14 ତେନ୍‌ ଇଡ଼ିଂ ବିନ୍‍ ଗୋମ୍ୱାର୍ କ୍ଲିଗ୍ ପ୍ରେରିତ୍‌ ସିସ୍‍ଇଂ ଏତେ ପିତର୍‍ ତୁଆଁଚେ କିରଚେ ବାସଙ୍ଗ୍‍କେ, "ଏ ଜିଉଦି ରେମୁଆଁଇଂ ଆରି ଯିରୂଶାଲମନ୍ନିଆ ବାସା ଡିଙ୍ଗ୍‍ଆର୍‍କ୍ନେ ବଦ୍ର ମଣ୍ଡଲି ନେଙ୍ଗ୍ ବ୍ନାଲିର୍‍ ଅଁପା, ନେଙ୍ଗ୍‍ ଆକେନ୍‍ ସାମୁଆଁ ଆଦ୍ରିଗ୍‍ଚେ ବାସଙ୍ଗ୍‍ମ୍ୱିଏ । 15 ପେ ଜା ଅନ୍‍ମାନ୍‍ ଡିଙ୍ଗ୍‍ପେଡିଙ୍ଗ୍‍କେ, କିମେଇଂ ଉଗ୍‍ସାରେ । ଣ୍ଡୁ କିମେଇଂ ଉଗ୍‍ସାରେ ଣ୍ଡୁ ମାତର୍‍ ଏବେ ବେଲା ଞ୍ଜିର୍‍ ନଟା ଡିଙ୍ଗ୍‍ଲେକେ । 16 ମାତର୍‍ ବାବବାଦି ଯୋୟେଲ୍‍ ଆଣ୍ଡିନେ ଗଟ୍‍ନାନେ ବିସୟ୍‌ରେ ବବିସତ୍‍ ସାମୁଆଁ ବାସଙ୍ଗ୍‍ବଗେ ଆକେନ୍‍ ଦେତ୍‍ରକମ୍‍ ମୁଇଂ ଗଟ୍‍ନା ।" ଯୋୟେଲ୍‍ ବାସଙ୍ଗ୍‍ବଗେ;

17 ଇସ୍‍ପର୍‍ ବାସଙ୍ଗ୍‍ମ୍ୟାଃକେ: "ଡାନେ ଦିନାକେଲା ଆକେନ୍‍ ସାପା ଗଟେଏ:

ନେଙ୍ଗ୍‍ ସାପାରେନେ ଆଡ଼ାତ୍ରା ନେଙ୍ଗ୍‍ନେ ଆତ୍ମାକେ କିଗ୍ ମ୍ବିଏ ।

ପେନେ ଗୋ ଗିସିଆଇଂ ବାବବାନି ବାସଙ୍ଗ୍‍ଆର୍‍ଏ ।

ପେନେ ଙ୍ଗିରେଇଂ ଦିବ୍ୟ ଦର୍‍ସନ୍‍ ବାଆର୍‍ଏ

ବାରି ପେନେ ମ୍ନାରେଇଂ ମୁସୁଡ଼ିଙ୍ଗ୍‍ କେଆର୍‍ଏ ।