1 ✝ଇସ୍‌ପର୍ ଆନେକେ ଉଡ଼ି ଆଲାଦ୍ ଡିଙ୍ଗ୍‌ଡିଙ୍କେ ଇକୁଡ଼ା ଚିନ୍ତା ଡିଂକେଲାପା । ନେନେ ଆଡ଼ାତ୍ରା ମେଁନେ ଆଲାଦ୍ ଅଃକେନ୍ ଜାବର୍ ଜେ ନେ ମେଁନେ ଉଙ୍ଗ୍‌ଡେ ଡାଗ୍‌ଚେ ମ୍ନିଲେଃକେ । ସତେଆ ନେନେ ମେଁନେ ଉଙ୍ଗ୍‌ଡେ ତେସା ମଞ୍ଚ୍‌ପୁର୍‌ ଇସ୍‌ପର୍‌କେ ମ୍ୟା ଆଲେଃଲା ଆନେକେ ଡିଗ୍ ସାମୁଆଁ ଆୟାକେ ଣ୍ଡୁ । 2 ଅ ନିଜର୍ ମୈତର୍‌ଇଂ, ଏବେ ନେ ସାପା ଇସ୍‌ପର୍‌ନେ ଉଙ୍ଗ୍‌ଡେ, ମାତର୍‌ ଇଡ଼ିଂଡେ ମେଃନେ ନେଡିଙ୍ଗ୍‌ଏ, ଏନ୍‌ ସାମୁଆଁ ବାରି ତାର୍ ଙ୍କାରେ । ଅଃକେନ୍ ମାତର୍‌ ନେ ମ୍ୟା ନେଲେଃ: ଉଡ଼ିବେଲା କ୍ରିସ୍ଟ ଆର୍‌ମୁଇଂତର୍‌ ପାଙ୍ଗ୍‌ଏ, ନେ ମେଁନେ ସତେଆଃ ରୁପ୍‌ କେଚେ ମେଁନେ ସୁଗା ନେଡିଙ୍ଗ୍‌ଏ । 3 ଜାଣ୍ଡେଇଂ କ୍ରିସ୍ଟନେ ଡାଗ୍ରା ଏନ୍ ଆସା ବାଆର୍‌କେ, ମେଇଂ କ୍ରିସ୍ଟନେ ରକମ୍‌ ନିଜେକେ ପବିତ୍ର ଆଃଡିଙ୍ଗ୍‌ଚେ ବଆର୍‌ଏ ।

4 ଜାଣ୍ଡେ କି ପାପ୍ ଡିଙ୍ଗ୍‌ଏ ମେଁ ଇସ୍‌ପର୍‌ନେ ଆଦେସ୍‌ ଅମାନି ଡିଙ୍ଗ୍‌ଏ, ଡାଗ୍ଲା ପାପ୍‌ନେ ଅର୍‌ତ ଡିଙ୍ଗ୍‌କେ ଆଦେସ୍‌ ଅମାନି । 5 ✝ଏନ୍ ପେଇଂ ମ୍ୟା ପେଲେଃକେ ଜେ ନେଁଇଂନେ ପାପ୍ ଡୁଂଡ ନ୍‌ସା କ୍ରିସ୍ଟ ପାଙ୍ଗ୍‌ଲେଃକେ ବାରି ମେଁନେ ଡାଗ୍ରା ପାପ୍ ଆଲେଃକେ ଣ୍ଡୁ । 6 ଜାଣ୍ଡେ କି ମେଁନେ ଡାଗ୍ରା ଲେଃଏ ମେଁ ପାପ୍ ଆଡିଙ୍ଗ୍ ଣ୍ଡୁ; ଜାଣ୍ଡେ କି ପାପ୍ ଡିଙ୍ଗ୍‌ଏ ମେଁ ଆମେକେ ଅଃନା ଆକେ ଣ୍ଡୁ ଣ୍ଡୁଲା ଆମେକେ ଆମ୍ୟା ଣ୍ଡୁ ।

7 ଏ ଗଡ଼େଇଂ ଜାଣ୍ଡେ ଅପେଃକେ ବାୟା ଆରାଡିଙ୍ଗ୍‌ଲେ; ଜାଣ୍ଡେ ସତ୍‌ କାମ୍ ଡିଙ୍ଗ୍‌ଏ କ୍ରିସ୍ଟ ଡିରକମ୍ ଦରମ୍‌ ଲେଃକେ ମେଃଡିଗ୍‌ ଦେତ୍‌ ରକମ୍‌ ଦରମ୍ ଡିଙ୍ଗ୍‌ଏ । 8 ଜାଣ୍ଡେ ପାପ୍ ଡିଙ୍ଗ୍‌ଏ ମେଁ ସୟତାନ୍‌ ବାନ୍‌ ଜନମ୍ ଡାଗ୍ଲା ସୟତାନ୍‌ ଅଃସେବାନ୍ ପାପ୍ ଡିଙ୍ଗ୍ ପାଙ୍ଗ୍‌କେ । ସୟତାନ୍‌ନେ କାମ୍ ନଷ୍ଟ ଆଡିଙ୍ଗ୍ ନ୍‌ସା ଇସ୍‌ପର୍ ଉଙ୍ଗ୍‌ଡେ ଜନମ୍ ପାଙ୍ଗ୍‌କେ ।

