1 ሄዋ ድራዉ፥ ህንተኖ አይሁዳ ግደና አሳቶ፥ ታን ጳዉሎስ ህንተ ድራዉ ክርስቶስ የሱሳ ቃሾ አሳ ግዴዳዌ፥ ጾሳ ዎሳይ። 2 ጾሳይ ባረ አ ኬካተን፥ ታን ህንተና ማዳናዳን፥ ሀ ኦሱዋ ታዉ እሜዳዋ ህንተ ሎይ ስሴድታ። 3 ጾሳይ ባረ ጹራ ቆፋ ታዉ ቆንጭሲደ፥ ታና ኤርሴዳ፤ ታን ሄዋ ቃንን ጻፋድ። 4 ቃይ ታን ጻፌዳዋ ህንተ ናባብያ ዎደ፥ ክርስቶሳ ጹራ ታን ዎታ አኬካድታንቶነ ኤራናዉ ዳንዳዪታ። 5 በን ዎደ አሳይ ሄ ጹራ የዉዋ ስስቤና፤ ሽን ጾሳይ ሄዋ የሱስ ኪቴዳ ጾሳ ናናቶነ ትምቢትያ ኦድያዋንቶ፥ ጌሻ አያናን ሀእ ቆንጭሴዳ። 6 ጹራ የዉ ሀዋ፤ አይሁዳ ግደና አሳይ ዎንጋላ ባጋና፥ ጾሳ አንጁዋ አይሁዳቱዋና እትፐ ላቲኖ፤ ኡንቱንቱ እት አሳተን ሻከተናን ደኢኖ፤ ቃይ ክርስቶስ የሱሳ ባጋና ጾሳይ እማና ጌዳዋ አይሁዳቱዋና ሻኪኖ።

7 ጾሳይ ባረ ኦሱዋ ዎልቃ ባጋና ታዉ እሜዳ አ ኬካተን ታን ሀ ዎንጋላዉ ቆማ ግዳድ። 8 ታን ጌሻቱዋ ኡባ ግዶን ላፍያዋ ግዶፐካ፥ አይሁዳ ግደና አሳዉ ዛዋይ ባይና ክርስቶሳ ዱረተ ምሽራቹዋ ቃላ ኦድያ ሀ ካጫ ጾሳይ ታዉ እሜዳ። 9,10 ቃይ ታን ሄዋን ጾሳ ጹራ ቆፋ አሳ ኡባዉ ቆንጭሳ ኦዳና፤ ኡባባ መዳ ጾሳይ ባረ ጹራ የዉዋ በን ዎደ ገን ዎዳ። ጾሳይ ሀእ ሄዋ ዎሳ ጎልያ ባጋና ሳሉዋ ሳኣን ደእያ ካፓቶነ ጎዳተይ ደእያዋንቶ ዛዋይ ባይና ባረ አዳ ኤራተ ቆንጭሳናዉ ኦዳ። 11 ጾሳይ ሄዋ ኑ ጎዳ ክርስቶስ የሱሳ ባጋና እ ፖሌዳ ባረ መና ቆፋዳን ኦዳ። 12 ኑን ክርስቶስ የሱሳና እትፐ ግዲደ፥ አ አማንያ አማኑዋን አማነቲደ፥ አይነ ያየናን ጾሳ ስን ሺቃናዉ ዳንዳዬቶ።

13 ሄዋ ድራዉ፥ ታን ህንተዋን መቶትያዋን ህንተ ህርገና ማላ፥ ህንተና ዎሳይ፤ አያዉ ጎፐ፥ ታን ህንተ ቦንቾ መቶታይ።

14,15 ሄዋ ድራዉ፥ ታን ሳሉዋንነ ሳኣን ደእያ አማንያ ጎልያ አሳይ ኡባይ አፐ ዬዳ* ጾሳ ስንን ጉልባታይ። 16,17 ጾሳይ ባረ ቦንቹዋ ዳሩዋዳን፥ ባረ ጌሻ አያናን፥ ህንተንቶ ህንተ ጋርሳ አሳተን ህንተ ምንያ ዎልቃ እማናዳንነ፥ ቃይ አማኑዋ ባጋና ክርስቶስ ህንተ ዎዛና ባረ ጎልያ መናዳን፥ ታን ጾሳ ዎሳይ፤ ቃይካ ህንተ ጻጱዋ የዲደ፥ ቶከቲደ ሲቁዋን ምናናዳን፥ ጾሳ ዎሳይ። 18 ቃይ ጌሻቱዋ ኡባና ክርስቶሳ ሲቁ አይ ኬና አከንቶ፥ አዱሰንቶ፥ ቀንቶነ ጪመንቶ* ኤርያ ዎልቃ ህንተንቱ ደማናዳን፥ ታን ጾሳ ዎሳይ። 19 ኤራተፐ አያ ክርስቶሳ ሲቁዋ ህንተ ኤራናዳንነ ቃይ ጾሳዋ ግድያ ኡባባን ህንተ ፖል ኩማናዳን፥ ታን ጾሳ ዎሳይ።

20,21 ስም ኑ ግዶን ኦያ ባረ ዎልቃ ባጋና ኑን ዎስያዋ ዎይ ቆፕያዋ ኡባፐ ሎይ ዳርስ ኦናዉ ዳንዳይያ ጾሳዉ፥ ዎሳ ጎልያንነ ክርስቶስ የሱሳን ኡባ ዎደ መናፐ መና ጋካናዉ ቦንቹ ግዶ። አመንእ።