1 ታ ናቶ፥ ናጋራ ህንተ ኦናዳን፥ ታን ሀዋ ህንተንቶ ጻፋይ፤ ሽን ኦንነ ናጋራ ኦፐ፥ አዉዋ ማታን ኑዉ ጋናትያ የሱስ ክርስቶስ፥ ጽሉ፥ ደኤ። 2 ቃይ ኑን ኑ ናጋራ አቶ ጌተቱሳ ክርስቶሳ ባጋና ደሜቶ፤ ክርስቶስ ያርሸቴዳዌ አሳ ኡባ ናጋራ ድጋናሳፐ አትን፥ ኑ ናጋራ ጻላላ ድጋናሳ ግደና።

3 ኑን ጾሳ አዛዙዋ ናጎፐ፥ ቱሙ አ ኤርያዋ ሄዋን ሻካናዉ ዳንዳዬቶ። 4 እት ኡራይ፥ "ታን አ ኤራይ" ጊደ፥ ቃይ አ አዛዙዋ ናገናን አጎፐ፥ ሄ ኡራይ ዎርዱዋ፤ ቱማተይካ አን ባዋ። 5 ሽን አ ቃላዉ አዛዘትያ ኦና ግዶፐነ፥ ሄ ኡራይ ጾሳ ሲቅያዌ ቱሙ ፖለቴዳ። ኑን ጾሳን ደእያዋ ሀዌ ኑና ኤርሴ። ሄዌካ፥ 6 "ታን፥ ጾሳን ደአይ" ግያ ኦንነ ክርስቶስ ደኤዳዋዳን ደአናዉ በሴ።

7 ታ ሲቃቶ፥ ታን ህንተንቶ ኮይሩዋፐ ደእያ ኤጫ አዛዙዋ ጻፋይፐ አትን፥ ኦራ አዛዙዋ ጻፍከ፤ ሄ ኤጫ አዛዙ ህንተ ስሴዳ ቃላ።✝ 8 ግዶፐካ፥ ታን ህንተንቶ ላኤንዋ ኦራ አዛዙዋ ጻፋይ፤ ሄ አዛዙዋ ቱማተይካ ክርስቶሳንነ ህንተናን ቤቴ። አያዉ ጎፐ፥ ማይ ዬ፤ ቱሙ ፖኡ ሀእ ፖኤ።

9 ፖኡዋን ደአይ ጊደ፥ ባረ እሻ እጽያ ኦንነ ሀኖ ጋካናዉካ ማን ደኤ። 10 ባረ እሻ ሲቅያ ኦንነ ፖኡዋን ደኤ፤ ሄ ኡራን ሀራ ኡራ ቢያባይ አያይነ ባዋ። 11 ሽን ባረ እሻ እጽያ ኦንነ ማን ደኤ፤ ማን ሀመቴ። ማይ አ አይፍያ ቆቅስ ዎዳ ድራዉ፥ ሀቃ ብንቶነ ኤረና።

12 ታ ናቶ፥ ጾሳይ ክርስቶሳ ሱን ድራዉ፥

ህንተ ናጋራ አቶ ያጌዳ ድራዉ፥

ታን ህንተንቶ ጻፋይ።

13 አዋቶ፥ ኮይሩዋፐ ደእያዋ ህንተ ኤሬዳ ድራዉ፥

ህንተንቶ ጻፋይ።

ያላጋቶ፥

ጻላህያ ካፑዋ ህንተ ጾኔዳ ድራዉ፥

ህንተንቶ ጻፋይ።

ጉ ናቶ፥ ጾሳ አዉዋ ህንተ ኤሬዳ ድራዉ፥

ህንተንቶ ጻፋይ።

14 አዋቶ፥ ኮይሩዋፐ ደእያዋ ህንተ ኤሬዳ ድራዉ፥

ህንተንቶ ጻፋይ።

ያላጋቶ፥

ህንተ ምኖ ግድያ ድራዉነ

ጾሳ ቃላይ ህንተናን ደእያ ድራዉ፥

ቃይ ጻላህያ ካፑዋ ህንተ ጾኔዳ ድራዉ፥

ህንተንቶ ጻፋይ።

15 ሀ አላምያ ዎይ አላምያን ደእያ አያነ ሲቆፕተ። ህንተ ሀ አላምያ ሲቆፐ፥ ጾሳ ሲቁ ህንተናን ባዋ። 16 አያዉ ጎፐ፥ ሀ አላምያን ደእያ ኡባባይ፥ ሄዌካ: አሳተ አሙ፥ አይፍያን ጼሊደ ካጄልያዌነ ባረ ደእያዋን ጬቀትያዌ ሀ አላምያፐ ዬዳዋፐ አትን፥ ጾሳፐ ይቤና። 17 ሀ አላሚነ ሀ አላምያን አሳይ አሞትያ ኡባባይ አና። ሽን ጾሳይ ጌዳዋ ኦያ ኡራይ መናዉ ደአና።

