1 ታን ጳዉሎስ፥ ጾሳ ሸንያን ክርስቶስ የሱስ ኪቴዳዋ ግዴዳዌነ ኑ እሻይ ጽሞቶስ፥ 2 ቆላስያሳ ግያ ካታማን ደእያ ጾሳ ናናቶ፥ ክርስቶሳን አማነቴዳ እሻቶ ሀ ዳብዳቢያ ጻፌቶ።

ጾሳ ኑ አዉዋፐነ ጎዳ የሱስ ክርስቶሳፐ፥ አ ኬካተይነ ሳሮተይ ህንተንቶ ግዶ።

3 ኑን ህንተንቶ ዎሲደ፥ ኑ ጎዳ የሱስ ክርስቶሳ አዉዋ፥ ጾሳ ኡባ ዎደ ጋላቴቶ። 4 አያዉ ጎፐ፥ ኑን ክርስቶስ የሱሳ ህንተንቱ አማንያዋነ ጾሳ አሳቱዋ ኡባ ሲቅያዋ ስሴዶ። 5 ቱሙ ኪታይ ዎንጋላይ ኮይሮ ህንተኮ ዬዳ ዎደ፥ ጾሳይ ስንፐ እማና ጌዳዋ ስሴድታ። ስም ህንተንቱ አማኑነ ሲቁ ሳሉዋን ጊጊደ ናግያ፥ ጾሳይ ስንፐ እማና ጌዳዋን ዶመቴዳ። 6 ሄ ዎንገሊ ህንተኮ ጋኬዳ፤ ህንተንቱ አ ስሶደፐነ ጾሳ አ ኬካተ ቱማተን ኤሮደፐ ዶሚደ፥ ህንተንቱ ግዶን ደእያዋዳንካ፥ ቢታ ኡባን አንጁዋ አሄነ ኡባሳ አኬ።

7 ህንተንቱ ሄዋ ኑናና እትፐ ቆማ ግዴዳ ሲቆ ኤፓፍራፐ ታማሬድታ፤ እ ኑ ድራዉ ክርስቶሳዉ አማነቲደ ኦያዌ፥ 8 ጾሳ አያናን ሀራቱዋ ህንተንቱ ሲቅያዋ ኑዉ ኦዴዳ።

9 ሄዋ ድራዉ፥ ኑን ቃይ ሄዋ ስሴዳ ጋላሳፐ ዶሚደ፥ ጾሳይ ህንተንቶ ባረ ሸንያ ኤርያ ኤራተ፥ ጾሳ አያናይ እምያ አዳ ኤራተናነ አኬካና እትፐ ኩንደ እማናዳን፥ ኡባ ዎደ ባለናን ጾሳ ዎሴቶ። 10 ሄዋፐ ጉይያን፥ ጎዳይ ኮይያዋዳን ህንተንቱ ደአናዉነ፥ ኡባ ዎደ አ ናሸችያባ ኦናዉ ዳንዳያና፤ ህንተንቱ ኦያ ሎኦ ኦሱዋ ኡባን ህንተንቱ ደኡ ጎአና ደእያዋ ግዳናዋ፤ ቃይ ጾሳ ኤርያዋን ድጭ ድጭ ባንታ።

11 ህንተንቱ ኡባባን ናሸቻን ገንጫናዳንነ ዳንዳያናዳን፥ ጾሳይ ባረ ቦንቹዋ ግታተዳን እምያ ዎልቃ ኡባን ምንተ። 12 ቃይ ጾሳ ናናቶ ጊጌዳ ፖኦ ካዉተ ላታናዉ፥ ኑና ዳንዳይሴዳ ጾሳ አዉዋ ጋላትተ። 13 እ ኑና ማ ዎልቃፐ አሺደ፥ ባረ ሲቅያ ናኣ ካዉተኮ ፕንዳ። 14 ቃይ እ ባረ ናኣን ኑና ዎዚደ፥ ኑ ናጋራ አቶ ጌዳ።

