1 ଆତେନ୍‌ ବେଲା ଉଡ଼ି ରେମୁଆଁ ପାଙ୍ଗ୍‌ଚେ ପିଲାତ ଆଣ୍ଡିନେ ଗାଲିଲୀୟଇଂନେ ମ୍ୟା ମେଁଇଂନେ ପୁଜା ମ୍ୟା ଆଃତେ ଆଃମିସେବକେ, ମେଇଙ୍ଗ୍‌ନେ ବିସୟ୍‌ରେ ଆମେଇଂକେ ଆଃମ୍ୟାଃକେ । 2 ଆତ୍‌ବାନ୍ ଜିସୁ ଆମେଇଂକେ ଉତର୍ ବିକେ ଆକେନ୍ ସାପା କସ୍ଟ ବା ପେଡିଙ୍ଗ୍‌କେସା ଆକେନ୍ ଗାଲିଲୀୟଇଂ ବିନ୍ ସାପା ଗାଲିଲୀୟଇଂନେ ବାନ୍ ଜବର୍ ପାପି ଡାଗ୍‌ଚେ ପେ ସାପାରେ ବାବେ ପେଡିଙ୍ଗ୍‌କେ ? 3 ନେଙ୍ଗ୍ ଆପେକେ ବାସଙ୍ଗ୍‌ଣ୍ଡିଂ, ନାନେ ଜଦି ପାପ୍‌ବାନ୍‌ ମନ୍‌କେ ପେବଦ୍‌ଲେଲା ପେଇଂ ସାପାରେ ଦେତ୍‌ରକମ୍ ନଷ୍ଟ ପେଡିଙ୍ଗ୍‌ଏ । 4 ଶୀଲୋହନେ ଆତେନ୍‌ ଆଣ୍ଡିନେ ଗୁଆତ୍ମା ରେମୁଆଁ ଆଡ଼ାତ୍ରା ଉର୍‌ନେ ଡୁଆ ଲଃଚେ ମେଁଇଂନେ ପାରାନ୍ ନଷ୍ଟ ଡିଙ୍ଗ୍‌ଗେ ମେଇଂ ସାପାରେ ଯୀରୂଶାଲମ୍ ରେମୁଆଁଇଂନେ ବାନ୍ ଜବର୍ ପାପିଇଂ ଡାଗ୍‌ଚେ କି ପେ ସାପାରେ ବାବେପେଡିଂ ? 5 ନେଙ୍ଗ୍ ଆପେକେ ବାସଙ୍ଗ୍‌ଣ୍ଡିଂ, ଡାଗ୍‌ଲା ମନ୍‌କେ ପେରାଃବଦ୍‌ଲେଲା ପେ ଡିଗ୍‌ ସାପାରେ ଦେତ୍‌ରକମ୍ ପେଗୁଏଃଏ ।

6 ଆରି ଜିସୁ ଆକେନ୍ ଉସ୍ରା ବାସଙ୍ଗ୍‌କେ ମୁଇଂଜାନେ ଅଙ୍ଗୁର୍ ଡୁଗ୍‌ଡିନ୍ନିଆ ମୁଇଙ୍ଗ୍‌ ଲିୱା ସ୍ଲା ଉଙ୍ଗ୍‌ବକେ । ମାଲିକ୍ ପାଙ୍ଗ୍‌ଚେ ଆତ୍‌ଅରିଆ ଚୁଚୁ ତୁର୍‌କେ ତେଲା ଆ‍ଅବାକେ । 7 ତେସା ମେଁ ନେତା ଡୁଗ୍‌ଡି ଉର୍‌ଣ୍ଡ୍ରେକେ ବାସଙ୍ଗ୍‌କେ ଆକେନ୍ ଜିର୍‌ମୁଆଁ ଡିଙ୍ଗ୍‌ଗେ ନେଙ୍ଗ୍ ପାଙ୍ଗ୍‌ଚେ ଆକେନ୍ ଲିୱା ସ୍ଲାଅରିଆ ଲିୱା ଚୁଚୁ ତୁର୍‌ଣ୍ଡିଂକେ ମାତର୍ ନ୍ନାବାକେ ଣ୍ଡୁ ଆକ୍‌ମେଁ ସି ଜଗ୍‌ତ୍ଲାଗ୍‌ପା ଆକେନ୍ ମେଁନ୍‌ସା ତୁବକେ ଡିଗ୍ ମାଡ଼େ କଲେଃକେ । 8 ମାତର୍‌ ଗୁତିରେ ସାକାର୍‌କେ ଉତର୍ ବିଃକେ ମାପ୍‌ରୁ ଆକ୍‌ମେଁ ଏଃମୁଆଁ ଆନ୍ତାର୍‌ବି ନେଙ୍ଗ୍ କ୍ମେନେ ପିତୁର୍ ଗଃଚେ କତ୍‌ ମ୍ବିଏ । 9 ବାରି ଇଡ଼ିଙ୍ଗ୍ ଲିୱା ଚୁଲା ତ ନିମାଣ୍ଡା ଣ୍ଡୁଲା ଆକ୍‌ମେକେ ସିଃତଗ୍ ତ୍ଲାଗ୍‌ଏ ।

