1 ታናዳን ጾሳ ካልያዋንቶ፥ ታን ሲቅያዋንቶ፥ ላሞትያዋንቶ፥ ታና ናሸችያዋንቶ፥ ታና ቁ ኦያዋንቶ፥ ታ ዳባቶ፥ ስም ጎዳን ህንተንቱ ምን ኤቃናዉ በሴ።

2 ኤዎደነ ስንጺኬ፥ ህንተንቱ ላኡካ ቆፋን እቱዋ ግዲደ፥ ጎዳን ደአናዳን፥ ታን ህንተና ዞራይ። 3 ቃይ ታናና ኦያ አማነቴዳዎ፥ ኔን ሀ ማጫ አሳቱዋ ማዳናዳን፥ ታን ኔና ዎሳይ፤ አያዉ ጎፐ፥ ኡንቱንቱ ታናናነ ኡንቱንቱ ሱንይ ጾሳ ደኡዋ ማጻፋን* ጻፈቴዳ ቃለምንጾሳና ቃይ ታናና እትፐ ኦያ ሀራቱዋ ኡባና ዎንጋላ ኡባሳ ጋናዉ ዳቡሬድኖ።

4 ጎዳና ህንተንቱ ደእያ ደኡዋን ኡባ ዎደ ናሸትተ፤ ታን ሀዋ ጉጃደካ ጋይ፤ ናሸትተ።

5 አሳይ ኡባይ ህንተንቱ አሽከተ ኤሮ፤ ጎዳይ ማታን ያና። 6 ጾሳ ህንተንቱ ዎስያ ዎሳ ኡባን አ ሎይ ጋላቲደ፥ ህንተና ኮሽያዋ ኡባዉ ዎስተፐ አትን፥ እትባዉካ ህርጎፕተ። 7 ቃይ አሳ ኤራተ ኡባፐ አያ ጾሳ ሳሮተይ ህንተንቱ ዎዛናነ ህንተንቱ ቆፋ ጎዳ የሱስ ክርስቶሳ ባጋና ናጋና።

8 ዉርሰን፥ ታናዳን ጾሳ ካልያዋንቶ፥ ህንተንቱ ዎዛናን ሎኦባነ ጋላትስያዋ ቆፕተ፤ ቱማ ግድያባ ኡባ፥ ቦንችስያዋ ኡባ፥ ባይዙዋ ግደናባ ኡባ፥ ጌሻባ ኡባ፥ ሲቁዋ ኡባ፥ ሱረ ግድያባ ኡባ ቆፕተ። 9 ህንተንቱ ታፐ ታማሬዳዋ፥ አኬዳዋ፥ ስሴዳዋነ በኤዳዋ ኡባ ኦተ፤ ቃይ ኑዉ ሳሮተ እምያ ጾሳይ ህንተናና እትፐ ግዳናዋ።

10 ሽን ዳሮ ዎድያፐ ጉይያን፥ ሀእ ህንተንቱ ታዋ ላኤንዋ ቆፓናዉ ዶሜዳ ድራዉ፥ ታን ጎዳን ሎይ ናሸታይ፤ ታዉ ቆፓናዉ ህንተንቶ እንጀተናን እጼዳዋፐ አትን፥ ታዉ ቆፋ ቆፒታ። 11 ታን ሀዋ ታና መቴዳ ድራዉ ጊከ፤ አያዉ ጎፐ፥ ታዉ ደእያባይ ታዉ ግዳና* ግያዋ ታን ታማራድ። 12 ታን መቶቲደ ዎት ደአነንቶ ኤራይ፤ ቃይ ዱረቲደ ደእያዌካ አየንቶ ኤራይ፤ ሀቃን ግድናካ አዉደ ግድናካ፥ ታን ካሉዋነ ኮሻ ቃይ ፓጫነ ፓላሃ ታማራድ። 13 ክርስቶስ ታዉ እሜዳ ዎልቃን፥ ኡባባ ኦናዉ ታን ዳንዳያይ።

14 ግዶፐካ፥ ህንተንቱ ታ መቱዋ ታናና መቶቲደ ዳሮ ሎይድታ፤ 15 ፕልጵስዮሳ አሳዉ፥ ዎንጋላ ምሽራቹ ኮይሮ ህንተ ግዶን ኦደቴዳ፤ ሽን ታን ማቅዶንያፐ ከሴዳ ዎደ፥ ታና አማንያ ህንተንቱፐ አትን፥ ሀራይ ማድቤናዋ ህንተንቱ ህንተንቱ ሁጰዉ ኤሪታ፤ ቃይ እምያባንካ አክያባንካ ህንተፐ አትን፥ ሀራይ ታና ማድቤና።✝ 16 አያዉ ጎፐ፥ ታና መቱ ኦይቄዳ ዎደ፥ ሀራይ አቶ ታን ተሰሎንቀን ደእሽንካ ታና ዛር ዛሪደ ማዴድታ።✝ 17 ታን ህንተዋ ቦላ ሀራባይ ጉጀታናዋ ኮይያዋፐ አትን፥ ዎይታ ጻላላ አካናዉ ኮይከ።

18 ሽን ታን ህንተንቱ እሜዳዋ ኡባ አካድ፤ ቃይ ታዉ ፓላሂደ ግድያዌ ደኤ። ህንተ ኪቴዳ ኡባባ ኤፓፍሮድቶሳፐ አካድ፤ ኮሽያ ኡባይ ታዉ ደኤ። ህንተ ታዉ ኪቴዳ እሙ ጾሳዉ ሳዉዋ ቶሽኩ ግያነ እ ዶስያ፥ አ ናሸችያ ያርሹዋ ማላ።✝ 19 ቃይ ታ ጾሳይ ባረ ቦንቾ ዱረተ ዳሩዋን ክርስቶስ የሱሳ ባጋና ህንተና ኮሽያዋ ኡባ ህንተንቶ እማና። 20 ኑ ጾሳዉ፥ ኑ አዎ መናፐ መና ጋካናዉ ቦንቹ ግዶ። አመንእ።

21 ክርስቶስ የሱሳዋ ግድያ ጾሳ አሳቱዋ ኡባቱዋ ሳሮ ጊተ። ታናና ሀዋን ደእያ እሻቱ ህንተና ሳሮ ጊኖ። 22 ሀዋን ደእያ ጾሳ አሳቱዋ ኡባቱ፥ ኡባፐካ አደ ካትያ ቄሳረ ጎልያን ደእያዋንቱ ህንተና ሳሮ ጊኖ።

23 ኑ ጎዳ የሱስ ክርስቶሳ አ ኬካተይ ህንተናና ግዶ።