ସାସ୍ତର୍ ଆରି ମେଣ୍ଡାତୁର୍ତ୍ୟାରେ
1 ସିଂଆସନନ୍ନିଆ କଲେଃକ୍ନେ ରେମୁଆଁନେ ଞ୍ଚଂତିନ୍ନିଆ ନିଂ ମୁଇଂ ବାୱିର୍ ସାସ୍ତର୍ ଙ୍କେକେ; ମେଁନେ ମ୍ବାର୍ପାକା ଗ୍ନୁଆର୍ ଲେଃଗେ ଆରି ଗୁକ୍ଲିଗ୍ ସିଲ୍ନ୍ନିଆ ଆତେନ୍ ଚିନ୍ ଡିଂଲେଃଗେ । 2 ବାରି ନିଂ ଙ୍କେକେ ମୁଇଂ ମ୍ନାଃ କିତଂଦୁତ୍ ଜବର୍ ୱାସାର୍ଚେ ବାସଙ୍ଗ୍ଡିଂକେ: "ସିଲ୍ଇଂ ପାକ୍ଚିଚେ ଆକେନ୍ ସାସ୍ତର୍କେ ରଃଡ଼ା ନ୍ସାଃ ଜାଣ୍ଡେ ସତ୍ ରେମୁଆଁ ଲେଃଲା ତାର୍ଚେ ପାଙ୍ଗ୍ଲାପା ।" 3 ମାତର୍ ଆତେନ୍ ସାସ୍ତର୍ ତଃଚେ ଆତ୍ଅରିଆ ମେଃନେ ଗ୍ନୁଆର୍ଲେଃକେ ଲଃନ୍ସା କିତଂନ୍ନିଆ, ଦର୍ତନିନ୍ନିଆ କି ପାତାଲ୍ନ୍ନିଆ ଜାଡିଗ୍ ଆତାର୍ଆର୍କେ ଣ୍ଡୁ । 4 ସାସ୍ତର୍ ରଃଡ଼ାଚେ ଆତ୍ଅରିଆ ମେଃନେ ଗ୍ନୁଆର୍ଲେଃକେ, ଲଃନ୍ସାଃ ଜାଣ୍ଡେଃ ମୁଇଂଡା ଡିଗ୍ ନିମାଣ୍ଡା ରେମୁଆଁ ଆମିଲେକେସା ନିଂ ଦୁକ୍ ଡିଂଚେ ଅଃନେ ଆରାମ୍ ଣ୍ଡିଂକେ । 5 ତେନ୍ଇଡ଼ିଂ ବୟସ୍କ ନେତାଇଂ ବିତ୍ରେବାନ୍ ମୁଇଂଡା ଆନିଂ ସାନ୍ତି ଆଡିଂଚେ ବାସଙ୍ଗ୍କେ "ଆଅଃଗେ କେଲା ! ଦାଉଦନେ ମ୍ନା ବଂସଇଂ ଜିହୁଦା ରେମୁଆଁନେ ସିଂଅ ଜିତେଚେ ପାଙ୍ଗ୍ଲେଃଆର୍କେ; ମେଁ ଆକେନ୍ ଗୁକ୍ଲିଗ୍ ଜାକ ସିଲ୍ ପାକ୍ଚିଚେ ସାସ୍ତର୍ ରଃଡ଼ାନ୍ସା ବପୁ ଲେଃକେ ।"
6 ତେନ୍ଇଡ଼ିଂ ସିଂଆଁସନନେ ମଜେ ସିସେନେ ଅଁକ୍ଲିଗ୍ ଜିବ୍ ଆରି ବୟସ୍କ ନେତାଇଂନେ ଡାଗ୍ରା ମୁଇଂ ଉଂମେଣ୍ଡାକେ ତୁଆଁ ଲେଃକ୍ନେ ଙ୍କେକେ । ମେଣ୍ଡାତୁର୍ତ୍ୟାରେ ଗୁଏ ଲେଃକ୍ନେ ସୁଗୁଆ ମନେ ଡିଂଆର୍କେ । ମେଁନେ ଗୁକ୍ଲିଗ୍ ଡିରଂ ଆରି ଗୁକ୍ଲିଗ୍ ମ୍ମୁଁଆଃ ଲେଃଗେ । ଆତେନ୍ ମ୍ମୁଆଃଇଂ କ୍ଲିଗ୍ ଦର୍ତନିନ୍ନିଆ ବେବକ୍ନେ ଇସ୍ପର୍ନେ ଗୁକ୍ଲିଗ୍ ଆତ୍ମା ।