10 ମୁଇଂତର୍‌ ଜିସୁ ପୁଣ୍ଡେନେ ଦିନା ମୁଇଙ୍ଗ୍ ଜିଉଦି ପାର୍‌ତନା ଡୁଆନ୍ନିଆ ଜିସୁ ଗିଆନ୍‌ ବିଃଡିଙ୍ଗ୍‌କେ । 11 ଗୋତ୍ମା ଜାକ ମୁଇଙ୍ଗ୍ ଗଲିଆ ବାନ୍ ଦଦିଆ ଆତ୍ମା ସେଲାମ୍ବୁଏ ମୁଇଙ୍ଗ୍ ଆତ୍‌ଅରିଆ ଲେଃକେ । ମେଁ କୁପ୍‌ଡ଼ ଡିଙ୍ଗ୍‌ଚେ ଲେଃକେ ଡିଡିରକମ୍‌ ଡିଗ୍ ନିଜେ ମେଁ ସ୍ୱେଡ଼ାଃ ଡିଙ୍ଗ୍ ଆୟାକେ ଣ୍ଡୁ । 12 ଜିସୁ ଆମେକେ କେଚେ ଡାଗ୍ରା ୱେଚେ ବାସଙ୍ଗ୍‌କେ ଏ ସେଲାମ୍ବୁଏ ନାଁନେ ଆଃସିଲେଃକ୍ନେ ବାନ୍ ନିମାଣ୍ଡା ନାଡିଙ୍ଗ୍‌କେ । 13 ଜିସୁ ନିଜର୍ ନ୍ତି ସେଲାମ୍ବୁଏ ଆଡ଼ାତ୍ରା ବକେ ଆତ୍‌ବାନ୍ ମେଁ ଦାପ୍‌ରେ ଆଃ ସ୍ୱେଡ଼ାଃ ତୁଆଁଚେ ଇସ୍‌ପର୍‌ନେ ମ‍ଇମା ଡିଙ୍ଗ୍‌ନେ ମୁଲେକେ ।

14 "ଡାଗ୍‌ଲା ଜିସୁ ପୁଣ୍ଡେନେ ଦିନା ନିମାଣ୍ଡା ଆଡିଙ୍ଗ୍‌ଲା ଜିଉଦି ପାର୍‌ତନା ଡୁଆନେ ଦାଇତ୍‌ରେ ଲେଃକ୍ନେ ରେମୁଆଁ ରିସା ଡିଂଚେ ରେମୁଆଁଇଂକେ ବାଲିର୍‌କେ କାମ୍ ଡିଙ୍ଗ୍ ନ୍‌ସା ତୁର୍‌କ୍ଲିଗ୍ ସ୍ମି ଲେଃକେ ତେସା ଆତେନ୍‌ ସାପା ସ୍ମି ପାଙ୍ଗ୍‌ଚେ ନିମାଣ୍ଡା ଡିଙ୍ଗ୍‌ପା ପୁଣ୍ଡେନେ ସ୍ମି ଆପାଙ୍ଗ୍‌ଗେପା ।"

