1 ኑዋዳን ጾሳ አሳቶ፥ ጾሳ አ ኬካተይ ማቅዶንያ አማንያዋንቱ ግዶን ኦዳዋ ህንተና ኤርሳናዉ ኮዬቶ። 2 ኡንቱንቱ አዳ ዋይያን ዎልቃማ ፓጭያ ፓጨቴድኖ፤ ሽን ኡንቱንቱ ህዬሳ ግዶፐካ፥ ባረንቱ እምያዋን ዳሮ ኬክኖነ ቃይ ዎልቃማ ናሸቻ ናሸቲኖ። 3 አያዉ ጎፐ፥ ኡንቱንቱ ባረንቱ ዎልቃ ኬና ቃይ ሀራይ አቶ ባረንቱ ዎልቃፐካ ዳርያዋ ዶሲደ እሜዳዎ ታን ማርካ። 4 ኡንቱንቱ ጾሳ አሳቱዋ ማድያ ሎኦ ኦሱዋ ኑናና ኦናዉ ኑና ዳሮ ዎሴድኖ። 5 ኡንቱንቱ ኑን ቆፔዳዋፐ አደ ኦድኖ፤ ካሰቲደ ኡንቱንቱ ባረንቱ ሁጲያ ጎዳዉ እሜዳዋፐ ጉይያን፥ ጾሳ ሸንያዳን፥ ኑዉካ ባረንቱ ሁጲያ እሜድኖ።

6 ሄዋ ድራዉ፥ ኑን ሀ ሎኦ ኦሱዋ ዶሜዳ ቲቶ ጉጅ ኦናዳንነ ህንተና ማዲደ፥ ሄ ኦሱዋ ፖልሳናዳን አ ዎሴዶ። 7 ሽን ህንተ ኡባባን፥ አማኑዋን፥ ሃሳያን፥ ኤራተን፥ ዎልቃማ ሎኦ አሙዋን፥ ኑና ሲቅያዋንካ ዱረቴዳዋዳን፥ ሀ ሎኦ ኦሱዋንካ ህንተንቱ ኬካ ግዳናዋ ኑን ኮዬቶ።

8 ታን ሄዋ አዛዛናዉ ጊከ፤ ሽን ሀራቱዋ ዎልቃማ ሎኦ አሙዋ ባጋና ህንተ ሲቁ አይ ኬና ቱመንቶ ኤራናዉ ጋይ። 9 አያዉ ጎፐ፥ ህንተ ኑ ጎዳ የሱስ ክርስቶሳ አ ኬካተ ኤሪታ፤ ክርስቶስ ዱረ ግድ ደኢደ፥ ህንተ አ ህዬሳተን ዱረታናዳን፥ ህንተ ድራዉ ህዬሴዳ።

10 ታን ሀ የዉዋ ህንተና ዞርያዌ ሀዋ፤ ዝላይ ህንተ ዶሜዳዋ ሀእ ዉርስያዌ ህንተንቶ ሎአ፤ ህንተ ኦሶ ጻላላዉ ግደናን፥ ኦና ቆፋዉካ ካሰቴዳዋንታ። 11 ህንተ ኦናዉ ሎይ አሞቴዳዌ ኦደ ፖሌዳዋና ጊጋ ግዳና ማላ፥ ህንተንቶ ዳንዳየቴዳዋዳንካ ኦሱዋ ፖልተ። 12 አያዉ ጎፐ፥ እት ኡራይ እማናዉ ሎይ ኮዮፐ፥ እ ባረዉ ደኤዳ ኬና እማናፐ አትን፥ አዉ ባይናዋ አፐ አከና።

13 አያዉ ጎፐ፥ ታን ሀራንቱ ዋይያፐ ሸምፕና፥ ህንተ ዋየትተ ጊከ፤ ህንተ ኡባይካ ቃራ ደአናዳናፐ አትን። 14 ኡንቱንቱ ፓላሀይ ህንተ ፓጫ ኩንና ማላ፥ ህንተንቶ ሀ ዎድያን ደእያ ፓላሀይ ኡንቱንቱ ፓጫ ኩንና ኮሼ፤ ላኡካ ሄዋን ቃራን ጎኤቲኖ። 15 ጾሳ ማጻፋን፥ "ዳርሲደ ሺሼዳዎ ፓላህቤና፤ ቃይ ጉ ሺሼዳዎካ ፓጭቤና" ጌተቲደ ጻፈቴዳ።✝8:15 ከሳ 16:18

16 ሽን ኑን ህንተንቶ ቆፕያዋ ማላ፥ ዎልቃማ ቆፋ ቲታ ቆፍሴዳ ጾሳ ጋላታይ ጋኮ። 17 ቲቶ ህንተኮ ባናዉ ባረ ቆፋ ቃቼዳዌ፥ ባረ ሁጲያን ህንተና ማዳናዉ ዳሮ አሞቴዳ ግሻፐ አትን፥ ኑ ዞርያ ጻላላ አኬዳዋና ግደና። 18 ምሽራቹዋ ቃላ ኦድያ ባረ ኦሱዋን አማነትያ አማንያዋንቱ ስን ኡባን ዳሮ ቦንቼቴዳ እሻ ኑን አናና እትፐ ኪቴቶ። 19 ሄዋ ቦላን ቃይ፥ ሀ ኑን ኦያ ሎኦ ኦሱዋ እ ኑናና እትፐ ኦናዉነ ጎዳ ቦንቾ ኑን ሀራቱዋ ማዳናዉ ሎይ አሞትያዋ በሳናዉ አማንያ አሳቱ አ ዶሪደ ሱንድኖ።

20 ኑን ኦያ ሀ ኬካ እሞታ ድራዉ፥ ኦንነ ኑና ዝግረና ማላ ናገቴቶ። 21 አያዉ ጎፐ፥ ኑን ጎዳ ስንን ሎኦባ ኦናዋ ጻላላ ግደና፤ ሽን አሳ ስንንካ ሎኦባ ኦናዉ ቆፔቶ።✝8:21 ሌም. 3:4

22 ኑን ዳሮ ገደ ፓጭ በኤዳ ኑ እሻ፥ ኡባ ዎደ ህንተና ማዳናዉ ዳሮ አሞትያዋ፥ ሀ አሳቱዋና ህንተኮ ኪቴቶ፤ ቃይ ሀእ እ ህንተና ዳሮ አማንያ ድራዉ፥ ህንተና ማዳናዉ ካሰዋፐ አደ ሎይ አሞቴ። 23 ቲቶዋ ግዶፐ፥ እ ህንተና ማዳናዉ ታናና እትፐ ኦያ ታ ላግያ፤ የኮ እሻቱዋባ ግዶፐ፥ ኡንቱንቱ አማንያ አሳቱ ኪቴዳዋንታነ ኡንቱንቱ ደኡ ክርስቶሳ ቦንችስያዋ። 24 ስም አማንያዋንቱ ኡባቱ ህንተ ሲቁ ቱማ ግድያዋ ኤራና ማላ፥ ቃይ ኑን ህንተዋ ሳቢያዌ ልከ ግድያዋ ኤራና ማላ፥ ህንተ ሲቁዋ ኡንቱንታ በስተ።