1 Gia yələ mih dzakaki kɔ ŋkɔŋ ka mi wi Klistus. Mih nyiki kə ntəkə, Kiŋ’waka ki Baiŋni fəki shɔm yiŋ tɔbi a mih nyiki kə ntəkə. 2 Yi kɔ a mih kɔ bəh nshɛiŋ yimbum chu num bəh lɔli biə bi kaaki kə i shɔm yiŋ mə, 3 kɔm bwa bə nih bəŋ bə kwili bə̀ buku bɔ kɔ mwa mimu. Mih nəŋki lə na bəh ŋga a lɔiŋ dzə̂ i mih wə i gâali mih buku Klistus kɔm bɔ. 4 Bəni bələ kɔ bəni bə Islae bə̀ Nyɔ nì dzɔ bɔ fə a bɔ numki bwa bu, chusi kiŋkɔkni ki i bɔ, dzi miŋkaiŋ bəh bɔ, nya bənchi bu i bɔ kaŋ, chusi bɔ si bɔ kɔ i kɔ̂ksiki Nyɔ, fə biŋkaka bəh bɔ. 5 Bɔ kɔ bəni bə̀ bətii tii bəbɔ nì yisi chwɔŋkijuŋ kələ a num bəni bə Nyɔ bə̀ bə ni kiəki bɔ, Mbwili wə Nyɔ nì kaka jɔbi wə wi nì dzə ka mi wiwɔm, bə bwɔ wi num i chwɔŋkijuŋ ki bəni bələ wə. Bukumbɛiŋ nyâki kiŋkɔksi jɔbi wichi ki kaa kə i Mbɔiŋsi wə wi kɔ Nyɔ, wi kaŋa ŋga i biɛiŋ bichi wə. Yi nûm ayaka.

6 Yi mɔŋ a, gia yə Nyɔ nì kaka a yi laka kilɔlɔ, kɔm a kɔkə bəni bə Islae bəchi bə̀ bɔ kɔ bwa bə Islae bə ŋkɔŋ. 7 Ayaka a kɔkə tə bwa bəchi bə̀ bɔ buku i Ablaham wə bɔ kɔ bwa bu. Ayakalə, yi kɔ asi Nyɔ nì dzaka i Ablaham a,

"Akɔ Ayjik wə, wi bi bwɔki bwa bə̀ bɔ bi duki yɛli wa."

8 Yələ gia chusiki a, a kɔkə bwa bəchi bə̀ bɔ buku i Ablaham wə bɔ kɔ bwa bə Nyɔ. Akɔ bwa bə̀ Nyɔ nì kaka Ablaham yɛiŋ, bə dzɔki a bɔ kɔ bwa bə Ablaham. 9 Jɔbi wə Nyɔ nì fə kiŋkaka kələ dzaka a,

"A bi fiəni numki i jɔbi wələ wə i jia yi dzəni wə,

mih bi fiəni dzə, ma Sɛla bi kwati waiŋ nyukuni."

10 A mɔŋ dəkə a yələ shəŋ. Gia ka yələ nì num tə bəh Lɛbika wə tii bwa bu nì kɔ Ayjik wə tii bətii bəbukumbɛiŋ. 11,12 Na ka bə tsɛiŋki i bwɔ bimaŋsi biələ, na ka bə numki i fə gia yindzɔŋni yidɔkɔ nabə yichu, a nì kɔ num Nyɔ dzaka i nih wibɔ a,

"Kukuli bi nɔmki lə i waiŋ wi nchiŋ."

Nyɔ nì dzaka yakadəiŋ chusi a wi baaki mi biəli mba wi. Wi si baa kə biəli nɔm widɔkɔ wə mi fə. Wi baaki biəli num gia yə wi Nyɔ nəŋki. 13 Yi kɔ asi bə nyaka a,

"Yakɔb kɔ mih kɔŋ wi, mih baiŋŋ Ɛsau."

14 Si yi kɔ lə, bə kɔ i dzaka a nə? Yaka kɔ a Nyɔ fəki kə gia yi chəŋ ma? Yi mɔŋ yakadəiŋ! 15 Nyɔ nì dzaka i Muses a,

"Mih bi cham lə bəh nshɛiŋ i mi wə mih kɔŋki,

mih kwasi nshɛiŋ i wə mih kɔŋki."

16 Ayakadəiŋ, Nyɔ baaki kə mi biəli si mi wiwɔm nəŋki, nabə i bənɔm bə̀ wi nɔmki. Wi baaki kɔm nshɛiŋ yə wi kaŋaki i bəni wə. 17 Yələ gia kɔ asi bə nì nyaka tə i Kiŋwakti ki Nyɔ wə a Nyɔ nì dzakaki i fɛlɔ ŋkuŋ wi Ijib a,

"Mih yaksi wɔ ka ŋkuŋ, fwu wiwɔ num a,

mih ni chusiki ŋga biŋ i wɔ wə,

ka bəni bi tsə̂ bəh yɛli wuŋ i mbi wələ wichi wə."

18 Yələ gia ka chusi a Nyɔ kwasiki nshɛiŋ i mi wə wi nəŋki i kwasi nshɛiŋ i wi, nya fwu wi ləkəli i mi wə wi nəŋki a wi ləkəki bəh fwu.