18 ታ ናቶ፥ ዎድያ ዉርሰይ ማታቴዳ፤ ክርስቶሳ ኤቀትያዌ ስንፐ ያናዋ ህንተ ስሴዳዋዳን፥ ሀራይ አቶ ሀእካ አ ኤቀትያዋንቱ ጮራቱ ደንዴድኖ። ሄዋ ድራዉ፥ ዎድያ ዉርሰይ ማታቴዳዋ ኑን ሄዋን ኤሬቶ። 19 ሀ ኤቀትያዋንቱ ኑ ባጋ ግደና ድራዉ፥ ኑ ግዶፐ ከሴድኖ፤ አያዉ ጎፐ፥ ኡንቱንቱ ኑ ባጋ ግድያባ ግድንቶነ፥ ኑ ግዶን ደአና፤ ሽን ኡንቱንቱፐ ኦንነ ኑ ባጋ ግደናዌ ኤረታና ማላ፥ ኑ ግዶፐ ከሴድኖ።

20 ሽን ክርስቶስ ህንተ ቦላ ጌሻ አያና ጉሴዳ፤ ቃይ ህንተ ኡባይ ቱሙዋ ኤሪታ። 21 ቱሙዋ ህንተ ኤርያ ድራዉነ ቃይ ቱሙዋን ዎርዱ አያይነ ባይናዋ ህንተ ኤርያ ድራዉ፥ ታን ህንተንቶ ጻፋይፐ አትን፥ ቱሙዋ ህንተ ኤረና ድራዉ ጻፍከ።

22 የሱስ ኦከቴዳ ክርስቶሳ ግድያዋ ኤርከ ግያ ኡራፐ አትን፥ ዎርዱ ኦኔ? ሄዌ ጾሳ አዉዋነ ናኣ ኤርከ ግያዌ ክርስቶሳ ኤቀትያዋ። 23 ጾሳ ናኣ ኤርከ ግያ ኦናነ ጾሳ አዉካ ኤረና፤ ጾሳ ናኣ ኤራይ ግያ ኦናነ ቃይ ጾሳ አዉካ ኤሬ።

24 ሄዋ ድራዉ፥ ኮይሩዋፐ ህንተ ስሴዳዋ ህንተ ዎዛናን ምንሲደ ናግተ። ኮይሩዋፐ ስሴዳዋ ህንተ ናጎፐ፥ ህንተንቶ ቃይ ጾሳ ናኣናነ ጾሳ አዉዋና እትፐተይ ደአና። 25 ቃይ ክርስቶስ ባረ ሁጰዉ ኑዉ እማና ጌዳዌ መና ደኡዋ።

26 ታን ሀዋ ህንተንቶ ሄ ህንተና ባለያ አሳቱዋ ድራዉ ጻፋድ። 27 ሽን ክርስቶስ ህንተ ቦላ ባረ ጌሻ አያና ጉሴዳ። ጌሻ አያናይ ህንተናን ደእያ ድራዉ፥ ኦንነ ህንተና ታማርሳና ኮሸና፤ አያዉ ጎፐ፥ አ ጌሻ አያናይ ህንተና ኡባባ ታማርሴ። እ ታማርስያዌ ቱሙዋፐ አትን ዎርዱዋ ግደና። ሄዋ ድራዉ አያና ጌሻ ትምርተዉ አዛዘቲደ፥ ክርስቶሳና እትፐተን ደእተ።

28 ታ ናቶ፥ ቃይ እ ቆንጭያ ዎደ፥ ኑን ያሽ ባይናዋንታ ግዳናዳንነ፥ አ ዩሳ ጋላስ አ ስንን ኑን ዬላተናዳን፥ አናና እትፐተን ደእተ። 29 ክርስቶስ ጽሎ ግድያዋ ህንተ ኤሮፐ፥ ጽሎባ ኦያ ኡባይ ጾሳ ናኣ ግድያዋ ኤራናዉ በሴ።