1 ଇହୁଦି‍ଇଂନେ ସାସ୍ତର୍‌ ସତ୍ ବିସ‍ଏନେ ମୁଇଙ୍ଗ୍ କ୍ଲିଗ୍‌ଡା ଆରି ଟିକ୍ ଚିତ୍ର ଣ୍ଡୁ, ଆକେନ୍ ସେନୁଗ୍‌ ମ୍ନା ବିସ‍ଏନେ ମୁଇଙ୍ଗ୍ ବୁଲ୍ ତ୍ନାକ୍ନେ ଚିନା ମାତର୍‌ । କାଲାଆଃ ମେମୁଆଁକେ ମେମୁଆଁ ଆତେନ୍‌ ମୁଇଙ୍ଗ୍ ରକମ୍ ବଲିଦାନ୍ ଅପେଃ ଡିଂକେ । ଜାଣ୍ଡେଇଂ ଇସ୍‌ପର୍‌ନେ ଡାଗ୍ରା ପାଙ୍ଗ୍‌ଆର୍‌ଏ ସାସ୍ତର୍‌ନେ ଆତେନ୍‌ ସାପା ବଲିପୁଜା ବାନ୍‌ ମେଇଂ ମେଃନେ ନିମାଣ୍ଡା ଡିଂ ୟାଡିଂଆର୍‌କେ ? 2 ଡେକ୍‌ରକମ୍ ବାବ୍‌ରେ ଇସ୍‌ପର୍‌କେ ପାର୍‌ତନା ଡିଂଣ୍ଡ୍ରେ ଜଦି ସତ୍‌ରେ ପାପ୍‌ବାନ୍ ନିମାଣ୍ଡା ଡିଂପାୟାଆର୍ ତେଲା ମେଇଂ ଆରି ନିଜ୍‌କେ ପାପି ଡାଗ୍‌ଚେ ମନେ ଆଡିଂଆର୍‌ ଣ୍ଡୁ ବାରି ସର୍‌ତେ ବଲିପୁଜାନେ ସାରାସାରି ପାଗଟେ । 3 ମାତର୍‌ ଡେତ୍‌ରକମ୍ ମାଡିଂଚେ ମେମୁଆଁକେ ମେମୁଆଁ ପୁଜାବଲି ଅପେଃନେ ବାନ୍‌ ରେମୁଆଁକେ ମୁଇଙ୍ଗ୍ ମେଁନେ ପାପ୍ ବିସ‍ଏ ମନେଏତେ ଆଡିଂ ବିଡିଙ୍ଗ୍‌କେ । 4 ଡାଗ୍‌ଲା ଅରେଃ ଆରି ଗିମିଃନେ ମିଆଁ ଅଃନାଡିଗ୍ ପାପ୍ ଗ୍ୱେଡ଼ିଆ ଡିଂଆୟା ଣ୍ଡୁ ।

5 ଆତେନ୍‌ସା କ୍ରିସ୍ଟ ଦର୍‌ତନିନ୍ତୁଗ୍ ପାଙ୍ଗ୍‌ନେ ସେନୁଗ୍‌ବାନ୍ ଇସ୍‌ପର୍‌କେ ବାସଙ୍ଗ୍‌ବଗେ:

"ବଲିପୁଜା ଆରି ପୁଜା ଜିନିସ୍‌ନ୍ନିଆ ନାନେ ଇକ୍‌ଚା ଣ୍ଡୁ

ମାତର୍‌ ପେ ନିଂନେ ନ୍‌ସା ମୁଇଙ୍ଗ୍ ଗାଗ୍‌ଡ଼େ ଆରେ ପେବକେ ।

6 ପାପ୍ କେମା ନ୍‌ସା ନା ବେଦି ଆଡ଼ାତ୍ରା ହମ୍‌ ପୁଜାନ୍ନିଆ

ଣ୍ଡୁଲା ପସୁ ବଲିନ୍ନିଆ ଇକ୍‌ଚା ଣ୍ଡୁ ।

7 ତେନ୍‌ସା ନିଂ ମ୍ବାସଙ୍ଗ୍‌କେ

‘ଅ ଇସ୍‌ପର୍ ନିଂ ବିସ‍ଏରେ ସାସ୍ତର୍‌ ଉଲିଆନ୍ନିଆ ଡିରକମ୍ ଗ୍ନୁଆର୍ ଲେଃକେ

ନିଂ ଡେତ୍‌ରକମ୍ ନାନେ ଇକ୍‌ଚା ପୁରନ୍ ଡିଂନେସା ରାଜି ନ୍ଲେଃକେ ।’"

8 ପୁର୍‌ତୁମ୍ ମେଁ ବାସଙ୍ଗ୍‌ବଗେ, "ନାଁ ରେମୁଆଁନେ ପାପ୍ କେମା ନ୍‌ସା ବଲିପୁଜା ଣ୍ଡୁଲା ପୁଜା ଜିନିସ୍ ଣ୍ଡୁଲା ବେଦି ଆଡ଼ାତ୍ରା ହମ୍‌ ପୁଜା ଚାଏଁନାଡିଂକେ ଣ୍ଡୁ; ତେନ୍ ସାପା ଆନାକେ ସାନ୍ତି ଡିଂଆୟା ଣ୍ଡୁ ।" ଏନ୍‌ସାପା ବଲିପୁଜା ସାସ୍ତର୍‌ ଅନୁସାରେ ଆଃଡିଙ୍ଗ୍‌ଲା ଡିଗ୍ ମେଁ ଡେକ୍‌ରକମ୍ ବାସଙ୍ଗ୍‌ବଗେ । 9 ତେନ୍ଇଡ଼ିଂ ମେଁ ବାସଙ୍ଗ୍‌ବଗେ "ଅ ଇସ୍‌ପର୍ ନିଂ ନାନେ ଇକ୍‌ଚା ପୁରନ୍ ଡିଂନେସା ତିଆର୍ ଡିଂନ୍ଲେଃକେ ।" ଆକେନ୍‌ସା ଇସ୍‌ପର୍ ଆକେନ୍ ସାପା ପୁଜା ଆମାନେଚେ ଆତେନ୍‌ ବାଦୁଲ୍ କ୍ରିସ୍ଟନେ ପୁଜା ମାନେଃ ଆର୍‌କେ । 10 ଜିସୁ କିସ୍‌ଟ ମୁଇଂତର୍ ମାତର୍‌ ଆରି କାଲାଆଃ ନ୍‌ସା ନିଜର୍ ଗାଗ୍‌ଡ଼େକେ ଅପେଃଚେ ଇସ୍‌ପର୍‌ନେ ଇକ୍‌ଚା ପୁରନ୍ ଡିଂବକ୍ନେସା ମେଁନେ ଆତେନ୍‌ ରକମ୍‌ନେ କାମ୍ ନ୍‌ସା ନେ ସାପାରେ ପାପ୍‌ବାନ୍ ପବିତ୍ର ଡିଂନେଲେଃକେ । ବେଦି ଆଡ଼ାତ୍ରା ସୁଆନ୍ନିଆ ବଲି ପୁଜା

