1 ታን ጳዉሎስ፥ ጾሳ ሸንያን፥ ክርስቶስ የሱስ ኪቴዳዌነ ኑ እሻይ ጽሞቶስ ጾሳዉ ጎይንያ ቆሮንቶሳ ካታማን ደእያ አማንያዋንቶነ አካይያን ደእያ ጾሳ ናናቶ ሀ ዳብዳቢያ ጻፌቶ።
2 ጾሳ ኑ አዉዋፐነ ጎዳ የሱስ ክርስቶሳፐ፥ አ ኬካተይነ ሳሮተይ ህንተንቶ ግዶ።
ጳዉሎስ ጾሳዉ ሺሼዳ ጋላታ
3 ጾሳ ኑ ጎዳ የሱስ ክርስቶሳ አዉዋ፥ ማሮተ አዉዋነ መንዋ ኡባ ጾሳ ጋላታይ ጋኮ፤ 4 ጾሳይ ኑና ኑ ሁጰዉ መንዳ መንዋዳን፥ ዳሮ ዋይያ ዋየትያዋንታ ኑንካ መንናዳን፥ ኑ ዋይያ ኡባን እ ኑና መን። 5 አያዉ ጎፐ፥ ኑን ክርስቶሳ ባጋና ዳሮ ዋይያ ዋየትያዋዳን፥ ሄዋዳንካ፥ ቃይ ኑና አ ባጋና ዳሮ መንዋን መን። 6 ኑን ዋየቶፐ፥ ሄዌ ህንተና መንናሳነ ህንተና አሻናሳ፤ ቃይ ኑን ምነቶፐ፥ ኑን ዳንዳዬዳ ዋይያ ማላ ህንተካ ገንጪደ ዳንዳያና ማላ፥ ጾሳይ ህንተዉካ ቃይ መንዋነ ዳንዳያ እማናሳ። 7 ህንተ ደማና ጊደ፥ ህዶታን ናግ ኡቴዳዌ ዳሮ ምና፤ አያዉ ጎፐ፥ ህንተ ኑናና ዋየቴዳዋዳን፥ ሄዋዳን መንዋካ ኑናና አካናዋ ኑን ኤሬቶ።
8 ኑ ኑናዳን ጾሳ ካልያዋንቶ፥ ኑን ኢስያ ጋድያን ዋየቴዳ ዋይያ ህንተና ሀሳይሳናዉ ኮዬቶ፤ ኑ ዋዪ ኑ ዎልቃፐ ዳርና፥ ኑና ዎ ጊደ፥ ህርጋና ጋካናዉ፥ ኑና ዎጋይ ባይናዋ ዴጼዳ። 9 ኑን ኑ ቦላ ሀይቁዋ ፕርዳይ ፕርደቴዳ ያጊደ ቆፔዶ፤ ሽን ሄዌ ሀኔዳዌ ሀይቄዳ አሳ ሀይቁዋፐ ደንያ ጾሳን ኑን አማነታናፐ አትን፥ ኑ ሁጲያን አማነተናዳና። 10 ጾሳይ ሀዋ ማላ ኢታ ሀይቁዋፐ ኑና አሼዳ፤ እ ኑና አሻና፤ ስንፐካ እ ኑና አሻናዋ ጊደ፥ ህዶታን ናግ ኡቴዶ። 11 ህንተ ዎሴዳ ዳሮ ዎሳን ኑዉ አንጁ ስሜዳ ድራዉ፥ ዳሮ አሳይ ኑ ድራዉ ጾሳ ጋላታና ማላ፥ ህንተካ ቃይ ኑና ዎሳን ማዳና ኮሼ።
ላመቴዳ ጳዉሎሳ ቆፋ
