1 ህንተ ታ ኤያተ ጉ ዳንዳይንቶ ሎአ። ሀያና ዳንዳይተ። 2 ጾሳይ ቃናትያዋዳን፥ ታንካ ህንተዉ ቃናታይ፤ አያዉ ጎፐ፥ ታን ህንተና እት አቱማዎ፥ ክርስቶሳዉ እማና ጋደ፥ አቱማዋ ኤረና ጌሻ ዎዶራቲዳን ጊግሳ ዎድ።

3 ሽን ሾሻይ ባረ ማካላን ሄዋኖ ባለዳዋዳን፥ ክርስቶሳዉ ህንተ እሜዳ ህንተ ሱረ ቆፋይ ባይቤናዌ ዎራ ባንዴሻ ጋደ ህርጋይ።✝ 4 አያዉ ጎፐ፥ እት ኡራይ ዪደ፥ ኑን ህንተንቶ ኦዴዳ የሱሳፐ ሀራ የሱሳ ህንተንቶ ኦዶፐ፥ ዎይ ህንተ አኬዳ አያናፐነ ዎንጋላፐ ዱማ አያናነ ዎንጋላ ህንተ አኮፐ፥ ህንተ ኤኖ ጊደ አኬድታ ጉሳ።

5 የሱስ ኪቴዳ ሀ ዋናቱዋፐ ታን አያንካ ላፍያዋ ታዉ ማላተና። 6 ታን ሃሳይያ ሃሳያን ታማራቤና አሳ ግዶፐካ፥ ኤራተን ግድከ፤ ሽን ኑን ህንተንቶ ሀ የዉዋ አሳ ኡባ ግዶን ኡባ ባጋና ቆንጭሴዶ።

7 ዎይ ታን ህንተና ሚሻ ኦቼናን፥ ጾሳ ምሽራቹዋ ቃላ ህንተንቶ ጮ ኦዴዳዌነ ህንተና ቁ ኦናዉ ታ ሁጲያ ቶቼዳዌ ታዉ ናጋራ ግዳንዴሻ? 8 ታን ህንተንቶ ኦናዉ ሀራ አማንያ አሳፐ ሚሻ አኬዳዎ፥ ሄዋንታ ቦንቃድ። 9 ቃይ ታን ህንተናና ደእሽን፥ ታና መትና፥ ህንተፐ እት ኡራካ ዋይሳበይከ። አያዉ ጎፐ፥ ማቅዶንያፐ ዬዳ እሻቱ ታና ኮሼዳ ኡባባ ታዉ እሜድኖ፤ ታን ህንተና ዋይሰና ማላ፥ ካሰ ቶኮ ግዳቤናዋዳንካ ስንዉካ ቶኮ ግድከ። 10 ክርስቶሳ ቱማተይ ታናን ደእሽን፥ ሀ ታ ጬቁ አካይያ ጋድያን ሀቃንነ አተና። 11 ታን ሀዋ አያዉ ጋይታ? ህንተና ሲቀና ድራሴ? ታን ህንተና ሲቅያዋ ጾሳይ ኤሬ።

12 ሽን ሄ ባረንቱ ጬቀትያዋን ኑን ኦያዋዳን ኦናዉ ጋሶትያዋንቱ ጋሱዋ ድጋናዉ፥ ሀእ ታን ኦያ ኦሱዋ ጉጃደ ኦና። 13 አያዉ ጎፐ፥ ኡንቱንቱ የሱስ ኪትቤና ዎርዶ አሳቱዋ፤ ሄዋንቱ ማላ አሳቱ ክርስቶስ ኪቴዳዋንታ ማላታናዉ ባረንቱ ማላ ላመረያ ኪተትቤና ዎርዳንቻቱዋነ ላባንቻ ኦሳንቻቱዋ። 14 ሄዌ ማላልስያዋ ግደና፤ አያዉ ጎፐ፥ ሴጻናይ ባረ ሁጰዉ ፖኡዋ ኪታንቻ ማላታናዉ ባረ ማላ ላሜ። 15 ሄዋ ድራዉ፥ ሴጻና ኦሳንቻቱ ጽሎተ ኦሳንቻቱዋ ማላታናዉ ባረንቱ ማላ ላሞፐ፥ ሄዌ ዎልቃማባ ግደና፤ ኡንቱንቱ ዉርሰን ባረንቱ ኦሱዋ ማላ አካና።

