaliza shaba. 7 Na mipichilo ajo jokwinjizwa mli pete chila nzingo ya honhu ha kulavila nhambiko mhela wa kupika. 8 Kogongomanya honhu ha kulavila nhambiko kwa mbawo na hawe na lukweme mgati kota vila navyondikulajile kula kuchidunda.
Lugagala lwa ihema lya Nguluwi
(Kulawa 38:9-20)