15 ଡାଗ୍‌ଲା ମାପ୍‌ରୁ ଆମେଇଂକେ ଉତର୍ ବିକେ, "ଅ କୁଟ୍ ରେମୁଆଁଇଂ ପେ ସାପାରେ ମେଁନେ ପୁଣ୍ଡେନେ ଦିନା ନିଜେ ନିଜେନେ ଅରେଃ ଣ୍ଡୁଲା ଗଦ ସାଲାତ୍ୟାବାନ୍ ତୁପିଗ୍‌ଚେ ଡୁଂୱେଚେ ଣ୍ଡିଆ ପେରାଃଉଗ୍‌ ଣ୍ଡୁ ? 16 ତେଲା କେଲାପା ଗୋତ୍ମା ମୁଆଃ ସାଚେ ଗଲିଆ ବାନ୍ ଆଃସିଲେଃକ୍ନେ ଅବ୍ରାହାମ୍ ସେଲା ଆକେନ୍ ସେଲାମ୍ବୁଏ ରେମୁଆଁ ମେଁନେ ପୁଣ୍ଡେନେ ଦିନା ନିଜେନେ ବନ୍ଦନ୍‌ବାନ୍‌ ନିମାଣ୍ଡା ଡିଙ୍ଗ୍‌ନେ ଦର୍‌କାର୍ ଆଲେଃକେ କି ?" 17 ଜିସୁ ଆକେନ୍ ସାପା ସାମୁଆଁ ବାସଙ୍ଗ୍‌ନେ ବେଲା ମେଁନେ ବିରଦ୍‌ ରେମୁଆଁ ସାପାରେ ଗିଆସ ୱେଆର୍‌କେ ମାତର୍‌ ରେମୁଆଁଇଂ ସାପାରେ ମେଁନେ ମୁନା କାମ୍ ଡିଙ୍ଗ୍‌କ୍ନେସା ସାର୍ଦା ଡିଙ୍ଗ୍‌ନେ ମୁଲେଆର୍‌କେ ।

18 ଆତ୍‌ବାନ୍ ଜିସୁ ସାଲ୍ୟାକୁକେ ଇସ୍‌ପର୍‌ନେ ରାଇଜ୍ ଡିରକମ୍ ? ବାରି ଜାଣ୍ଡେ ଆଃତେ ନେଙ୍ଗ୍ ସମାନ୍ ନ୍ନାଡିଙ୍ଗ୍‌ଏ ? 19 ଆତେନ୍‌ ଦେକ୍‌ରକମ୍ ମୁଇଙ୍ଗ୍ ସୋରିଷ ମଞ୍ଜି ରକମ୍‌ ଆତେନ୍‌ ଡୁଂୱେଚେ ମୁଇଙ୍ଗ୍‌ ରେମୁଆଁ ନିଜେନେ ଡୁଗ୍‌ଡିନ୍ତୁଗ୍‌ ବିଗ୍‌କେ ଆରି ଆତେନ୍‌ ମ୍ନାଚେ ସ୍ଲାଃ ଡିଙ୍ଗ୍‌କେ ଆରି କିତଂନେ ପ୍ଲିଗ୍‌ଇଂ ପାଙ୍ଗ୍‌ଚେ ମେଁନେ କେନ୍ଦାନିଆ ଉଙ୍ଗ୍‌ଚ୍ୟା ଆର୍‌କେ ।

20 ଜିସୁ ଆରି ବାସଙ୍ଗ୍‌କେ ନେଙ୍ଗ୍ ଜାଣ୍ଡେ ଏତେ ଇସ୍‌ପର୍‌ନେ ରାଇଜ୍ ସମାନ୍ ଣ୍ଡିଙ୍ଗ୍‌ଏ ? 21 ଆତେନ୍‌ ମୁଇଙ୍ଗ୍‌ ଖମୀର ରକମ୍‌ ମୁଇଙ୍ଗ୍ ସେଲାମ୍ବୁଏଃ ଆତେନ୍‌ ଡୁଂୱିଗ୍‌ଚେ ମହଣେ ମଇଦା ଡାଗ୍ରା ଡାଚେ ବକେ ଆରି ଇଡ଼ିଙ୍ଗ୍ ସାପା ଖମୀର ରକମ୍ ଡିଙ୍ଗ୍‌ୱେଗେ ।

