ଜିସୁ ଅଁ ଅଜାର୍ ବାନ୍ ମାଲେ ରେମୁଆଁକେ ଚଙ୍ଗ୍ନେ ବିଃକେ ।
1 ଆତେନ୍ ବେଲା ଜିସୁ ଏତେ ଜବର୍ ରେମୁଆଁ ଲେଃଗେ । ଆମେଇଂକେ ମେଃଡିଗ୍ ଚଙ୍ଗ୍ନେ ଣ୍ଡୁ । ଏନ୍ ଜିସୁ ସିସ୍ଇଂକେ ଡାଗ୍ରା ୱାଚେ ବାସଙ୍ଗ୍କେ 2 "ଏନ୍ ରେମୁଆଁଇଙ୍ଗ୍ନ୍ସା ଆନେଙ୍ଗ୍କେ ଜାବର୍ ଲିବିସଃ ଲାଗେ ଡିଙ୍ଗ୍କେ । ମେଇଙ୍ଗ୍ ନେଙ୍ଗ୍ଏତେ ଜିର୍ସି ଡିଙ୍ଗ୍ଗେ ନେଙ୍ଗ୍ ଏତେ ଲେଃଆର୍ଡିଂକେ । ମାତର୍ ଚଙ୍ଗ୍ନ୍ସା ମେଃଡିଗ୍ ଣ୍ଡୁ । 3 ମେଇଂ ମାଚଙ୍ଗ୍ଚେ ଆକ୍ବାନ୍ ୱିଗ୍ଲେ ଡାଗ୍ଚେ ନେଙ୍ଗ୍ନେ ଇକ୍ଚା ଣ୍ଡୁ । ମେଇଂନେ ବିତ୍ରେ ଉଡ଼ି ରୁଆ ଜାବର୍ ସ୍ଲବାନ୍ ପାଙ୍ଗ୍ଲେ ଆର୍କେ ।"
4 ଜିସୁନେ ସିସ୍ଇଂ ବାସଙ୍ଗ୍ଆର୍କେ, "ନେ ଆକ୍ ରେମଆଁଗଣ୍ଡ୍ ଣ୍ଡୁନେ ଇନି ଅରିଆ ଆକ୍ମେଇଂକେ ଆଃଚଙ୍ଗ୍ ନ୍ସା ଜବର୍ କାଦି ଆଣ୍ଡିବାନ୍ ନେବାଏ ?"
5 ଜିସୁ ଆମେଇଂକେ ସାଲିଆକୁକେ, "ପେନ୍ନିଆ ଉଡ଼ିକ୍ଲିଗ୍ ରୁଟି ଲେଃକେ ?" ମେଇଙ୍ଗ୍ ବାସଙ୍ଗ୍କେ ।
"ନେଅରିଆ ଗୁକ୍ଲିଗ୍ ରୁଟି ଲେଃକେ ।"
6 ତେନ୍ଇଡ଼ିଂ ଜିସୁ ରେମୁଆଁଇଂକେ ତୁବଃ ଆଡ଼ାତ୍ରା କୁକନ୍ସା ବାସଙ୍ଗ୍କେ, ମେଁ ଗୁକ୍ଲିଗ୍ ରୁଟି ଡୁଂୱେକେ ଆରି ଆତେନ୍ସା ପରମେସର୍କେ ଦନ୍ୟବାଦ୍ ବିକେ । ରୁଟି ସାପା ପାଗ୍ଚିଚେ ସିସ୍ଇଂକେ ବାଟା ବିନେସା ବିକେ । ମେଇଙ୍ଗ୍ ଦେଃତୁଆ ଡିଙ୍ଗ୍ଆର୍କେ । 7 ସିସ୍ଇଙ୍ଗ୍ ଡାଗ୍ରା ଉଃଡ଼ିକ୍ଲିଗ୍ ଡାଆଁ ଆଃଡ଼ ଲେଃଗେ । ଜିସୁ ଆଡ଼ ନ୍ସା ଦନ୍ୟବାଦ୍ ବିଚେ ସିସ୍ଇଙ୍ଗ୍ କିକେ ଆତେନ୍ ସାପା ବାଟା ବିନେ ବାସଙ୍ଗ୍ କିକେ । 8 ସାପା ରେମୁଆଁ ଚଙ୍ଗ୍ଚେ ସାନ୍ତି ଡିଙ୍ଗ୍ଆର୍କେ । ଇଡ଼ିଙ୍ଗ୍ ମେଇଙ୍ଗ୍ ଲୁଆଁକ୍ନେ ପାକ୍ଚିଃକ୍ନେ ଉଡ଼ିକ୍ଲିଗ୍ ରୁଟି ଗୁକ୍ଲିଗ୍ ଆଣ୍ଡ୍ରାନିଆ ତାଃନଆର୍କେ । 9 ଆତ୍ଅରିଆ ପ୍ରାୟ୍ ଅଁ ଅଜାର୍ ରେମୁଆଁଇଂ ଚଙ୍ଗ୍ଆର୍କେ । 10 ଏନ୍ ଇଡ଼ିଙ୍ଗ୍ ଜିସୁ ରେମୁଆଁଇଂକେ ବେବିଚେ ସିସ୍ଇଂ ଏତେ ତରାନ୍ନିଆ ଡେଃଚେ ଦଲ୍ମନୁଥା ପ୍ରଦେସ୍ନ୍ନିଆ ୱେକେ ।
ଫାରୁଶୀଇଂ ଜିସୁକେ ପରିକ୍ୟା ଡିଙ୍ଗ୍ଆର୍କେ
(ମାତିଉ ୧୨:୩୮-୪୨; ୧୬:୧-୪)