ቦላ እትፐተ
1 ሄዋ ድራዉ፥ ታን ጎዳዉ ኦያ ድራዉ ቃሸቴዳዌ ጾሳይ ህንተና ጼሴዳ ጼሳዉ በስያ ደኡዋ ህንተ ደአናዳን፥ ታን ህንተና ዎሳይ። 2 ኡባ ዎደ ህንተ ህንተ ሁጲያ ካዉሽያዋንታ፥ አሽከቱዋነ ዳንዳያንቻቱዋ ግድተ፤ እቱ እቱዋ ማድያዋን ህንተ ሲቁዋ በስተ። 3 ህንተና እትፐ ጋ ቃችያ ሳሮተን፥ ጌሻ አያናይ ህንተንቶ እምያ እትፐተ ናጋናዉ ምንተ። 4 ጾሳይ ህንተና ጼሴዳ ህዶታይ፥ ህንተ ደማና ጊደ ናግ ኡቴዳዌ መጽ እቱዋ ግዶዋዳን፥ እት አሳተይነ እት ጌሻ አያናይ ደኤ። 5 እት ጎዳይ፥ እት አማኑነ እት ጽንቃታይ ደኤ። 6 ኡባ ጎዳይ፥ ኡባ ባጋና ኦያዌ፥ ኡባ ግዶን ደእያዌ፥ እት ጾሳይ፥ ኡባ አዉ ደኤ።
7 ሽን ክርስቶስ እሜዳ እሙዋዳን፥ ኑን ሁጲያን ሁጲያን ዱማ እሙዋ አኬዶ። 8 ሄዋ ድራዉ፥ ጾሳ ማጻፋይ፥
"እ ፑደ ቃሳ ከሴዳ ዎደ፥
ኦሞደቴዳዋንታ አፌዳ፤
አሳዉካ እሞታ እሜዳ"
ያጌ።4:8 ማዝ. 68:18 9 ያትና፥ "ፑደ ከሴዳ" ግያዌ ዋግያዌ? እ ኮይሮ ዱገ ዎዳ፤ ሄዌ ሳአዉ ህርክ ዉርሰሳ ዎዳ ግያዋ። 10 ሀ ዱገ ዎዳዌ ባረ ሁጰዉ አ፤ ሄ እ ኡባባ ኩማናዳን፥ ሳሉዋ ኡባፐ ቂያሳ ፑደ ከሴዳ።
11 አሳዉ እሞታ እሜዳዌ አ፤ እ እቱዋ እቱዋ የሱስ ኪቴዳዋንታ፥ ሀራቱዋ ትምቢትያ ኦድያዋንታ፥ ቃይ ሀራቱዋ ምሽራቹዋ ቃላ ኦድያዋንታ፥ ቃይካ ሀራቱዋ ዎሳ ጎልያ ካለያዋንታነ ታማርስያዋንታ ኦ ሱንዳ። 12 እ ሄዋ ጌሻቱ ኡባይ አማንያ አሳ ኦሱዋ ኦናዳንነ ክርስቶሳ ቦላን ኬጸታናዳን ጊግሳናዉ ኦዳ። 13 ቃይ ኑን ኡባይ ጾሳ ናኣ አማንናነ ኤርና ቤትያ እትፐተኮ ጋካና፤ ኑን ክርስቶሳ ፖሎ ድቻ ኬና ድጪደ፥ ዶንዛ አሳ ግዳናዳና።
14 ኑን ቤታን ያነ ሃነ ሾጨቲደ፥ ባረንቱ ጭምያ ሀኖታን አሳ ባላ ኦግያ ካለያ ገንያ አሳ ትምርትያ ጫርኩዋ ኡባን ሱገቲደ፥ ሀዋፐ ስንዉ ናኣ ግዳናዉ በሰና። 15 ሽን ኑን ሲቆተን ቱሙዋ ሃሳዪደ፥ ሁጰ ግድያ ክርስቶሳኮ ኡባባን ድጫናዉ በሴ። 16 ቦላ ግዶን ደእያ ዱማ ዱማ ሻኮታይ አን እትፐ ኦይቀቴድኖ፤ ቃይ ኩመን ቦላይ ባረዉ እመቴዳሳ ኡባን እቱ እቱዋና ጋከቲደ፥ እትፐ ኦይቀት ኡቴዳ፤ ሄ ዱማ ዱማ ሻኮታይ ኦናዉ በስያዋ ኦያ ዎደ፥ ኩመን ቦላይ ሲቁዋን ድጬነ ባረና ኬጼ።