15 ክርስቶስ ቤተና ጾሳ ቆንጭስያዋ፤ እ መቴዳዋ ኡባፐ አያ ባይራ ናኣ። 16 አያዉ ጎፐ፥ ኡባባይካ አን መቴዳ፤ ቤትያዋንቱ፥ ቤተናዋንቱ፥ አያናቱዋፐ ቤትያ ዎልቃይነ ጎዳተይ፥ ቃተይነ ማታይ፥ ሳሉዋንነ ሳኣን ደእያ ኡባባይካ አንነ አዉ መቴዳ። 17 እ ኡባባፐ ካሰ ደኤዳ፤ ኡባባይካ አን ባረ ሳኣ ሳኣ ኦይቂደ ደኤ። 18 እ ባረ ሁጰዉ፥ ዎሳ ጎለዉ ሁጰነ ደኦ፤ እ ኡባፐ ቦላ ግዳና ማላ፥ ካሰቲደ ሀይቁዋፐ ደንዴዳ ባይራ ናኣ ግዴዳ።

19 አያዉ ጎፐ፥ ጾሳይ ኮዬዳዋዳን፥ አን ጾሳተ ኩመንይ ደኤ። 20 ያትና ጾሳይ ክርስቶሳ ባጋና ኡባባ ባረናና ስገናዉ የዉዋ ቃቼዳ፤ ባረ ናአይ ማስቃልያ ቦላን ጉሴዳ ሱን ሳሉዋንነ ሳኣን ደእያ ኡባባ ባረናና ስገዳ።

21 ሀዋፐ ካሰ፥ ህንተንቱ ኢታባ ቆፔዳ ድራዉነ ኦዳ ድራዉ፥ ጾሳፐ ሻከቲደ፥ አናና ሞርከቴድታ። 22 ሽን ጾሳይ ሀእ ህንተንታ ፖኮባይ ባይናዋንታነ ቃይ ጌሻቱዋ ኦደ፥ ባረ ስን ሺሻናዉ፥ ባረ ናኣ ሀይቄዳዋ አሳተን ባረናና ህንተንታ ስገዳ። 23 ሄዌ ህንተንቱ ቱሙ አማኑዋን ምን ኤቂደ፥ ምሽራቹዋ ቃላ ስሲደ፥ ስንፐ አካና ጌዳዋፐ ቃጸናን ምኒደ ደኦፐ ሀናና፤ ሄ ዎንጋላ ምሽራቹ ሳኣን ደእያ መታ ኡባ ማታን ኦደቴዳ። ታን ጳዉሎስካ ምሽራቹዋ ቃላ ኦድያዋ ግዳድ።

24 ታን ህንተንቶ ዋየቴዳ ድራዉ፥ ሀእ ናሸታይ፤ ክርስቶስ ባረ ሁጰዉ፥ ሄዋ ግያዌ ዎሳ ጎለዉ፥ ዋየትሽን ፓጬዳዋ ታን ታ ቦላ ሳኩዋን ኩንይ። 25 ጾሳይ ታና ህንተንታ ማድያዋነ አ ቃላ ፖላደ ኦድያ ቆማተ ኪታ ታዉ እሜዳ። 26 ሀ ቃላይ ሀዋፐ ካሰ ባጋ ኡባን፥ አሳ ኡባዉ ኤረተናን ጌሚደ ደኤ፤ ሽን ባረና አማንያዋንቶ ጾሳይ ሀእ ቆንጭሴዳ። 27 ጾሳይ አይሁዳ ግደና አሳዉ ዎዳ ሀ አሳዉ ቆንጭቤና ቦንቹዋነ ዱረ የዉ አየንቶ ጌሻቱዋ ኤርሳናዉ ኮዬዳ፤ ሀ አሳዉ ሀእ ቆንጬዳዌ አዬ ጎፐ፥ ክርስቶስ ህንተንቱን ደእያዋ፤ ሄዋ ግያዌ ጾሳ ቦንቹዋ አናና ህንተንቱ አካናዋ።

28 ሄዋ ድራዉ፥ ኑን አሳ ኡባዉ ክርስቶሳዋ ኦዴቶ፤ አሳ ኡባ ክርስቶሳን ኩመን አሳ ኦደ፥ ጾሳኮ ሺሻና ማላ፥ ኑዉ አዳ ኤራተ ኡባን ህንተንታ ሴረቶነ ታማርሴቶ። 29 ታን ሀዋ ፖላናዉ፥ ታናን ኦያ ክርስቶስ ታዉ እምያ ዎልቃን ባጸታይነ ዳቡራይ።