1 ስም ህንተንቱ ክርስቶሳና ሀይቁዋፐ ደንዴዳዋ ግዶፐ፥ ጾሳፐ ኡሸቻ ባጋና ኡቴዳ ክርስቶስ ደእያ ሳን ሳሉዋን ደእያዋ ምንስ ኮይተ። 2 ሳሉዋን ደእያዋ ህንተንቱ ቆፓናፐ አትን፥ ሳኣን ደእያዋ ቆፖፕተ። 3 አያዉ ጎፐ፥ ህንተንቱ ሀይቄድታ፤ ቃይ ህንተንቱ ሸምፑ ጾሳን ክርስቶሳና ጌሜዳ። 4 ህንተዉ ደኦ ግዴዳ ክርስቶስ ቆንጭያ ዎደ፥ ሄ ዎደ ህንተካ አናና ቦንቹዋን ቆንጫና።

5 ሄዋ ድራዉ፥ ህንተንቱን ደእያ ሀ ሳኣ አሞቱዋ ዎተ፤ ሄዋንቱካ ዎሹምያዋ፥ ቱናተ፥ ዎሹማናዉ ኮይያዋ፥ ኢታ አሙዋ፥ ሚሻ አሞትያዋ። ዮራንቻ ግዱሳይ ኤቃዉ ጎይንያዋፐ ዱማተና። 6 ሀዋንቱ ጋሱዋን፥ ጾሳይ አዛዘተና አሳቱዋ ሀንቀታናዋ። 7 ካሰ ህንተንቱ ሀ ኢታ ቆፋቱዋን ደእያ ዎደ ኡንቱንቱን ሞደቴድታ።

8 ሽን ሀእ ህንተንቱ ቃይ ሀንቁዋ፥ ይሉዋ፥ እጹዋ፥ ህንተንቱ ዶናፐ ከስያ ጫሻነ ዬላይያ ሃሳያ ሀዋንታ ኡባ ህንተፐ ይስተ። 9 እቱ እቶ ዎርዶቶፕተ፤ አያዉ ጎፐ፥ ናጋራንቻ መታ አ ኦሱዋና ህንተፐ ይስ ድጊደ፥✝3:9 ኤፈ. 4:22 10 ጾሳይ፥ አ መዳዌ፥ ባረና ማላትሳናዉነ ባረዉ ደእያ ኤራተ ኡባ እማናዉ፥ ኡባ ዎደ ኦራያ ኦራ መታ ማዬድታ።✝3:10 ዶመ 1:26፤ ኤፈ. 4:24 11 ሀ ኦራ መታን፥ ግሪከ አሳ ዎይ አይሁዳ አሳ፥ ቃጻረቴዳዋ ዎይ ቃጻረትቤናዋ፥ እማቱዋነ አይነ ታማርቤናዋ፥ አይልያ ዎይ ዎማኑዋ ጊደ ሻክያባይ ባዋ፤ ሁጰ አላሊ ክርስቶሳ፤ እ ኡባንካ ደኤ።

12 ሄዋ ድራዉ፥ ጾሳይ ዶሬዳዋንቱዳን፥ ጌሻነ ሲቅያዋንታ ግዲደ፥ ማሮተ፥ ቃረታ፥ ኬካተ፥ ህንተንቱ ሁጲያ ካዉሽያዋ፥ አሽከተነ ዳንዳያ ማይተ። 13 እቱ እቱዋዋ ዳንዳይተ፤ ኦንነ ባረ ላግያ ቦላ ሀንቀቴዳዌ ደኦፐ፥ እቱ እቶ አቶ ያጎ። ክርስቶስ ህንተንቶ አቶ ጌዳዋዳን፥ ህንተካ አቶ ጊተ። 14 ሄዋ ኡባ ቦላ፥ ኡባባ እትፐ ሺሽ ቃችያ ሲቁዋ ማይተ። 15 ክርስቶስ እምያ ሳሮተይ ህንተንታ ሞዶ፤ አያዉ ጎፐ፥ ጾሳይ ህንተንታ እት አሳ ኦደ፥ ሄ ሳሮተዉ ጼሴዳ ጾሳ ጋላትተ።

16 ክርስቶሳ ቃላይ ህንተንቱ ዎዛናን ኩሚደ ደኦ፤ ህንተንቶ ደእያ አዳ ኤራተ ኡባን እቱ እቱዋ ታማርስተነ ዞርተ፤ ህንተንቱ ዎዛናን ጾሳ ጋላቲደ፥ ዎሳነ ማዝሙርያ፥ ጾሳ ሱን ቁ ኦያ የ የጽተ።✝3:16-17 ኤፈ. 5:19-20 17 ህንተ አይ ሃሳይያዋ ዎይ አይ ኦያዋ ግዶፐካ፥ አዉዋ ጾሳ የሱሳ ባጋና ጋላቲደ፥ ኦያዋ ኡባ ጎዳ የሱሳ ሱንን ኦተ።

18 ማቼቶ፥ አማንያ አሳዉ በስያዋዳን፥ ህንተንቱ አስናዉ ሞደትተ።✝3:18 ኤፈ. 5:22፤ 1 ጰጽ. 3:1

19 አቱማ አሳቶ፥ ህንተንቱ ማጫ አሳ ሲቅተ፤ ኡንቱንቱና ዎፑ ጊደ ደእተ።✝3:19 ኤፈ. 5:25፤ 1 ጰጽ. 3:7

20 ናቶ፥ ህንተንታ የሌዳዋንቶ ኡባባን አዛዘትተ። አያዉ ጎፐ፥ ህንተንቱ ኡንቱንቶ አዛዘትያዌ ጾሳ ዳሮ ናሸቼ።✝3:20 ኤፈ. 6:1

21 አዋቶ፥ ህንተንቱ ናናይ ዎዛና ባየና ማላ፥ ኡንቱንታ ይሎዮፕተ።✝3:21 ኤፈ. 6:4

22 አይለቶ፥ ሳኣን ህንተንቶ ጎዳ ግድያዋንቶ ኡባባን አዛዘትተ፤ ጎዳዉ ያዪደ፥ ሱረ ዎዛናን ኦተፐ አትን፥ አሳ ናሸቻናዉነ አሳይ በኦ ግያዋን አዛዘትያዋንታ ግዶፕተ።✝3:22-25 ኤፈ. 6:5-8 23 ህንተ ኦያ ኦሱ ኡባ አሳዉ ግደናን ጎዳዉ ኦያዋዳን፥ ዎዛናፐ ኦተ። 24 ጎዳ ክርስቶሳዉ ህንተንቱ ኦያ ድራዉ፥ እ ባረዋንቶ እማናዉ ጊግስ ዎዳዋ ህንተንቱ ላታናዋ አኬክተ። 25 ባላባ ኦዳ ኡራይ ኦንነ፥ ባረ ኦዳ ባላዳን ዎይታ አካና፤ አያዉ ጎፐ፥ ጾሳይ ፕርዲደ፥ ኦናነ ማደና።✝3:25 ዛረ. 10:17፤ ኤፈ. 6:9