ክርስቶሳን ቤትያ ኦራ ደኡዋ
17 ሄዋ ድራዉ፥ ታን ሀዋ ህንተንቶ ጎዳ ሱንን ኦዳይነ ማርካታይ። ህንተ ጎእ ባይና ቆፋ ቆፕያ አይሁዳ ግደና አሳቱዋዳን ደኦፕተ። 18 ኡንቱንቱ ዎዛናይ ማን ደኤ፤ ኡንቱንቱ አይነ ኤረናዋንታነ አዛዘተና ድራዉ፥ ጾሳይ እምያ ደኡዋፐ ሃኬድኖ። 19 ኡንቱንቱ ማታን ዬላ ግያዌ ባዋ፤ ኡንቱንቱ ዎሹማዉ ካጄላናዉ ባረንቱ ሁጲያ አ እሚኖ፤ ቃይ ቱናባ ኡባ ፓጭ ባይናን ኦናዉ ሎይ ዮራትያዋንታ።
20 ሽን ህንተ ክርስቶሳዋ ሄዋዳን ታማርበይክታ። 21 አባ ቱሙ ስሴድታ፤ ቃይ ቱማተይካ የሱሳን ደእያዋ፥ አፐ ታማሬድታ። 22 ህንተ ካሰ ደእያ ደኡዋ አግተ፤ ቃይ ባረ ጭምያ አሙዋን ይያ ህንተ ኤጫ አሳተ ይስተ። 23 ህንተ ዎዛናይነ ቆፋይ ኡባና ኦራጻናዉ በሴ። 24 ቱሙ ጽሎተንነ ጌሻተን ጾሳ ሌምሱዋን መቴዳ ኦራ አሳተ ማይተ።
25 ስም ዎርዶቶፕተ። ኑን ኡባይ ክርስቶሳ አሳተን እት አሳ ግድያ ድራዉ፥ አሳይ ኡባይ ባረ እሻዉ ቱሙዋ ሃሳያናዉ በሴ።4:25 ዛካ. 8:16 26 ሀንቀትተ፤ ሽን ህንተ ሀንቁዋን ናጋራ ኦፕተ። ህንተ ሀንቁዋን ደእሽን፥ አዋይ ዉሎፖ።4:26 ማዝ. 4:4 27 ጻላሄዉ ጾእያ እሞፕተ። 28 ዉእያ ኡራይ ሀዋፐ ስንዉ ዉኦፖ፤ ሽን ሄዋ አጊደ፥ ህዬሳቱዋ ማዳናዉ፥ ባረ ኩሽያን ሎኦባ ኦደ ዳቡሮ።
29 ህንተ ሃሳያይ ስስያዋንታ ጎአና ማላ፥ ኮሽያዋዳን መንያ ሎኦ ቃላይ ህንተ ዶናፐ ከሶፐ አትን፥ ኢታ ቃላይ ሙለካ ከሶፖ። 30 ጾሳይ ህንተና ዎዝያ ጋላሳዉ ህንተ አታመት ኡቴዳ ጾሳ ጌሻ አያና ካዮዮፕተ። 31 እጽያ ሀኖታ፥ ይሉዋ፥ ሀንቁዋ፥ ዋሱዋነ ጫሻ ኡባ ኢታተ ኡባና ህንተፐ ይስተ። 32 እቱ እቶ ኬክተነ ቃረትተ፤ ቃይ ጾሳይ ክርስቶሳ ባጋና ህንተንቶ አቶ ጌዳዋዳን፥ ህንተካ እቱ እቱዋ አቶ ጊተ።