ፓጫይ ደእያዋንታ ማዱሳ
1 ይሁዳን ደእያ ጌሻ አሳቱዋ ማዳናዉ የድያባዉ ታን ህንተንቶ ጻፋናዉ ኮሸና። 2 ህንተ ማዳናዉ ሎይ አሞትያዋ ታን ኤርያ ድራዉ፥ ማቅዶንያን ደእያ አሳዉ ህንተዋ ሳባድ። ታን ኡንቱንቶ፥ "አካይያን ደእያ እሻቱ ዝላይፐ ዶሚደ፥ ማዳናዉ ጊገቴድኖ" ያጋደ ኦዳድ፤ ቃይ ህንተ ዎልቃማ አሙካ ኡንቱንቱፐ ዳርያ ባጋ ደንዳ። 3 ሽን ታን ኡንቱንቶ ጌዳዋዳንካ ኑን ሀ የዉዋ ህንተናን ጬቀትያዌ መላ ግደና ማላ፥ ህንተ ጊገቴዳዋንታ ግዳናዳን፥ ሀ እሻቱዋ ህንተኮ ኪታይ። 4 ማቅዶንያ አሳቱ ታናና ዪደ፥ ህንተ ጊገተናን ደእሽን፥ ህንተና ደሞፐ፥ ኑ ጻላላ ግደናዳን፥ ህንተ ኑፐ አዋ ዬላታንታ፤ ሽን ኑን ህንተና ሎይ አማኒደ ጬቀቴዳዋሳ። 5 ሄዋ ድራዉ፥ ታን ሀ እሻቱ ታፐ ስንት ህንተኮ ቢደ፥ ህንተ እማና ጌዳ እሞታ ካሰቲደ ጊግሳና ማላ፥ ኡንቱንታ ዎሳናዉ ኮሽያዋ አኬካድ። ሄዋፐ ጉይያን፥ ሄ እሞታይ ታን ጋክያ ዎደ ጊግ ኡታናዋ፤ ሄዌ ቃይ ዎልቃን ህንተ እምያዋ ግደናን፥ ዶሲደ እምያዋ ኤርሴ።
6 ሀዋ አኬክተ፤ ጉ ዘረ ዘርያ ኡራይ ጉ ካ ጫካና፤ ዳሮ ዘረ ዘርያ ኡራይ ቃይ ዳሮ ካ ጫካና። 7 ጾሳይ ናሸቻን እምያ ኡራ ሲቅያ ድራዉ፥ ቃረቲደ ዎይ ዶሰናን እምያዋ ግደናን፥ እምያ ኡራይ ሁጲያን ሁጲያን ባረ ዎዛናን ቆፔዳዋ እሞ። 8 ጾሳይ ህንተንቶ ግድያዌ ኡባ ዎደ ደአናዳንነ ቃይ ሀራቶካ ህንተ እማናዉ ግድያዌ ደአናዳን ህንተና ኮሽያ ኡባባ ህንተንቶ እማናዉ ዳንዳዬ። 9 ጾሳ ማጻፋይ፥
"እ ህዬሳ አሳዉ ዳርሲደ እሜ፤
ቃይ አ ጽሎተይ መናዉ ደአናዋ"
ያጌ።9:9 ማዝ. 112:9 10 ጾሳይ፥ ዘርያዎ ዘረነ ማናዉ ቁማ እምያዌ፥ ህንተና ኮሽያ ዘረ ኡባ ህንተንቶ እማና፤ ቃይ ህንተ ጽሎተፐ ዳሮ አይፍያ አይፍሳናዉ ሄ ዘረ ድቻናዋ።9:10 ኢሳ. 55:10
11 ዳሮ አሳይ ህንተ እምያ እሞታ ኑፐ አኪደ፥ ጾሳ ጋላታናዳን፥ ህንተ ኡባ ዎደ ዳርሲደ እምያዋንታ ግዳና ማላ፥ ጾሳይ ህንተና ኡባ ባጋና ዱረያና። 12 አያዉ ጎፐ፥ ሀ ህንተ ኦያ ኦሱ ጾሳ ናናዉ ኮሽያዋ ኩን እምያዋ ጻላላ ግደና፤ ሽን ጾሳዉ ዳሮ ጋላታ እምያዋን ኩሚደ ጎጌ። 13 ሀ ህንተ ኦሱ ህንተ አማኑዋ ኤርስያ ድራዉ፥ ዳሮ አሳይ ክርስቶሳ ዎንጋላ ህንተ አማኒደ ማርካትያዎነ ህንተ ማዱዋ ኡንቱንቱናነ ሀራ ኡባቱዋና ሻኪደ፥ ዳርስ እምያዎ ጾሳ ቦንቻና። 14 ኡንቱንቱ ህንተንቶ ጾሳ ዎሲደ፥ ህንተናን ደእያ ጾሳ አ ኬካተይ ዛዋይ ባይናዋ ድራዉ፥ ህንተና ላሞቴቶ። 15 ዛዋይ ባይና ጾሳ አ ኬካተ ድራዉ፥ ጾሳ ጋላታይ ጋኮ።