16 ታን ላኤንዋካ ጋይ፤ ታና ኦንነ ኤያ ጊደ ቆፖፖ፤ ሽን ህንተ ታና፥ እ ኤያ ጎፐካ፥ ታን ጉ ጬቀታናዳን፥ ታና ኤያ ጊተ። 17 ታን ሀዋዳን ጻላደ ጬቀታደ ሃሳይያዌ፥ ኤያተ ሃሳያፐ አትን፥ ታና ጎዳይ አዛዝና ግደና። 18 ዳሮ አሳይ ሀ ሳኣባን ጬቀትያ ድራዉ፥ ታንካ ጬቀታና። 19 ህንተ አዳ ኤራንቻ ግድያ ድራዉ፥ ኤያ አሳዋ ናሸቻን ዳንዳዪታ። 20 አያዉ ጎፐ፥ ኦንነ ህንተና አይለዮፐ፥ ዎይ ህንተዋ ሞፐ፥ ዎይ ህንተዋ ቦንቆፐ፥ ህንተ ቦላ ኦቶረቶፐ፥ ዎይ ህንተ ሻይያ ባቆፐ፥ ዳንዳዪታ። 21 ኑን ሄዋ ኦናዉ ዳሮ ዳቡራንቻ ግዴዳዋ ታን ዬላታደ ኦዳይ።

ሽን ኦንነ እትባን ጻሊደ ጬቀቶፐ፥ ታንካ ጬቀታናዉ ጻላይ፤ ታን ኤያ አሳዳን ሃሳያይ። 22 ኡንቱንቱ እብራዌ? ታንካ እብራዌ። ኡንቱንቱ እስራኤልያ አሴ? ታንካ እስራኤልያ አሳ። ኡንቱንቱ አብራሃመ ዛረ? ታንካ ቃይ አብራሃማ ዛረ። 23 ኡንቱንቱ ክርስቶሳ ቆማቴ? ታንካ ኡንቱንቱፐ አያ ቆማ፤ ታን ጎይያ አሳዳን ሃሳያይ፤ ታን ዳሮ ኦ ዳቡራድ፤ ዳሮ ዎድያ ቃሸታድነ ልሱዋን ሾጨታድ፤ ቃይ ዳሮ ዎድያ ሀይቃደ አታድ። 24 አይሁዳቱ ታና እቼሹ ገደ፥ ሀታማነ ኡዱፑኑዋ ልሱዋን ሾጬድኖ።✝ 25 ሮመ አሳይ ታና ሄዙ ገደ ጻምኣን ሾጬዳ፤ እት ጋላስ ሹቻን ጫድ ጫዲደ አጌዳ፤ ማርካቢ ሄዙ ገደ መእና፥ አባ ግዶን እት ቃማነ እት ጋላሳ አቃደ ፔሻድ። 26 ታን ዳሮ ኦግያ ሀመታድ፤ ታና ኩን ሃይነ ቦንቃንቻቱ ቦንቂ ድጊደ አሼዳ፤ ቃይ ታ ቢታ አሳይነ አይሁዳ ግደና አሳይ ቦንቂ ድጊደ አሼድኖ። ቃይካ ካታማይ፥ ባዙ፥ አባይ፥ ታና ያሽሴዳ፤ ዎርዱዋ ዳባቱካ ታና ቦንቂ ድጊደ አሼድኖ። 27 ታን ዳቡራድነ መቶታድ። ዳሮ ገደ ገምእሹዋ ያድ፤ ኮሻታድ፤ ሳመታድ። ዳሮ ገደ ጾማድ፤ ቃይ ሜገታድነ ካሎታድ።

28 ሀራባ ኡባፐካ ኡባ ጋላስ ታዉ ቶኩዋ ግዴዳባይ፥ ዎሳ ጎልያ ኡባዉ ህርግያዋ። 29 ዳቡርያዌ ኦኔ? ታን ዳቡርክታዬ? ናጋራን ገልያዌ ኦኔ? ታን ኡንኤታደ አዉ ቃረትክታዬ?

30 ታን ጬቀታናዉ ኮሽያዋ ግዶፐ፥ ታን ዳቡራንቻ ግድያዋ ኤርስያዋን ጬቀታና። 31 መናዉ አንጀቴዳ ጾሳይ፥ ኑ ጎዳ የሱስ ክርስቶሳ አዉ፥ ታን ዎርዶተናዋ ኤሬ። 32 ዳማስቆ ካታማን አረታሳ ግያ ካትያፐ ጋርሳና ጋድያ ሞድያዌ፥ ታና ኦይናዉ ዳማስቆ ካታማ ናግሴ። 33 ሽን ካታማ ግምቢያ ድርሳ ማስኮትያና ታና ቁንኣን ዱገ ዎና፥ አፐ ከሳ አካድ።