ጳዉሎስ ባረ ኦሱዋን አማነቴዳ አሳ
1 ስም ጾሳይ ኑዉ ሀ ኦሱዋ ባረ ማሮተን ኦናዳን እሜዳ ድራዉ፥ ኑን ሳለቶኮ። 2 ኑን ጌማን ኦያ ዬላይያ ኦሱዋ ኡባ አጎይተ፤ ቃይ ገንያ ኦሱዋካ ኦኮ፤ ዎይ ጾሳ ቃላ ዎርዱዋና ዋላኮኮ። ሄዋዳንካ፥ ቱሙዋ ቆንጭያን ሃሳዪደ፥ ጾሳ ስንን ሱረ ዎዛናዉ ኑና ሺሾይተ።
3 ኑን ኦድያ ዎንጋላ ምሽራቹ ጌሜዳዋ ግዶፐካ፥ ይያ አሳቱዋ ጻላላዉ ጌሜዳ። 4 ሀ ሳኣ ጾሳይ አማነና አሳቱዋ ቆፋ ጆልሴዳ፤ ክርስቶሳ ቦንቹዋ፥ ዎንጋላ ምሽራቹዋ ፖኡዋ ባረንቶ ፖእያዋ፥ ጾሳ ማላትያዋ ኡንቱንቱ በኤና ማላ፥ ኡንቱንታ ድጌዳ። 5 አያዉ ጎፐ፥ የሱስ ክርስቶስ ጎዳ ግድያዋነ አ ድራዉ ኑን ኑ ሁጲያን ህንተንቶ ቆማ ግድያዋ ኦደቶፐ አትን፥ ኑባ ኦዶኮ። 6 አያዉ ጎፐ፥ "ማፐ ፖኡ ፖአና" ጌዳ ጾሳይ ኑ ዎዛናን ባረ ፖኡዋ ፖእሴዳ፤ ቃይ እ ባረ ቦንቾ ኤራተ ፖኡዋ ክርስቶሳ ስንን ፖእያዋ ኑዉ እማናዉ ፖእሴዳ።4:6 ዶመ 1:3
7 ሽን ኡባፐ አያ ዎልቃይ ጾሳዋፐ አትን፥ ኑሳ ግደናዋ በሳናዉ ኑዉ ሀ ምንጃይ ኡርቃፐ መቴዳ ሚሻ ግዴዳ ኑ ግዶን ደኤ።
8 ኑን ኡባ ባጋናካ ኡንኤቴዶ፤ ሽን መኤረትበይኮ፤ ቃይ እት እት ዎደ ስቶ፤ ሽን ኑ ኡባናካ አግበይኮ። 9 ኑን የደርሰቴዶ፤ ሽን ጾሳይ ኑና ኦልቤና፤ ቃይ ኑ ሞርከቱ ኑና ኦል አጌድኖ፤ ሽን ኑን ይበይኮ። 10 ቃይ የሱሳ ደኡ ኑ አሳተን ቤታና ማላ፥ ኑን ኡባ ዎደ አ ሀይቁዋ ኑ አሳተን ቶክ ዩዬቶ። 11 አያዉ ጎፐ፥ ሀይቂያ ኑ አሳተ ቦላ የሱሳ ደኡ ቤታና ማላ፥ ፓጻ ደእያ ኑን አ ድራዉ፥ ኡባ ዎደ ሀይቄቶ። 12 ሄዋ ድራዉ፥ ሀይቁ ኑ ግዶን ኦ፤ ሽን ደኡ ቃይ ህንተ ግዶን ኦ።
13 ጾሳ ማጻፋይ፥ "ታን አማኔዳ ድራዉ ሃሳያድ" ያጌ፤ ሄ አማኑዋ አያናይ ኑዉካ ደእያ ድራዉ፥ ኑንካ አማኔቶ፤ ሄዋ ድራዉ፥ ሃሳዬቶ።4:13 ማዝ. 116:10 14 ጾሳይ፥ ጎዳ የሱሳ ሀይቁዋፐ ደንዳዌ፥ ኑናካ ቃይ የሱሳና ሀይቁዋፐ ደንደ፥ ህንተናና እትፐ ባረ ስን ሺሻናዋ ኤሬቶ። 15 ሀዌ ኡባይ ህንተ ድራሳ፤ ጾሳ አ ኬካተይ ዳሮ አሳ ጋክያ ዎደ፥ አሳይ ጾሳ ቦንቾ ዳሮ ጋላታ እማና።
አማኑዋን ደኡሳ
16 ሄዋ ድራዉ፥ ኑን ሳለቶኮ፤ ኑዉ ሀራይ አቶ፥ ቦላ ባጋ አሳተይ ዎቂንቶካ፥ ጋርሳ ባጋ አሳተይ ጋላሳን ጋላሳን ኦራጼ። 17 አያዉ ጎፐ፥ ሀእዉ ዋየትያ ሀ ጉ ዋዪ፥ ኡባፐ ሎይ ዳርያ መና ቦንቹዋ ኑዉ ቤትሳና። 18 ኑን ቤተናዋ ጼሌቶፐ አትን፥ ቤትያዋ ጼሎኮ፤ አያዉ ጎፐ፥ ቤትያባይ ሀእሳ፤ ሽን ቤተናዌ መናዉ ደእያዋ።