Kɔm tii mfə gia wə Mɛlkisɛdɛk
1 Mɛlkisɛdɛk wələ nì kɔ ŋkuŋ wi Salɛm, chu num tii mfə gia wi Nyɔ wə wi kɔ Fwu wi Biɛiŋ Bichi wə. Ayaka a bi dzə num i jɔbi widɔkɔ wə, Ablaham laa jum7:1 Ablaham nì tsə i yɛlih Lɔt i kaŋ yi bəŋkuŋ bə̀ wə tumdzi bəŋkuŋ bədɔkɔ. Mɛlkisɛdɛk baŋsi bəh wi i jɔbi wə wi nì kwɛki, ka lɔɔ kimbɔiŋsi i wi wə. 2 Ablaham gaa biɛiŋ biə wi nì tumdzi i di bi jum wə bimbu jwɔfi nya kimbu kimu i biɛiŋ bichi i kintəəŋ i Mɛlkisɛdɛk. Fwu wi gia yə a Mɛlkisɛdɛk kɔ a, "Ŋkuŋ wi Chəŋ." Ayaka yɛli wi widɔkɔ num a, "Ŋkuŋ wi kimbɔiŋni" kɔm wi kɔ ŋkuŋ wi Salɛm.7:2 Salɛm kɔ a, "Kimbɔiŋni" a num yɛli wi Jɛlusalɛm, num bə təiŋ a wi juli. 3 Wi kaŋaki kə ba wi bəh nih wi nabə chwɔŋkijuŋ. Nɔni ki kaŋaki kə kin’yisi nabə kiŋgɔksi. Wi kɔ tii mfə gia wi kpamu aka Waiŋ Nyɔ.