1 ታን፥ የሱስ ክርስቶስ ኪቴዳ ጰጽሮስ፥ ጾሳይ ዶሬዳ አሳቶ ጳንጾሳ ጋድያን፥ ጋላትያ ጋድያን፥ ቃጳዶቅያ ጋድያን፥ ኢስያ ቢታንነ ቢታንያ ጋድያን በትያን ደእያዋንቶ ዳብዳቢያ ጻፋይ። 2 የሱስ ክርስቶሳዉ ህንተ አዛዘታና ማላነ አ ሱን ጌያና ማላ፥ ጾሳይ አዉ ዶሬዳ ህንተንቶ ባረ አያናን ጌሼዳዋንቶ፥ አ ኬካተይነ ሳሮተይ ግዶ።

3 ኑን ጾሳ፥ ኑ ጎዳ የሱስ ክርስቶሳ አዉዋ፥ ባረ ማሮተ ዳሩዋዳንካ ኑና ላኤንዋ የሌዳዋ፥ የሱስ ክርስቶሳ ሀይቁዋፐ ደንዳዋን ኑዉ ደኡዋ ህዶታ እሜዳዋ ጋላቴቶ። 4 ቃይ ጾሳይ ህንተንቶ እማና ዳሮ ላታይ ዎቀናዌ፥ ባየናዌነ የናዌ ሳሉዋን ናጌ። 5 ሄዌካ ህንተንቶ፥ ጾሳ ዎልቃን አማኑዋን ናገት ኡቲደ፥ አቶተዉ ጊጌዳዋንቶ ዉርሰ ዎድያን ቆንጫናዋ።

6 ሀእ ጉ ዎደዉ ሀራይ አቶ ዱማ ዱማ ፓጭያን ህንተ ፓጨታናዉ ኮሾፐካ፥ ሀዋን ዳሮ ናሸትተ። 7 ሄዌ ሀራይ አቶ፥ ታማን የግና ይያ ዎርቃፐካ ህንተ አማኑ ዳሮ አልኦነ ባል ባይናዋ ግድያዋ በሳናሳ፤ ያቲደ የሱስ ክርስቶስ ቤትያ ዎደ፥ ጋላታ፥ ቦንቹዋነ ሳባ ህንተ አካና። 8,9 ህንተ አ ኤራና ዮፐካ፥ ሲቂታ፤ ህንተ ሀእ አ በአና ዮፐካ፥ አማኒታ። ቃይ ህንተ ህንተ አማኖ ፖሎ ግድያ ህንተ ሸምፑዋ አቶተ አክያ ድራዉ፥ ኦዳናዉ ዳንዳየተና ቦንቹ ኩሜዳ ናሸቻ ናሸቲታ።

10 ጾሳይ ህንተንቶ እማና አ ኬካተባዉ ትምቢትያ ኦዴዳ ናባቱ ሎይ ብዲደ፥ ሀ አቶተባ ኮዬድኖ። 11 ኡንቱንቱን ደእያ ክርስቶሳ አያናይ ክርስቶሳ ቱጋባነ ሄዋፐ ጉይያን ያና ቦንቹዋባ ካሰቲደ ማርካቲደ፥ አዉደ ዎይ ዋኔዳ ዎድያን ያነንቶነ አኬክሴዳዋዳን፥ ኡንቱንቱ ኮዬድኖ። 12 ሄ ትምቢትያ ኦድያዋንቱ ኦዳ ኦሱ ህንተሳፐ አትን፥ ኡንቱንቱ ሁጲያሳ ግደናዋ ጾሳይ ኡንቱንቶ ቆንጭሴዳ፤ ሀእ ህንተ ስሴዳ ምሽራቹዋ ቃላ ህንተንቶ ኦዴዳ አሳቱ፥ ባረዉ ሳሉዋፐ ኪተቴዳ ጌሻ አያና ዎልቃን ኦዴድኖ። ሄዋ ኪታንቻቱካ በአናዉ አሞቲኖ።

13 ሄዋ ድራዉ፥ ኦሱዋ ኦናዉ ህንተ ዎዛናን ቆፋ ጊግሲደ ህንተ ሁጲያ ናግተ። የሱስ ክርስቶስ ቆንጭያ ዎደ አ ኬካተ ህንተ አክያ ድራዉ፥ ኩመን ህዶታን ናግተ። 14 ጾሳዉ አዛዘትያ ናናዳን፤ ህንተ ካሰ ኤረናን አሞቴዳ አሙዋ ካሎፕተ። 15,16 ሽን ህንተና ጼሴዳ ጾሳይ ጌሻ ግዴዳዋዳን፥ ህንተካ ህንተ ኦሱዋ ኡባን ጌሻ ግድተ። ጾሳ ማጻፋን፥ "ታን ጌሻ ግድያ ድራዉ፥ ህንተካ ጌሻ ግድተ" ጌተቲደ ጻፈቴዳ።✝

17 አሳ ሁጲያን ሁጲያን ዴሙዋ ጼለናን አ ኦሱዋዳን ፕርድያ ጾሳ ዎሲደ ህንተ፥ "ኑ አቦ" ጊደ አ ጼስያዋ ግዶፐ፥ ሀ አላምያን በተ ግዲደ ህንተ ደእያ ዎድያን ያሻተን ደእተ። 18,19 ህንተ ህንተ አዎቱዋፐ ላቴዳ ፓና ደኡዋፐ ዎዘቴዳዌ፥ ይያ ብራ ዎይ ዎርቃ ማላና ግደናዋ ኤሪታ፤ ቦርስያባይ ዎይ ቅታይ ባይና ዶርሳ ሱዳን፥ አልኦ ክርስቶሳ ሱን ህንተ ዎዘቴድታ። 20 ጾሳይ ሳአይ መታናፐ ካሰ ክርስቶሳ ዶር ዎዳ፤ ሽን ህንተ ድራዉ፥ ሀ ዎድያ ዉርሰን እ ቤቴዳ። 21 ህንተ አማኑነ ህንተ አካና ጊደ ናሸቻን ናግ ኡቴዳባይ ጾሳን ደአና ማላ፥ ጾሳይ ሀይቁዋፐ አ ደንደ፥ አዉ ቦንቹዋ እሜዳዋ አን አማኒታ።

22 ቱማተዉ ህንተ አዛዘትያዋን፥ ሎአ ማላትያ ኢታተይ ባይናን ህንተ እሻቱዋ ሲቃናዉ ህንተ ሁጲያ ጌሺደ፥ እቱ እቱዋና ምንሲደ ዎዛናፐ ሲቀትተ።

23 ህንተ ሀይቂያ ዘረፐ ላኤንዋ የለትበይክታ፤ ሽን መናዉ ደእያዋነ ስንዉካ ደአና ጾሳ ቃላን ሀይቀና ዘረፐ የለቴድታ። 24 አያዉ ጎፐ፥ ጾሳ ማጻፋይ፥ "አሳይ ኡባይ ማታ ማላ፤ አ ቦንቹ ኡባይካ ማታ ጪሻ ማላ። ማታይ መሌ፤ ጪሻይካ ቆቆፈቴ።✝ 25 ሽን ጎዳ ቃላይ መናዉ ደኤ" ያጌ። ሀዌ ህንተንቶ ጎዳይ ኦዴዳ ምሽራቹዋ ቃላ።