9 ଜା ଇସ୍‌ପର୍‌ନେ ରେମୁଆଁ ମେଁ ପାପ୍ ଅଃନା ଆଡିଙ୍ଗ୍ ଣ୍ଡୁ । ଡାଗ୍ଲା ମେଁ ଇସ୍‌ପର୍‌ନେ ଗଡ଼େଅ ବାରି ମେଁ ଇସ୍‌ପର୍ ବାନ୍ ଜନମ୍ ଡିଙ୍ଗ୍‌ଲେଃକେସା ପାପ୍ ଡିଙ୍ଗ୍ ଆୟା ଣ୍ଡୁ । 10 ଏନ୍‌ବାନ୍‌ ଜାଣ୍ଡେ ଇସ୍‌ପର୍‌ନେ ଉଙ୍ଗ୍‌ଡେ ଡିଙ୍ଗ୍‌ଏ ବାରି ସୟତାନ୍‌ନେ ଉଙ୍ଗ୍‌ଡେ ଡିଙ୍ଗ୍‌ଏ ଆକେନ୍ ତ୍ନାଏ; ଜାଣ୍ଡେ କି ଦରମ୍‌ କରମ୍‌ ଆଡିଙ୍ଗ୍ ଣ୍ଡୁ ଣ୍ଡୁଲା ବିସ୍‌ବାସି ବୟାଁ ତନାକେ ଆଲାଦ୍ ଆଡିଙ୍ଗ୍ ଣ୍ଡୁ ମେଁ ଇସ୍‌ପର୍‌ନେ ବାନ୍ ଜନମ୍ ଣ୍ଡୁ ।

11 ✝ମୁଇଂଜା ବିନ୍ ମୁଇଂଡାକେ ଆଲାଦ୍ ଡିଂନେ ଦର୍‌କାର୍ ଆକେନ୍ ସାମୁଆଁ ଅଃସେବାନ୍‌ ଅଁନେଲେଃକେ । 12 ପାପ୍ ଆତ୍ମାନେ ଗଡ଼େଅ ଜେ କୟିନ ମେଁନେ ରକମ୍‌ ଆଡିଙ୍ଗେପା ମେଁ ନିଜର୍ ବୟାଁକେ ବାଗୁଏଃକେ; ବାରି ମେଁ ଆମେକେ ମେନ୍‌ସା ବାଗୁଏଃକେ ? ଡାଗ୍ଲା ଦେକ୍‌ ଜେ ମେଁନେ କାମ୍ ପାପ୍ ଲେଃକେ ବାରି ମେଁନେ ବୟାଁନେ କାମ୍ ଦରମ୍ ଲେଃକେ ।

13 ଏ ନେଙ୍ଗ୍‌ନେ ବୟାଁ ତନାଇଂ ମଞ୍ଚ୍‌ପୁର୍‌ନେ ରେମୁଆଁ ଆପେକେ ଇଙ୍ଗ୍‌ଚେଲା ଆକ୍‌ବାନ୍ କାବା ଆଡିଙ୍ଗ୍‌ପା । 14 ✝ଜଦି ନେ କିସ୍‌ଟ ବୟାଁ ତନାଇଂକେ ଆଲାଦ୍ ଡିଂନେଡିଂକେ ନେ ମ୍ୟା ନେଲେଃକେ ଜେ ନେ ଗୁଏନେ ଜିତେଚେ ଜିବନ୍ ବାନେଲେଃକେ । ଜାଣ୍ଡେ ଆଲାଦ୍ ଆଡିଂ ଣ୍ଡୁ ମେଁ ଏବେ ଡିଗ୍ ଗୁଏକ୍ନେ ସମାନ୍‌ । 15 ଜାଣ୍ଡେ ମେଁନେ ବୟାଁଣ୍ଡେକେ ଇଙ୍ଗ୍‌ଚେଲା ମେଁ ମୁଇଙ୍ଗ୍ ରେମୁଆଁ ବାଗୁଏଃଣ୍ଡ୍ରେ । ରେମୁଆଁ ବାଗୁଏଃଣ୍ଡ୍ରେ ମାଡାନେ ଜିବନ୍‌ ଆଲେଃ ଣ୍ଡୁ ଡାଗ୍‌ଚେ ପେ ମ୍ୟାପେଲେକେ । 16 ଜିସୁ ନେନ୍‌ସା ନିଜର୍ ପାରାନ୍ ବିଃକ୍ନେ ବାନ୍‌ ନେ ଆଲାଦ୍ ଗିଆନ୍‍ ବାନେଲେଃକେ । ନେ ଡିଗ୍ ନିଜର୍ ବୟାଁଇଂ ନ୍‌ସା ପାରାନ୍ ବିନେ ଦର୍‌କାର୍ । 17 ଜାଗତିକ ବାବ୍‌ରେ ଜଦି ମୁଇଂ ସାକାର୍‌ ରେମୁଆଁ ନିଜର୍ ବୟାଁନେ ଅସ୍‌ବିଦା ଅବସ୍ତା କେଚେ ଡିଗ୍ ଆମେକେ ସାଇଜ ଆଡିଙ୍ଗ୍ ଣ୍ଡୁ ମେଁନେ ଗର୍‌ବେନିଆ ପର୍‌ମେସର୍‌ନେ ଆଲାଦ୍ ଣ୍ଡୁ । 18 ଗଡ଼େଇଂ ନେନେ ଆଲାଦ୍ ସାମୁଆଁନିଆ ବାରି ସାମୁଆଁ ଦ୍ରିଗ୍‌ନିଆ ତ୍ନାଲା ଜାବର୍ ଆଡିଙ୍ଗ୍ ଣ୍ଡୁ; ଆମେକେ କାମ୍‌ନ୍ନିଆ ଆରି ସତ୍‌ ବାବ୍‌ରେ ଆଲାଦ୍‌ ଆସୁଏ ଲେଃକେ ?