19 Mi widɔkɔ kɔlə i dza bikə i mih a, "A kabə num yakadəiŋ, Nyɔ kabə kpiki bəh bəni kɔm nə a? Mi wə wi kɔ i nəiŋ gia yə Nyɔ nəŋki a yi num, akɔ ndə a?" 20 Mi ma bîkə yakadəiŋ. Akɔ na winaiŋ mi wiwɔm wə wi kɔ i sini bəh Nyɔ a? Mi kɔlə i mwəm fiɛŋ bəh fiəŋ ma fi ni chu bikə i wi a, "Wɔ mwəm mih lə kɔm nə a?" 21 Mi wə wi mwəmki mishwali kaŋaki lə ŋga i fiəŋ wiwɔ bɛiŋ i chum kaŋ yi fiəŋ i mwəm biɛiŋ yɛiŋ chi chi, fidɔkɔ num fiə fi kaŋaki nɔm wimbum, fidɔkɔ num fiə fi chiŋ kɔ.Mishwali 22 Yikɔ a liŋ si Nyɔ fəki. Wi nì nəŋki i chusi shɔm yi yi bɔksini i bəni, chu fə a bəni kîə ŋga bi. Ayakalə, wi nì lansi kaŋa shɔm bəh bəni bə̀ bɔ nì fəki shɔm bɔkɔ wi, bəh bə̀ bə nì kɔ i kaasi bɔ num kaasini. 23 Wi nì fə yakadəiŋ i chusi mbum bi bimbum biə bi kɔ i bəni bə̀ wi kwasiki nshɛiŋ i bɔ. Bəni bələ kɔ bə̀ wi nì kɛiŋsi jiə na ka yi dzə num a bɔ bi kwati lə mbum biwɔ. 24 Akɔ na bukumbɛiŋ bəni bəwɔ bə̀ wi bɔɔŋ. A kɔbi a Bəju shəŋ. Bəni bə̀ bɔ kɔkə Bəju kɔlə tə yɛiŋ. 25 Akɔ na yi yə Nyɔ dzaka i Kiŋwakti ki mi wi wi ntum wə Ɔsia a,

"Bəni bə̀ bɔ kɔkə bəni bəŋ,

Mih ni bɔɔŋki bɔ a ‘Bəni bəŋ.’

Ayaka bə̀ mih ni kɔŋki kə bɔ,

mih ni bɔɔŋki bɔ a ‘Shɔm yiŋ.’"

26 "Ayaka a fɛiŋ i di biə Nyɔ si dzaka i bəni bəwɔ a,

‘Mbɛiŋ kɔkə bəni mbəŋ’,

Yi kɔ a bə ni bɔɔŋki bɔ a,

‘Bwa bə Nyɔ wə wi kaŋaki nɔni.’"

27 Isaya mi wi ntum wi Nyɔ nì də tə kɔm bəni bə Islae ka dzaka a,

"Na ayaka si bəni bə Islae duki lə,

num aka mishambu mi kinchwɔ kimbum,

a bi bɔiŋki a bədɔkɔ i bɔ wə twɛsi.

28 Yi num a Nyɔ bi dza akisəkə wi lɔ ŋgəkə

i nshwaiŋ yələ yichi wə wi kaasi biɛiŋ bichi."

29 Wi Isaya nì kɔ wi dzaka lɔ a,

"A nì mɔŋ a, Bah Nyɔ wə wi kaŋaki ŋga bichi

bɛsi bwa i chwɔŋkijuŋ kibukumbɛiŋ wə,

ma bukumbɛiŋ fiəni chu lɔ aka kwili wimbum Sɔdɔm

bəh wi Gɔmɔla."

30 Si yi kɔ lə, bukumbɛiŋ ki dzakaki a nə? Bukumbɛiŋ ki dzakaki a bəni bə̀ bɔ kɔkə Bəju bə̀ bɔ nì ka mɔmsi dəkə i num chəŋ i Nyɔ nshiŋ, bɔ num lɔ i liə chəŋ i Nyɔ nshiŋ kɔm shɔm yə bɔ jiə i wi. 31 Ayakalə, bəni bə Islae bə̀ bɔ nì mɔmsi i numki chəŋ i Nyɔ nshiŋ biəli num dzəh yə bənchi nəŋki, bɔ nì ka biəli i dzə num chəŋ i wi nshiŋ. 32 A nì kɔ kɔm nə? Akɔ kɔm bɔ nì ka mɔmsi i biəli dzəh yə bɔ kɔ i jiə shɔm i Nyɔ. Bɔ nì kwakaki a gia yə yi kɔ fə a mi num chəŋ i Nyɔ nshiŋ kɔ num bənɔm bə̀ wəmaka fəki. Bɔ fə yakadəiŋ ka ndamti i təh wə bəni ndamtiki i yɛiŋ bɛiŋ. 33 Təh wələ kɔ wə bə nyaka kɔm wi a,

"Mbɛiŋ tsɛ̂iŋ, mih jiə təh i kwili wi Sayɔŋ wə,

a num təh wə bəni bi ndamtiki yɛiŋ wə.

A num biaŋa wə bəni bi gbɔyiki yɛiŋ wə.

Ayakalə, mi wə wi jiə shɔm i wi wə, bi chu numki kə i ŋgəmni wə."