ኤፈሶና 1

1 ታን ጾሳ ሸንያን ክርስቶስ የሱስ ኪቴዳ ጳዉሎስ፥ ኤፈሶናን ደእያ ጾሳ ናናዉ ቃይ ክርስቶሳ የሱሳዉ አማነቲደ ደእያዋንቶ ሀ ዳብዳቢያ ጻፋይ።

2 ጾሳ ኑ አዉዋፐነ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።

ክርስቶሳፐ ቤትያ አያና አንጁዋ

3 አያና አንጁዋ ኡባን ክርስቶሳ ባጋና ቦላ ሳሉዋን ኑና አንጄዳ ጾሳ፥ ኑ ጎዳ የሱስ ክርስቶሳ አዉዋ፥ ኑን ጋላቴቶ። 4 ኑን አ ስንን ጌሻቱዋነ ፖኩ ባይናዋንታ ግዳና ማላ፥ ጾሳይ ኑና ሳአይ መታናፐ ካሰ፥ ክርስቶሳ ባጋና ባረ ሲቁዋን ዶሬዳ። 5 ጾሳይ ባረ ሸንያን ባረ ዶሴዳዋዳን፥ የሱስ ክርስቶሳ ባጋና ኑና ባረ ናናቱዋ ኦናዉ ካሰቲደ ቆፕ ዎዳ። 6 ጾሳይ ባረ ሲቅያ ናኣ ባጋና ኑዉ ጮ እሜዳ አ ኬካተ ቦንቹዋ ድራዉ፥ ኑፐ ጋላታ አካናዉ ሄዋ ኦዳ።

7 ኑን ጾሳ አ ኬካተ ዳሩዋዳን፥ ክርስቶሳ ሱን ዎዘቴዶ፤ ሄዋን ጾሳይ ኑ ናጋራ አቶ ጌዳ። 8 ጾሳይ ባረ አዳ ኤራተ ኡባንነ ባረ ዎዛና ቆፋ ኡባን ባረ አ ኬካተ ኑዉ ዳርሲደ እሜዳ። 9 አያዉ ጎፐ፥ ጾሳይ ባረ ቆፔዳዋ ኦዳ፤ ቃይ ክርስቶሳ ባጋና ፖላናዉ ቆፕ ዎዳ ጹራ የዉዋ ኑና ኤርሴዳ። 10 ጾሳይ ዎድያ ዉርሰይ ጋክያ ዎደ ፖላናዉ ቆፔዳ ቆፋይ ክርስቶሳ ዋና ኦደ፥ ሳሉዋንነ ሳኣን ደእያ መታ ኡባ እትፐ አን ሺሻናዋ።

11 ኡባባይ ጾሳ ቆፋዳንነ እ ጌዳዋዳን ሀኔዳ፤ ጾሳይ ካሰቲደ ቆፕ ዎዳዋዳን፥ ክርስቶሳ ባጋና ኑን አዋንታ ግዳናዳን፥ ኑና ዶሬዳ። 12 ኑን ካሰቲደ፥ ክርስቶሳ ባጋና አካና ጊደ ናሸቻን ናግያዋንቱ፥ ጾሳ ቦንቹዋ ጋላቴቶ። 13 ህንተዉካ ቃይ ሄዋዳን ሀኔዳ፤ ቱሙ ኪታ፥ ህንተንቶ አቶተ አሄዳ ምሽራቹዋ ቃላ፥ ህንተ ስሴዳ ዎደ ክርስቶሳ አማኔድታ፤ ጾሳይ ህንተንቶ እማና ጌዳ ጌሻ አያና ባጋና፥ ህንተ አዋ ግድያዋ ኤርስያ ማታፋ ህንተ ቦላ ዎዳ። 14 ጾሳይ ባረ አሳዉ እማና ጌዳዋ ኑን ላታና ጋካናዉ፥ ጌሻ አያና ዋሰተ ኦይቄዶ። ሄዌ ቃይ አ ቦንቾ፥ ጋላታ ግዳናዋ።

ጳዉሎስ ኤፈሶና አሳዉ ዎሴዳ

15 ሄዋ ድራዉ፥ ጎዳ የሱሳ ህንተ አማንያዋነ ጌሻቱዋ ኡባ ህንተ ሲቅያዋ ታን ስሶደፐ ዶማደ፥ 16 ህንተንቶ ጾሳ ጋላትያዋ አጋበይከ፤ ጾሳ ዎሳደ ህንተዉካ ዎሳይ። 17 ቃይ ጎዳ የሱስ ክርስቶሳ ጾሳይ፥ ቦንቹዋ አዉ፥ ጾሳ ህንተ ኤራናዳን፥ ህንተና አዳ ኤራንቻ ኦያ ቃይ ጾሳ ህንተንቶ ቆንጭስያ ጌሻ አያና ህንተንቶ እማናዳን፥ ታን ዎሳይ። 18 ጾሳይ ህንተ አካና ጊደ፥ ናሸቻን ናግ ኡቴዳዎ ህንተና ጼሴዳዋነ እ ባረ አሳዉ እማና ግያ አንጁ አይ ኬና ዱረንቶ ህንተ ኤራናዳን፥ ጾሳይ ህንተ ዎዛና ዶይና፥ አ ፖኡዋ ህንተ በአናዳን፥ ታን ጾሳ ዎሳይ።

19,20 ቃይ አ አማንያ ኑናን አ ዎልቃይ ሎይ ኦ። ሀ ኑናን ደእያ ዎልቃይነ ሀይቁዋፐ ክርስቶሳ ደንደ፥ ሳሉዋ ሳኣን ጾሳፐ ኡሸቻ ባጋና*1:19-20 ኡሸቻ ባጋ፦ ዎልቃነ ቦንቹዋ ሳኣ። ኡትሴዳ ዎልቃማ ዎልቃይ እቱዋ።✝1:19-20 ማዝ. 110:1 21 ክርስቶስ ሳሉዋ ሱንቱዋፐ፥ ጎዳተይ ደእያዋንቱፐ፥ ዎልቃማቱዋፐነ ጎዳቱዋ ኡባፐ ቦላ ግዲደ ሞዴ፤ እ ሀእ ደእያ የለታ ጻላላን ግደናን፥ ስንፐ ያና የለታንካ ሀራ ሱንተ ኡባፐ ቄ። 22 ጾሳይ ኡባባ ክርስቶሳ ገድያፐ ጋርሳን ሞድሲደ፥ ቃይ ጾሳይ እ ኡባባን ኡባፐ ቦላና ጎዳ ግዳናዳን፥ ዎሳ ጎለዉ አ እሜዳ።✝1:22 ማዝ. 8:6✝1:22-23 ቆል. 1:18 23 ዎሳ ጎሊ ክርስቶሳ አሳተ፤ ዎሳ ጎሊ ክርስቶስ ኡባ ሳን ኡባባ ኩንያ አ ፖሉዋ።