19 ଆତେନ୍‌ ନେଡିଂଲା, ନେ ଜେ ସତ୍‌ନେ ଗଡ଼େଇଂ, ଆକେନ୍‌ ନେମ୍ୟାଃଏ । 20 ବାରି ମେଃଡିଗ୍‌ ବିସୟ୍‌ରେ ନେଁଇଂନେ ଗାଗ୍‌ଡ଼େ ଆନେକେ ଦସ୍ ଆଃଡିଙ୍ଗ୍ଏ ଆତେନ୍‌ ବିସୟ୍‌ରେ ଆତ୍‌ବାନ୍ ମେଁନେ ଡାଗ୍ରା ପେଇଂନେ ଗାଗ୍‌ଡ଼େ ନିମାଣ୍ଡା ଆଡିଙ୍ଗ୍ ୟାଏ; ଡାଗ୍ଲା ଇସ୍‌ପର୍ ନେଁଇଂନେ ଗାଗ୍‌ଡ଼େ ବାନ୍ ମ୍ନା ବାରି ମେଁ ସାପା ମ୍ୟାଏ । 21 ଅ ନିଜର୍ ମୈତର୍‌ଇଂ ନେ ଗର୍ବେ ଜଦି ଆନେକେ ଦସି ଆଡିଙ୍ଗ୍ ଣ୍ଡୁ ତେଲା ପର୍‌ମେସର୍‌ନେ ଡାଗ୍ରା ନେଁଇଂନେ ସାପା ଆସା ଲେଃକେ । 22 ବାରି ଆମେକେ ମେଃନେ ସାଲ୍ୟାଏ, ମେଁ ଆତାନ୍‌ ଦାନ୍‌ ଡିଙ୍ଗ୍‌ଏ, ଡାଗ୍ଲା ନେ ମେଁନେ ଆଦେସ୍‌ ପାଲନ୍‌ ନେଡିଙ୍ଗ୍‌ଏ ବାରି ମେଁନେ ମ୍‌ମୁଁଆଃନ୍ନିଆ ଆଣ୍ଡିନେ ନିମାଣ୍ଡା ଆତାନ୍‌ ଡିଙ୍ଗ୍‌ନେଡିଙ୍ଗ୍‌କେ । 23 ✝ନେନେ ଆଡ଼ାତ୍ରା ମେଁନେ ଆଦେସ୍ ଡିଂଡିଂକେ: ମେଁନେ ଉଂଡେ ଜିସୁ କିସ୍‌ଟନେ ମ୍ନିନ୍ନିଆ ବିସ୍‌ବାସ୍‌ ଡିଂନେ ବାରି କିସ୍‌ଟନେ ଆଦେସ୍‌ ଅନୁସାରେ ମୁଇଂଜା ବିନ୍ ମୁଇଂଜାକେ ଆଲାଦ୍ ନେଃଡିଂ । 24 ଜାଣ୍ଡେ ମେଁନେ ଆଦେସ୍‌ ପାଲନ୍‌ ଡିଙ୍ଗ୍‌ଏ, ମେଁ ମେଁନେ ଡାଗ୍ରା ଲେଃଏ ବାରି ମେଁ ମେଁ ଡାଗ୍ରା ଲେଃଏ; ବାରି ମେଁ ଡିଗ୍ ନେଁଇଂନେ ଡାଗ୍ରା ଲେଃଏ ଏନ୍ ନେ ମେଁ ବିଃବକ୍ନେ ଆତ୍ମାନେ ବାନ୍ ମ୍ୟାନେଡିଙ୍ଗ୍‌କେ ।