11 ଜିହୁଦି ପୁଜାରି‍ଇଂ କାଲାଆଃ ନିଜର୍ କାମ୍ ପୁରନ୍ ଡିଂଚେ ଆତେନ୍‌ ମୁଇଙ୍ଗ୍ ରକମ୍ ପୁଜା ପ୍ରେକ୍‌ପ୍ରେକ୍ ଅପେଃ ଡିଂମ୍ୟାଆର୍‌କେ ମାତର୍‌ ଏନ୍‌ସାପା ପୁଜା ବାନ୍‌ ଅଃନାଡିଗ୍ ପାପ୍ ଗ୍ୱେଡ଼ିଆ ଡିଂଆୟା ଣ୍ଡୁ । 12 ମାତର୍‌ କ୍ରିସ୍ଟ ପାପ୍‌ନେ ଆତେନ୍‌ ରକମ୍‌ନେ କାମ୍ ସୁଗୁଆ ଜୁଗ୍‌ଜୁଗ୍ ନ୍‌ସା ମୁଇଙ୍ଗ୍ ମାତର୍‌ ବଲିପୁଜା ଅପେଃ ବ‍ଆର୍‌କେ । ତେନ୍ଇଡ଼ିଂ ମେଁ ୱେଚେ ଇସ୍‌ପର୍‌ନେ ବେସ୍ୟା ପାକା କଲେଃକେ । 13 ଇସ୍‌ପର୍ ମେଁନେ ସତ୍ରୁଇଂକେ ଞ୍ଚ‍ ଆଲ ମାରାଡିଂନେ ଜାକ ମେଁ ଆତ୍‌ଅରିଆ ଉର୍ ଲେଃକେ । 14 ଜାଣ୍ଡେ ପାପ୍‌ବାନ୍ ସ୍ଲଚେ ପବିତ୍ର ଡିଂଲେଃଆର୍‌କେ ଆତେନ୍‌ ମୁଇଂ ମାତର୍ ପୁଜା ବାନ୍‌ ଆମେଇଂକେ ମେଁ ଜୁଗ୍‌ଜୁଗ୍ ନ୍‌ସା ନିମାଣ୍ଡା ଆଡିଂବକେ ।

15 ପବିତ୍ର ଆତ୍ମା ଣ୍ଡିଗ୍ ମେଁନେ ସାକି ବିଚେ ବାସଙ୍ଗ୍‌ବକେ

16 ମାପ୍‌ରୁ ବାସଙ୍ଗ୍‌ଡିଂକେ,

"ଇଡ଼ିଂଡେ ନିଂ ମେଁଇଂନେ ଏତେ ଆକେନ୍ ତ୍ମି ନିଅମ୍ ଣ୍ଡିଂଏ ।

ନିଂ ନିଂନେ ନିଅମ୍‌ ମେଁଇଂନେ ହୁର୍ଦେନିଆ ଣ୍ଡ୍ରାଃରେଏ

ଆରି ମେଁଇଂନେ ହୁର୍ଦୟ୍‌ ପାଟାନ୍ନିଆ ଙ୍ଗୁଆର୍‌ଏ ।"

17 ଆରି ଣ୍ଡିଗ୍ ମେଁ ବାସଙ୍ଗ୍‌ଡିଂକେ "ନିଂ ଆରି ମେଁଇଂନେ ପାପ୍ ଆରି ଦଦ୍ୟା‌ କାମ୍ ମନେ ନ୍ନାଡିଂ ଣ୍ଡୁ ।" 18 ତେନ୍‌ସା ମେଇଂ ଜଦି କେମା ବା ଲେଃଆର୍‌କେ ତେଲା ପାପ୍ ଗ୍ୱେଡ଼ିଆ ନ୍‌ସା ଆରି ବଲିପୁଜାନେ ଦର୍‌କାର୍ ଣ୍ଡୁ ।