22 ଏନ୍ ଇଡ଼ିଙ୍ଗ୍ ଜିସୁ ନଗର ନଗର ଆରି ଇନି ଇନି ଅଲେଙ୍ଗ୍‌ଚେ ଗିଆନ୍‌ ବିଃ ବିଃଚେ ଯିରୂଶାଲମ ପାକା ୱେଗେ । 23 ଆରି ମୁଇଂଜା ଆମେକେ ବାସଙ୍ଗ୍‌କେ ମାପ୍‌ରୁ ଉଦାର୍‌ ବାନେ ରେମୁଆଁଇଂନେ ସଂକ୍ୟା ମେଁନେ ଗଣ୍ଡା ? ଆତ୍‌ବାନ୍ ମେଁ ମେଇଙ୍ଗ୍‌କେ ବାସଙ୍ଗ୍‌କେ 24 ଚିପାକ୍ନେ ଗାଲି ବିଚେ ୱେନ୍‌ସା ୟା ଜାକ ଚେସ୍‌ଟା ଡିଙ୍ଗ୍‌ପା ଡାଗ୍‌ଲା ନେଙ୍ଗ୍ ବାସଙ୍ଗ୍ ଣ୍ଡିଙ୍ଗ୍‌କେ ଗୁଲେ ୱେନ୍‌ସା ଚେସ୍‌ଟା ଡିଙ୍ଗ୍‌ଆର୍‌ଏ ଡାଗ୍‌ଲା ୱେ ଆୟାଆର୍‌ ଣ୍ଡୁ । 25 ଡୁଆନେ ମ୍ନାଃରେ ତଡ଼୍ୟାଚେ ର୍ଣ୍ଣସାଙ୍ଗ୍‌ ଆନ୍ତଃ ବିଃକ୍ନେ ଇଡ଼ିଙ୍ଗ୍ ଉଡ଼ିବେଲା ପେ ସାପାରେ ବାଜାର୍ ତୁଆଁ ପେଲେଃକେ ଆରି ଅ ମାପ୍‌ରୁ ନେ ନ୍‌ସା ର୍ଣ୍ଣସାଙ୍ଗ୍‌ ରଃବିଲାପା ଆକେନ୍ ବାସଙ୍ଗ୍‌ଚେ ର୍ଣ୍ଣସାଙ୍ଗ୍‌ ବଗ୍‌ନେ ପେମୁଲେଏ ଆତେନ୍‌ ବେଲା ମେଁ ଆପେକେ ବାସଙ୍ଗ୍ଏ ପେ ଆଣ୍ଡିନେ ଜାଗାନେ ରେମୁଆଁ ଆତେନ୍‌ ନେଙ୍ଗ୍‌ ନ୍ନାମ୍ୟାକେ ଣ୍ଡୁ । 26 ଆତେନ୍‌ ବେଲା ପେଇଙ୍ଗ୍‌ ବାଲିର୍ ପେମୁଲେଏ ନେଁ ସାପାରେ ନାଁ ଏତେ କୁଡ଼େଚେ ନେଚଙ୍ଗ୍‌ ନେଉଗ୍‌କେ ଆରି ନାଁ ଆନେକେ ବାଜାର୍‌ଅରିଆ ଗ୍ୟାନ୍ ନାବିକେ । 27 ଆରି ମେଁ ପେ ସାପାରେକେ ବାଲିର୍‌ଏ ପେ ଆଣ୍ଡିନେ ଜାଗାନେ ରେମୁଆଁ ଆତେନ୍‌ ନେଙ୍ଗ୍ ନ୍ନାମ୍ୟାକେ ଣ୍ଡୁ ଏ ଅଦର୍ମ ଡିଂଣ୍ଡ୍ରେ ସାପାରେ ନେଙ୍ଗ୍ ଡାଗ୍ରାବାନ୍ ସ୍ଲ ୱେଲା 28 ✝✝ଉଡ଼ିବେଲା ପେଇଂ ଅବ୍ରାହାମ୍ ଇସାକ୍ ଜାକୁବ୍‌ ଆରି ସାପାରେ ବାବବାଦିକେ ଇସ୍‌ପର୍‌ନେ ରାଜିନ୍ନିଆ ଲେଃନେ ଆରି ନିଜେ ନିଜେକେ ବାଜାର୍‌ ଜଗ୍‌ତ୍ଲିଗ୍‌ନେ ପେକେଏ ଆତେନ୍‌ ବେଲା ଆତ୍ଅରିଆ ପେଅଁଏ ଆରି ଗ୍ନି ଆଃଚାର୍ ଆଃଲ୍ୟା ପେକେଏ । 29 ଆରି ପୁର୍ବ ଆରି ପଶ୍ଚିମ୍ ଉତର୍ ଆରି ଦକିନ୍‌ବାନ୍‌ ରେମୁଆଁଇଂ ପାଙ୍ଗ୍‌ଚେ ଇସ୍‌ପର୍‌ନେ ରାଜିନ୍ନିଆ ଚଙ୍ଗ୍‌ନ୍‌ସା କ‍ଆର୍‌ଏ । 30 ଆରି କେଲାପା ଇଡ଼ିଙ୍ଗ୍ ଲେଃକ୍ନେ ଉଡ଼ି ରେମୁଆଁଇଂ ସେନୁଗ୍‌ ଡିଙ୍ଗ୍‌ଆର୍‌ଏ ଆରି ସେନୁଗ୍‌ ଲେଃକ୍ନେ ଉଡ଼ି ରେମୁଆଁ ଇଡ଼ିଙ୍ଗ୍ ଡିଙ୍ଗ୍‌ଆର୍‌ଏ ।

