ጾሳ ኦራ ጫቁዋ
1 ኑን ሽረቲደ፥ ኑ ሁጲያ ሳባናዉ ዶሜዶዬ? ዎይ ሀራ አሳቱዋዋዳን፥ ሳባ ዳብዳቢያ ህንተንቶ የዳናዉ ዎይ ህንተፐ አካናዉ ኮዬቶ? 2 ህንተንቱ ህንተ ሁጲያን አሳይ ኡባይ ኤራናዳንነ ናባባናዳን፥ ኑ ዎዛናን ጻፈት ኡቴዳ ኑ ዳብዳቢያ። 3 ሀ ዳብዳቢያ ክርስቶስ ባረ ሁጲያን ጻፊደ፥ ኑ ቦላ ኪቴዳዌ ቱማ፤ ሀ ዳብዳቢ ደኡዋ ጾሳ ጌሻ አያናን አሳ ዎዛናን ጻፈቴዳዋፐ አትን፥ ሹቻ ቦላ ቃላምያን ጻፈትቤና።3:3 ከሳ 24:12፤ ኤር. 31:33፤ ህዝ. 11:19፤ 36:26
4 ኑዉ ክርስቶሳ ባጋና ጾሳን ሀዋ ማላ አማኑ ደኤ። 5 ኑ ዳንዳያይ ጾሳፐ ይያዋፐ አትን፥ ሀ ኦሱዋ ኑን ኑ ሁጲያን ኦናዉ ዳንዳዬቶ ግያዌ ኑዉ አያይነ ባዋ። 6 ኑን ኦራ ጫቆ ኦና ማላ፥ ጾሳይ ኑና ዳንዳይሴዳ፤ ሄ ኦራ ጫቁ ጌሻ አያናዋፐ አትን፥ ጻፈቴዳ ህግያዋ ግደና። ጻፈቴዳ ህጊ ሀይቁዋ አሄ፤ ሽን ጌሻ አያናይ ደኡዋ አሄ።3:6 ኤር. 31:31
7 ሹቻ ዎጪደ ጻፌዳ ህጊ እመትያ ዎደ፥ ጾሳ ቦንቹ ቤቴዳ፤ ሙሴ ሶምእያን ደእያ ጶለይ ይያዋ ግዶፐካ፥ ሄ ጶለይ ዳሮ ዎልቃማ ግድያ ድራዉ፥ እስራኤልያ አሳይ አ ሶምእያ ትሽ ኦ ጼላናዉ ዳንዳይቤና። ሀይቁዋ አህያ ህጊ ኦያ ኦሱ ሀዋ ማላ ቦንቹዋና ይያዋ ግዶፐ፥3:7 ከሳ 34:29 8 ጌሻ አያናይ ኦያ ኦሱዋ ቦንቹ አይ ኬና ዳራኔ? 9 አያዉ ጎፐ፥ አሳይ ፕርዳ አክያ ኦሱ ቦንቾ ግዶፐ፥ አሳይ ጽልያ ኦሱዋ ቦንቹ ዋኒደ ዳራንዴሻ? 10 አያዉ ጎፐ፥ ካሰ ቦንቹ ሀእ ባረፐ ሎይ አያ ቦንቹዋ ጋሱዋን ቦንቹዋ ዬዳዌ ቱማ። 11 አያዉ ጎፐ፥ ሄ ዬዳዋን ቦንቹ ደእያዋ ግዶፐ፥ መናዉ ደእያዋን አይ ኬና ዎልቃማ ቦንቹ ደአንዴሻ?
12 ኑን ህዶታን ናግያ ሀዋ ማላባይ ኑዉ ደእያ ድራዉ፥ ቆንጭያን ጻሊደ ሃሳዬቶ። 13 እስራኤልያ አሳይ ይያ ቦንቹዋ ዉርሰ በኤና ማላ፥ ባረ ሶምእያ ናጻላን ካሜዳ ሙሴ ማላ ግዶኮ።3:13 ከሳ 34:33 14 ሽን ኡንቱንቱ ዎዛናይ ዶንጭሌዳ፤ አያዉ ጎፐ፥ ኡንቱንቱ ኤጫ ጫቁዋ ናባብያ ዎደ፥ ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ፤ ኦንነ ክርስቶሳና ጋከትያ ዎደ ጻላላን ሄ ናጻላይ ክቼ። 15 ሽን ኡንቱንቱ ሙሴ ማጻፋ ናባብያ ዎደ ኡባን ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ። 16 ሽን ጾሳ ማጻፋይ፥ "ኦንነ ጎዳኮ ስምያ ዎደ፥ አዉደነ ሄ ናጻላይ ቃረቴ" ያጌ።3:16 ከሳ 34:34 17 ጎዳይ ጌሻ አያና። ጎዳ አያናይ ደእያ ሳን አይለተይ ባዋ። 18 ኑን ኡባይካ ናጻላን ካመትቤና ሶምእያን ጎዳ ቦንቹዋ በአና3:18 ናጻላን ካመትቤና ሶምእያን፦ እት አሳ ደኡዋን ስን ሀናናባይ፥ ካሃ ጋርሳን ጶልቂ ቤትያዋዳን ጉሳ። ቃይ ጌሻ አያና ግድያ ጎዳፐ ይያ ሄ ቦንቹ ኑና ባረና ማላትሲደ፥ ቦንቹዋፐ ቦንቾ ላማና።