19 ତେନ୍‌ସା ଅ ବୟାଁ ଆରି ତନାଇଂ ଜିସୁ ଗୁଏକେସା ନେ ମ୍ନାପବିତ୍ର ଟାନ୍‌ନିଆ ଗାନେନ୍‌ସା ସର୍‌ତେ ଅଦିକାର୍ ବାନେଲେଃକେ । 20 ମେଁ ମେଁନେ ଗାଗ୍‌ଡ଼େରକମ୍ ପାଟାଇ ବିତ୍ରେ ବିଚେ ନେଁଇଂନେ ନ୍‌ସା ମୁଇଙ୍ଗ୍ ତ୍ମି ଜିବନ୍ ଗାଲି ରଃ ବକେ । 21 ଇସ୍‌ପର୍‌ନେ ଡୁଆ ଏବେ ନେଁଇଂନେ ମ୍ନା ପୁଜାରି‍ଇଂନେ ନ୍ତିନ୍ନିଆ ଲେଃକେ । 22 ତେନ୍‌ସା ପାଙ୍ଗ୍‌ଲାପା ନେ ନିମାଣ୍ଡା ମନ୍‌ରେ ଆରି ଡାଟ୍ ବିସ୍‌ବାସ୍ ଏତେ ଇସ୍‌ପର୍‌ନେ ଡାଗ୍ରା ନେୱେପା; ଡାଗ୍‌ଲା ନେ ଏଃକେ ପାପ୍ ଚିନ୍ତାବାନ୍ କ୍ରିସ୍ଟନେ ମିଆଁବାନ୍ ପବିତ୍ର ଡିଂନେଲେଃକେ ଆରି ନେ ଗାଗ୍‌ଡ଼େ ନିମାଣ୍ଡା ଣ୍ଡିଆନ୍ନିଆ ଗ୍ୱେଃଡ଼ିଆ ଲେଃକେ । 23 ମୁଡ଼ି ଆସା ନେଁଇଂନେ ଲେଃକେ ଡାଗ୍‌ଚେ ବାସଙ୍ଗ୍‌ ନେଡିଂକେ ଆତ୍‌ଅରିଆ ନେ ଡାଟ୍ ଲେଃନେ ଦର୍‌କାର୍ ଡାଗ୍‌ଲା ନେ ଇସ୍‌ପର୍‌ନେ ସାମୁଆଁ ଆଡ଼ାତ୍ରା ଆସା ବନେଃୟାଏ । 24 ପାଙ୍ଗ୍‌ଲାପା ନେ ବିନ୍‌ଣ୍ଡ୍ରେ ଡାଗ୍ରା ମନ୍‌ ସାନ୍ତି ଡିଂଚେ ମେଁଇଂନେ ସାଆଜ୍ୟ ନେଡିଂପା; ଡେକ୍‌ରକମ୍ ବାବ୍‌ରେ ଆଲାଦ୍‌ନେ ସାମୁଆଁ ବିଚେ ସତ୍‌କାମ୍ ନେଡିଂପା । 25 ବାରି ଜାଣ୍ଡେ ଜାଣ୍ଡେ ଡିରକମ୍ ପାର୍‌ତନାନ୍ନିଆ ମିସୁନେ ଅଲ୍‌ସୁଆ ଡିଂଆର୍‌ଏ ନିଂ ଡେତ୍‌ରକମ୍ ନ୍ନାଡିଂ ଣ୍ଡୁ । ବିନ୍‌ପାକା ମାପ୍‌ରୁନେ ଦିନା ଡାଗ୍ରା ଡିଂ ପାଙ୍ଗ୍‌ଡିଂକେ ମ୍ୟାଚେ ନିଜେ ନିଜେକେ ମାଲେ ମ୍ଲେଡ଼ିଆ ଡିଂନେ ଦର୍‌କାର୍ ।