12 ኑን ጬቀትያዌ ሀዋ፤ ሀ ሳኣን ኑን ደእያ ደኡ፥ ኡባ ቃይ ህንተናና ኑዉ ደእያ እትፐተይ ጾሳ አ ኬካተናፐ አትን፥ አሳ አዳ ኤራተና ግደናዋ፥ ቃይ ጾሳይ እሜዳ ጌሻተንነ ሱረተን ኑን ደእያዋ ዎዛና ቆፋይ ኑዉ ማርካቴ። 13,14 አያዉ ጎፐ፥ ህንተ ናባባናዉነ አኬካናዉ ዳንዳይያዋ ጻላላ ህንተንቶ ጻፍያዋፐ አትን፥ ኑን ሀራባ ህንተንቶ ጻፎኮ። ኑ ጎዳ የሱሳ ጋላስ ኑን ህንተናን ጬቀታናዋዳን፥ ህንተካ ኑናን ጬቀታና ማላ፥ ህንተ ሀእ ዉርስ አኬከና የዉዋ ግድን ዉርስ አኬካና ጋደ ቆፓይ።
15 ሄዋ ታን ሎይ ኤሬዳ ድራዉ፥ ህንተ ላኡ ገደ ጎኤታና ማላ፥ ኡባፐ ካሰታደ ህንተኮ ባናዉ ቆፋ ቃቻድ። 16 ታን ማቅዶንያ ባደ ህንተናና ጋከታናዋነ ቃይ ያፐ ስማደ ህንተ ማታና ይሁዳ አሽን፥ ህንተ ታና ማዳናዋ ቆፓ ኡታድ። 17 ሄዋ ድራዉ፥ ታን ሄዋ ቆፓደ ታናን አማነትበይክታ? ታን ታ ቆፋ ቃችያ ዎደ፥ ሳኣ አሳዳን እት ኩን፥ "ኤ፥ ኤ" ዎይ፥ "ግደና፥ ግደና" ጋናዉ ጊጋ ኡታድታ?
18 ሽን ጾሳይ አማነቴዳዋ ግድያዌ ቱማ ግድያዋዳን፥ ኑን ህንተንቶ ኦድያ ቃላይ "ኤ" ግያዋነ "ግደና" ግያዋ ግደና። 19 አያዉ ጎፐ፥ ታን፥ ስላሰነ ጽሞቶስ ህንተ ግዶን ኦዴዳ ጾሳ ናአይ፥ የሱስ ክርስቶስ "ኤ" ግያዋፐ አትን፥ "ግደና" ግያዋ ግደና። ሽን ጾሳ ባጋና እ ኡባ ዎደካ "ኤ"። 20 አያዉ ጎፐ፥ ጾሳይ እማና ጌዳባዉ ኡባዉ ኤኖ ጌዳዌ ክርስቶሳ ባጋና ፖለታና፤ ሄዋ ድራዉ፥ ኑን ክርስቶሳ ባጋና ጾሳ ቦንቾ፥ አመንእ1:20 አመንእ፦ "አመንእ" ግያ ቃላይ ሀዋን "ኤ" ያገትያ ብለ ኦይቄ። ጌቶ። 21 ጾሳይ ክርስቶሳ ባጋና ኑናነ ህንተና መንነ ኦኬ። 22 ኑን አዋ ግድያዋ ኤርስያ ማታፋ እ ኑ ቦላ ዎደ፥ ባረ ጌሻ አያና ዋስያዳን፥ ኑ ዎዛና ግዶን ዎዳ።
23 ቃይ ታን ቆሮንቶሳ ቤናን አጌዳዌ ህንተና ቆሄናዳና። ሄዌ ዎርዶ ግዶፐ ታና ሙራናዉ ታ ሸምፑዋን ጾሳይ ማርካ። 24 ኑን ህንተና ናሸቻናዉ ህንተናና እትፐ ኦያዋንታፐ አትን፥ ህንተ አማንያዋን ህንተና ጎደታናዉ ኮይያዋንታ ግዶኮ፤ አያዉ ጎፐ፥ ህንተንቱ ህንተ አማኑሳን ምኒደ ደኢታ።