2 Coríntios 2

1 ታን ላኤንዋ ህንተና ካዮየና ማላ፥ ህንተኮ ቤናዳን፥ ታ ቆፋ ቃቻድ። 2 አያዉ ጎፐ፥ ታን ህንተና ካዮይያዋ ግዶፐ፥ ሀ ታን ካዮዬዳ ህንተ ታና ናሸቻናፐ አትን፥ ኦኔ ታና ናሸቻናዌ? 3 ታን ህንተንቶ ሄ ዳብዳቢያ ጻፌዳዌ፥ ታና ናሸቻናዉ በስያ አሳቱዋን ታን ካዮታናዉ ህንተኮ ባናዉ ኮያቤናዋሳ፤ ታን ናሸትያ ዎደ፥ ህንተ ኡባይካ ቃይ ናሸታናዋ ህንተ ኡባን አማነታይ። 4 አያዉ ጎፐ፥ ታን ህንተንቶ ዳሮ ዋይያንነ ቱጋን ቃይ ዳሮ አፎና ጻፌዳዌ፥ ህንተና ካዮያናሳ ግደና፤ ሽን ታን ህንተና ኡባቱዋ አይ ኬና ሲቃይታንቶ ህንተ ኤራናዳና።

ባይዛንቻዉ አቶ ግያዋ

5 ሽን እት ኡራይ ሀራ ካዮዬዳዋ ግዶፐ፥ ታን አ የዉዋ ዳርሳናዉ ኮይከ፤ እ ህንተና ኡባቱዋ ካዮዬዳፐ አትን፥ ታ ጻላላ ካዮይቤና። 6 ህንተፐ ዳርያ ባጋ አሳይ ሄ ብታንያ ማላ አሳ ሄዋዳን ሙሮፐ፥ ሄ ሙራይ አዉ ግዳናዋ። 7 ሄዋ ድራዉ፥ ሄ ብታኒ ሎይ ካዮተና ማላ፥ ህንተ አዉ አቶ ጋናዉነ አ መንናዉ በሴ። 8 ሄዋ ድራዉ፥ ህንተ አ ምንሲደ ሲቅያዋ እ ኤራና ማላ፥ ታን ህንተና ዎሳይ። 9 አያዉ ጎፐ፥ ህንተ ታዉ አዛዘታናዉ ኡባ ዎደ ጊግ ኡቴድተንቶነ ቃይ ፓጭያ ህንተ ዳንዳይንቶ ኤራናዉ፥ ሄ ዳብዳቢያ ህንተንቶ ጻፋድ። 10 እት ኡራይ ናቄዳዋ ህንተ አቶ ግያ ዎደ፥ ታንካ ቃይ አቶ ጋይ፤ ታን አቶ ጌዳዋ ግዶፐ፥ አቶ ጌዳዋ አያነ ክርስቶሳ ስንን ህንተ ድራዉ፥ አቶ ጋድ። 11 ሴጻናይ ኑኮ ዪደ፥ ኑና ጭመና ማላ፥ ታን አቶ ጋድ፤ አያዉ ጎፐ፥ ኑን አ ቆፋ ኤሬቶ።

ኦራ ጫቁዋ ኦሳንቻቱዋ ጾኑዋ

12 ታን ክርስቶሳ ምሽራቹዋ ቃላ ኦዳናዉ ጽሮኣዳ ቤዳ ዎደ፥ ጎዳይ ያን ታዉ ፐንግያ ዶይ ዎዳ። 13 ታን ታ እሻ ቲታ ያን ደማቤና ድራዉ፥ ታዉ አያናይ ሸምፕቤና። ሄዋ ድራዉ፥ ያን ደእያ አሳ፥ "ሳሮ ደእተ" ጋደ ማቅዶንያ ባድ።

14 ሽን ክርስቶሳ ባጋና ኡባ ዎደ ኑና ጾኖ ካለያ ጾሳ፥ ቃይ ክርስቶሳ ትምርትያ ኑ ባጋና ሽቱዋዳን፥ ኡባሳ ጋያዋ ጋላታይ ጋኮ። 15 አያዉ ጎፐ፥ ኑን አትያ አሳ ግዱዋንነ ይያ አሳ ግዶን ክርስቶስ ጾሳዉ ያርሽያ ሳዉዋ ቶሽኩ ግያ ሽቱዋ ማላ። 16 ኑን ይያዋንቶ ዜእያ ሀይቁዋ፤ ቃይ አትያዋንቶ ደኡዋ እምያ ሳዊያ ሽቱዋ፤ ያትና፥ ሄዋ ኦናዉ ዳንዳይያዌ ኦኔ? 17 ኑን ጾሳ ቃላ ገሎባዳን፥ ዋላኪደ ዛልእያ ሀራ ጮራ አሳቱዋ ማላ ግዶኮ፤ ሽን ጾሳይ ኑና ኪትና፥ አማነቲደ ጾሳ ስንን ክርስቶሳ ባጋና ቃላ ኦዴቶ።