26 ନେଁଇଂନେ ଡାଗ୍ରା ସତ୍ ତ୍ନାକ୍ନେ ଇଡ଼ିଙ୍ଗ୍ ନେ ଜଦି ମ୍ୟା ଅଁଚେ ପାପ୍‌ନ୍ନିଆ ଲିଗ୍ ନେଲେଃଏ ତେଲା ଆରି ମେଃଡିଗ୍ ବଲିପୁଜା ଆନେକେ ପାପ୍‌ବାନ୍ ଆମ୍ବ୍ରନେ ଆୟା ଣ୍ଡୁ । 27 ଡେତ୍‌ଲା ନେଁ ଇଡ଼ିଂଡେ ମ୍ନାବିଚାର୍‌ନିଆ ସେନୁଗ୍ କୁଡ଼େଚେ ଇସ୍‌ପର୍ ବିରଦିଇଂନେ ନ୍‌ସା ତୁର୍‌ବକ୍ନେ ବୟଙ୍କାର୍ ସୁଆନ୍ନିଆ ଦଂସ ବାନେ ଅବସ୍ତାକେ ବୁଟଚେ ଉର୍‌ନେ ଆନ୍ତାର୍‌ଲା ନେଁଇଂନେ ବିନ୍ ଅବସ୍ତା ଣ୍ଡୁ । 28 ଜାଣ୍ଡେ ଜଦି ମୋଶାନେ ନିଅମ୍ ଆମାନେ ଆରି ମ୍ବାର୍ ଣ୍ଡୁଲା ମେଁବାନ୍ ମାଲେ ସାକିଣ୍ଡ୍ରେଇଂନେ ସାକି ବାନ୍‌ ମେଁ ଦସି ସାକି ଡିଂଏ ତେଲା ଆମେକେ ଦୟା ମାରାସୁଏଚେ ଗୁଏନେ ଡଣ୍ଡ୍ ବିଏ । 29 ଡେତ୍‌ଲା ଜାଣ୍ଡେ ଇସ୍‌ପର୍‌ନେ ଉଂଡେକେ ଗିନ୍‌ ଡିଂଏ, ଇସ୍‌ପର୍‌ନେ ତ୍ମି ନିଅମ୍‌ନେ ମିଆଁ ବାନ୍‌ ପାପ୍ ଗ୍ୱେଡ଼ିଆନେ ସୁଜଗ୍ ବାଲେଃଚେ ଣ୍ଡିଗ୍ ଆମେକେ ଗୁର୍‌ନା ଡିଂଏ ବାରି ଦୟାଡିଂଣ୍ଡ୍ରେ ପବିତ୍ର‍ ଆତ୍ମାକେ ଅପମାନ୍ ଡିଂଏ, ମେଁନେ ଅବସ୍ତା ମେଃନେ ଡିଙ୍ଗ୍‌ଏ ? ବାବେ କେଲାପା, ମେଁ ଉଃଡ଼ି ମାଲେ ଡଣ୍ଡ୍‌ ଡିଂଏ । 30 "ନିଂ ପ୍ରତିସଦ୍‌ ଡୁଂଣ୍ଡ‍ଏ, ନିଂ ଡଣ୍ଡ୍‌ବିଣ୍ଡ୍ରେ" ଏନ୍ ସାମୁଆଁ ଜା ବାସଙ୍ଗ୍‌ବକେ, ଆମେକେ ନେ ମ୍ୟାନେଲେଃକେ । ମେଁ ଆରି ଣ୍ଡିଗ୍ ବାସଙ୍ଗ୍‌ବକେ, "ମାପ୍‌ରୁ ମେଁନେ ରେମୁଆଁଇଂନେ ବିଚାର୍ ଡିଂଏ ।" 31 ଜୁଗ୍‌ଜୁଗ୍ ମ୍ବ୍ରଣ୍ଡ୍ରେ ଇସ୍‌ପର୍‌ନେ ବିଚାର୍‌ନ୍ନିଆ କୁଡ଼େନେ ଉଡ଼ି ବୟଙ୍କାର୍ ।