31 ଆତେନ୍‌ ବେଲା ଉଡ଼ି ପାରୁସି ଜିସୁ ଡାଗ୍ରା ପାଙ୍ଗ୍‌ଚେ ବାସଙ୍ଗ୍‌ଡିଂକେ ଆକେନ୍ ଜାଗା ଆନ୍ତାର୍‌ଚେ ତାର୍ ୱେଲା ଡାଗ୍‌ଲା ହେରୋଦ ଆନାକେ ବାଗୁଏଃ ନ୍‌ସା ଇକ୍‌ଚା ଡିଙ୍ଗ୍ ଡିଂକେ ।

32 ଆତ୍‌ବାନ୍ ଜିସୁ ଆମେଇଂକେ ବାସଙ୍ଗ୍‌କେ ପେଇଂ‍ ୱେଚେ ଆତେନ୍‌ ନାକାକେ ବାସଙ୍ଗ୍‌ପା କେଲାପା ନେଙ୍ଗ୍ ଏଃକେ ଆରି ଞ୍ଜ ଗଲିଆ ନୁଆଁ ଣ୍ଡିଂ ଆରି ରଗି‍ଇଂକେ ନିମାଣ୍ଡା ଆଃଡିଙ୍ଗ୍‌ଣ୍ଡିଙ୍ଗ୍ ବାରି ଜିର୍‌ସି ବିତ୍ରେ ନେଙ୍ଗ୍ ନେଙ୍ଗ୍‌ନେ କାମ୍ ଣ୍ଡ୍ରାଡାଏ । 33 ବଲ୍‌ଡ଼ିଙ୍ଗ୍‌ଗେ ଏଃକେ ଞ୍ଜଡ଼େ ଆରି ଇଡ଼ିଙ୍ଗ୍ ଦିନା ଆନେଙ୍ଗ୍ ୱିଗ୍‌ନେ ଡିଙ୍ଗ୍‌ଏ ଡାଗ୍‌ଲା ଯିରୂଶାଲମ୍‌ନେ ବାଏରେ ବାବବାଦି ନସ୍ଟ ଡିଙ୍ଗ୍‌ନେ ଦର୍‌କାର୍ ଣ୍ଡୁ ।

34 ଗୋ ଯିରୂଶାଲମ୍‌ ଗୋ ଯିରୂଶାଲମ୍‌ ବାବବାଦିଇଂକେ ବାଗୁଏ ପେଡିଙ୍ଗ୍‌କେ ଆରି ନିଜର୍ ଡାଗ୍ରାନେ ପ୍ରେରିତ୍‌ଇଂକେ ବ୍ରି ଟୁଚେ ବାଗୁଏ ପେଡିଙ୍ଗ୍‌କେ ଗିସେଙ୍ଗ୍‌ ଡିରକମ୍ ଡେନା ବୁନ୍ଦେ ନିଜର୍ ଉଙ୍ଗ୍‌ଡେକେ ମୁଇଙ୍ଗ୍ ଡାଗ୍ରା ରାଃସିଙ୍ଗ୍‌ଏ ଦେତ୍‌ରକମ୍ ନେଙ୍ଗ୍‌ ଉଡ଼ିତର୍ ନାଉଂକେ ମୁଇଙ୍ଗ୍‌ ଡାଗ୍ରା ରାଃସିଙ୍ଗ୍‌ ନ୍‌ସା ମନ୍‌ ଣ୍ଡିଂକେ ଡାଗ୍ଲା ପେଇଂ ଇକ୍‌ଚା ପେଡିଙ୍ଗ୍‌କେ ଣ୍ଡୁ । 35 କେଲାପା ପେ ସାପାରେନେ ମନ୍ଦିର୍‌ ଆନ୍ତାର୍ ବିନେଙ୍ଗ୍‌କେ; ଆରି ନେଙ୍ଗ୍ ଆପେକେ ବାସଙ୍ଗ୍‌ ଣ୍ଡିଙ୍ଗ୍ ମାପ୍‌ରୁନେ ମ୍ନିରେ ଜାଣ୍ଡେ ପାଙ୍ଗ୍‌ଡିଙ୍ଗ୍‌କେ ମେଁ ଦନ୍ୟ ପେଇଙ୍ଗ୍‌ ଆଣ୍ଡିନେ ସ୍ମି ଆକେନ୍ ସାମୁଆଁ ପେବାଲିର୍‌ଏ ଆତେନ୍‌ ସ୍ମି ଆପାଙ୍ଗ୍‌ ଜାକ ଆନେଙ୍ଗ୍ ସତେଆ ଆରି ପେକେ ଣ୍ଡୁ ।