32 ନାନେ ଅସେନେ ସାମୁଆଁ ମନେ ଡିଙ୍ଗ୍‌ପା । ଇସ୍‌ପର୍‌ନେ ତାର୍‌କିଗ୍ ପେଇଂନେ ଆମ୍ୟାକ୍ନେ ଇଡ଼ିଙ୍ଗ୍ ପେଇଂ ବିନ୍‌ବିନ୍‌ ରକମ୍ ଦୁକ୍ କସ୍ଟ ପେବାକେ ମାତର୍‌ ଆରେ ପେଲେଃଗେ । 33 ଅଃନା ଅଃନା ପେଇଂ ସାପାରେନିଆ ନିନ୍ଦା ଆରି ମାଡ୍‌ ଚଂପେଲେକେ । ଆରି ଅଃନା ଅଃନା ପେଇଂ ବିନ୍‌ଣ୍ଡ୍ରେଇଂନେ ଦୁକ୍ କସ୍ଟନ୍ନିଆ ମେଇଂ ରକମ୍‌ ସମାନ୍ ଅବସ୍ତା ଡିଙ୍ଗ୍‌ଚେ ସାଇଜ ପେଡିଙ୍ଗ୍‌କେ । 34 ପେଇଂ ବନ୍ଦି‍ଇଂନେ ଦୁକ୍ କସ୍ଟନ୍ନିଆ ସାଆଜ୍ୟ ଡିଂପେଡିଂଗେ ବାରି ଉଡ଼ିବେଲା ପେଇଂନେ ସର୍‌ତେ ଡଙ୍ଗା ଡିଂକେ ଅଃତେନ୍‌ ବେଲା ପେଇଂ ସାର୍ଦାରେ ସାପା ନସ୍ଟ ଡିଙ୍ଗ୍‌କ୍ନେ ସମ୍ବାଲେ ପେଲେଃଗେ ଡାଗ୍‌ଲା ପେଇଂନେ ଜେ ମ୍ନାନେ କାଲାଆଃ ଲେଃନେ ସମ୍ପତ୍ତି ଲେଃକେ ଆତେନ୍‌ ପେଇଂ ମ୍ୟାପେଲେଃଗେ । 35 ତେନ୍‌ସା ବର୍‌କସ୍‌ ଆଆନ୍ତାର୍‌ଗେପା ଡାଗ୍‌ଲା ସତ୍‌ ବର୍‌କସ୍‌ନେ ମ୍ନା ଇନାମ୍‌ ଲେଃକେ । 36 ଇସ୍‌ପର୍‌ନେ ଇକ୍‌ଚା ପୁରନ୍ ଡିଂଚେ ମେଃନେ ମେଁ ବିଏ ଡାଗ୍‌ଚେ ପର୍‌ମାନ୍ ଡିଂବକେ ଆତେନ୍‌ ବାନେ ଆସାରେ ବର୍‌କସ୍‌ ସାଚେ ଲାଲାପା । 37 ଦରମ୍ ସାସ୍ତର୍‌ନ୍ନିଆ ଗ୍ନୁଆର୍ ଲେଃକେ:

"ଆରି ଇତୁଡ଼ା ବେଲା ଉର୍‌ପା

ଜାଣ୍ଡେ ପାଙ୍ଗ୍‌ନେ ଲେଃକେ ମେଁ ପାଙ୍ଗ୍‌ଏ

ନିୱାଲ୍‌ ଆଡିଙ୍ଗ୍‌ ଣ୍ଡୁ

38 ନିଂନେ ଦରମ୍ ରେମୁଆଁଇଂ ବିସ୍‌ବାସ୍‌ନିଆ ଡାଟ୍ ଲେଃଚେ ମ୍ବ୍ର‍ଆର୍‌ଏ

ମାତର୍‌ ଜାଣ୍ଡେ ଜଦି ପ୍ଲାଗୁଚେ ବିଏ

ମେଁ ନ୍ତୁଗ୍ ନିଂ ସାର୍ଦା ଡିଂନ୍ନାୟା ଣ୍ଡୁ ।"

39 ପ୍ଲା ପାକା ଗୁଚେଣ୍ଡ୍ରେ ନେ ଣ୍ଡୁ ନସ୍ଟ ଡିଂନେ ରେମୁଆଁ ନେ ଣ୍ଡୁ । ନେଁ ଡାଟ୍ ବିସ୍‌ବାସି ଆରି ମୁକ୍ତି ବାକ୍ନେ ରେମୁଆଁ ।